ଶ୍ରୀନଗର, 16 ମାର୍ଚ୍ଚ (ହି.ସ.)- କାଶ୍ମୀରରେ ବସନ୍ତ
ଋତୁର ଆଗମନ ସହ ଏସିଆର ସବୁଠୁ ବଡ଼ ଟ୍ୟୁଲିପ୍ ଗାର୍ଡେନ୍ ସୋମବାର ସାଧାରଣ ଲୋକଙ୍କ ପାଇଁ
ଖୋଲାଯାଇଛି। ଏହି ବହୁପ୍ରତୀକ୍ଷିତ ପୁଷ୍ପ ଉଦ୍ୟାନକୁ ଦେଖିବା ପାଇଁ ହଜାର ହଜାର ପର୍ଯ୍ୟଟକ ଓ
ସ୍ଥାନୀୟ ଲୋକ ଆସିବେ ବୋଲି ଆଶା କରାଯାଉଛି।
ଶ୍ରୀନଗରରେ ଜବରୱାନ ପର୍ବତ
ଶୃଙ୍ଖଳାର ପାଦଦେଶରେ ଅବସ୍ଥିତ ଇନ୍ଦିରା ଗାନ୍ଧୀ ସ୍ମୃତି ଟ୍ୟୁଲିପ୍ ଗାର୍ଡେନ୍ର ଉଦ୍ଘାଟନ
ମୁଖ୍ୟମନ୍ତ୍ରୀ ଉମର ଅବ୍ଦୁଲ୍ଲା କରିଥିଲେ। ଟ୍ୟୁଲିପ୍ ଗାର୍ଡେନ୍ ଖୋଲାଯିବା ଉପତ୍ୟକାରେ ବସନ୍ତ
ଋତୁର ଆଗମନର ପ୍ରତୀକ ଏବଂ କାଶ୍ମୀରର ପର୍ଯ୍ୟଟନ ଋତୁର ଆରମ୍ଭକୁ ସୂଚନା କରେ। ପ୍ରସିଦ୍ଧ ଡାଲ୍
ହ୍ରଦର ଦୃଶ୍ୟ ଥିବା ସିଢ଼ିଆକାର ଢାଳରେ ବିସ୍ତୃତ ଏହି ଉଦ୍ୟାନ ବିଭିନ୍ନ ରଙ୍ଗ ଓ ପ୍ରଜାତିର
ଲକ୍ଷାଧିକ ଟ୍ୟୁଲିପ୍ ଫୁଲରେ ଖିଳିଉଠିବ, ଯାହା
ଆଗନ୍ତୁକମାନଙ୍କୁ ଏକ ଅଦ୍ଭୁତ ଦୃଶ୍ୟ ପ୍ରଦାନ କରିବ।
ଅଧିକାରୀମାନେ କହିଛନ୍ତି ଯେ
ଏହି ବର୍ଷ ଉଦ୍ୟାନରେ ଟ୍ୟୁଲିପ୍ର ୭୦ରୁ ଅଧିକ ପ୍ରଜାତି ଲଗାଯାଇଛି। ଟ୍ୟୁଲିପ୍ ବ୍ୟତୀତ
ହାୟାସିନ୍ଥ,
ଡାଫୋଡିଲ୍, ମସ୍କାରି ଏବଂ ରାନନକୁଲସ୍
ପରି ଅନ୍ୟାନ୍ୟ ବସନ୍ତ ଋତୁର ଫୁଲ ମଧ୍ୟ ଲଗାଯାଇଛି, ଯାହା
ଉଦ୍ୟାନର ସୌନ୍ଦର୍ଯ୍ୟକୁ ବଢ଼ାଇବା ସହିତ ଫୁଲର ବିଭିନ୍ନତାକୁ ଆହୁରି ବଢ଼ାଇଛି। ପ୍ରତିବର୍ଷ ଫୁଲ
ଋତୁରେ ଏହି ଉଦ୍ୟାନ ଦେଶ ଓ ବିଦେଶରୁ ହଜାର ହଜାର ପର୍ଯ୍ୟଟକ, ପ୍ରକୃତିପ୍ରେମୀ ଓ ଫଟୋଗ୍ରାଫରମାନଙ୍କୁ ଆକର୍ଷିତ କରେ, ଯାହାର ଫଳରେ ବସନ୍ତ ଋତୁରେ ଏହା କାଶ୍ମୀରର ସବୁଠୁ ଅଧିକ ଦର୍ଶନୀୟ ପର୍ଯ୍ୟଟନ ସ୍ଥଳମାନଙ୍କ
ମଧ୍ୟରୁ ଗୋଟିଏ ହୋଇଯାଏ।
ଅଧିକାରୀମାନେ କହିଛନ୍ତି ଯେ
ଫୁଲ ଋତୁରେ ସମ୍ଭାବ୍ୟ ଭିଡ଼କୁ ସମ୍ଭାଳିବା ପାଇଁ ପରିବହନ ସୁବିଧା, ପାର୍କିଂ ବ୍ୟବସ୍ଥା, ସୁରକ୍ଷା
ବ୍ୟବସ୍ଥାପନା ଓ ଅନ୍ୟାନ୍ୟ ଆବଶ୍ୟକ ପର୍ଯ୍ୟଟନ ସୁବିଧା ସହ ବ୍ୟାପକ ବ୍ୟବସ୍ଥା କରାଯାଇଛି।
---------------
ହିନ୍ଦୁସ୍ଥାନ ସମାଚାର / ସ୍ୱାଗତିକା
16 Mar 2026