କୋଲକାତା, ୨୮ ଫେବୃଆରୀ (ହି.ସ.)- ପଶ୍ଚିମବଙ୍ଗ ରାଜନୀତିରେ ପୂର୍ବତନ ପୋଲିସ ମହାନିର୍ଦ୍ଦେଶକ ରାଜୀବ କୁମାରଙ୍କୁ ନେଇ ଆଲୋଚନା ପୁଣି ଥରେ ତୀବ୍ର ହୋଇଛି । ଯେଉଁ ରାଜୀବ କୁମାରଙ୍କ ପାଇଁ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ବିରୋଧରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଧାରଣାରେ ବସିଥିଲେ, ତାଙ୍କୁ ହିଁ ତୃଣମୂଳ କଂଗ୍ରେସ ଆଗାମୀ ରାଜ୍ୟସଭା ନିର୍ବାଚନ ପାଇଁ ପ୍ରାର୍ଥୀ ଭାବରେ ଘୋଷଣା କରିଛି । ଅବସର ପରେ ଏତେ ଶୀଘ୍ର ତାଙ୍କର ସକ୍ରିୟ ରାଜନୀତିରେ ପ୍ରବେଶ ରାଜନୈତିକ ମହଲରେ ମିଶ୍ରିତ ପ୍ରତିକ୍ରିୟା ସୃଷ୍ଟି କରିଛି ।

ପୂର୍ବତନ ଡିଜିପି ରାଜୀବ କୁମାର ପଶ୍ଚିମବଙ୍ଗ କ୍ୟାଡରର ୧୯୮୯ ବ୍ୟାଚ୍ ଭାରତୀୟ ପୋଲିସ ସେବା ଅଧିକାରୀ ଥିଲେ । ସେ ଜାନୁଆରୀ ୩୧, ୧୯୬୬ ରେ ଉତର ପ୍ରଦେଶର ଚନ୍ଦୌସିରେ ଜନ୍ମଗ୍ରହଣ କରିଥିଲେ । ସେ ରୁଡ଼କିର ଭାରତୀୟ ପ୍ରଯୁକ୍ତିବିଦ୍ୟା ସଂସ୍ଥାନରୁ କମ୍ପ୍ୟୁଟର ବିଜ୍ଞାନରେ ଡିଗ୍ରୀ ହାସଲ କରିଥିଲେ । ତାଙ୍କ ଜେଜେବାପା ପ୍ରଫେସର ରାମଶରଣ ମୁରାଦାବାଦର ଗାନ୍ଧୀ ଭାବରେ ଜଣାଶୁଣା ଥିଲେ ।

ରାଜୀବ କୁମାରଙ୍କୁ ରାଜ୍ୟର ସବୁଠାରୁ ଗତିଶୀଳ ଅଧିକାରୀମାନଙ୍କ ମଧ୍ୟରୁ ଜଣେ ବୋଲି ବିବେଚନା କରାଯାଏ । ସେ ଦୁର୍ଗାପୁରର ପ୍ରଭାରୀ ଭାବରେ ତାଙ୍କର ସେବା ଆରମ୍ଭ କରିଥିଲେ ଏବଂ ପରେ ବୀରଭୂମି ସମେତ ଅନେକ ଜିଲ୍ଲାରେ ପୋଲିସ ଅଧିକ୍ଷକ ଭାବରେ କାର୍ଯ୍ୟ କରିଥିଲେ ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ