କାବୁଲ, ୧୭ ମାର୍ଚ୍ଚ (ହି.ସ.) – ସୋମବାର ରାତିରେ ପାକିସ୍ଥାନ ଏବଂ ଆଫଗାନିସ୍ଥାନ ମଧ୍ୟରେ ଚାଲିଥିବା ବିବାଦ ଗମ୍ଭୀର ରୂପ ନେଇଛି । ପାକିସ୍ଥାନ କାବୁଲର ଏକ ହସ୍ପିଟାଲ ଉପରେ ଆକ୍ରମଣ କରିଥିଲା, ଯେଉଁଥିରେ ଅତି କମ୍ରେ ୧୦୦ ଜଣ ଲୋକ ପ୍ରାଣ ହରାଇଥିଲେ ଏବଂ ଅନେକ ଲୋକ ଆହତ ହୋଇଥିଲେ । ତଥାପି ପାକିସ୍ଥାନ ଦାବି କରିଛି ଯେ, ଏହା ସାମରିକ ପ୍ରତିଷ୍ଠାନକୁ ଟାର୍ଗେଟ କରିଥିଲା । ସଦ୍ୟତମ ଆକ୍ରମଣ ପରେ ଆଫଗାନିସ୍ଥାନର ତାଲିବାନ ସରକାର ସ୍ପଷ୍ଟ କରିଛି ଯେ, ଆଲୋଚନା ଏବଂ କୂଟନୀତିର ସମୟ ଶେଷ ହୋଇଛି ଏବଂ ଆଫଗାନିସ୍ଥାନ ଏହାର ପ୍ରତିଶୋଧ ନେବ ।
ଆଫଗାନିସ୍ଥାନ ଏବଂ ପାକିସ୍ଥାନ ମଧ୍ୟରେ ମାସେ ଧରି ଚାଲିଥିବା ସଂଘର୍ଷ ମଧ୍ୟରେ ପରିସ୍ଥିତି ଦ୍ରୁତ ଗତିରେ ଖରାପ ହେଉଛି । ଗତକାଲି ବିଳମ୍ବିତ ରାତିରେ ପାକିସ୍ଥାନ ଆଫଗାନିସ୍ଥାନର ରାଜଧାନୀ କାବୁଲରେ ଏକ ନିଶା ପୁନର୍ବାସ କେନ୍ଦ୍ରକୁ ଟାର୍ଗେଟ କରିଛି । ଆକ୍ରମଣରେ ହସ୍ପିଟାଲର ବ୍ୟାପକ କ୍ଷତି ହୋଇଥିଲା, ଅଗ୍ନିକାଣ୍ଡରେ କୋଠାର ଅଧିକାଂଶ ଅଂଶ ନଷ୍ଟ ହୋଇଯାଇଥିଲା । କୁହାଯାଉଛି ଯେ, ଆକ୍ରମଣ ସମୟରେ ଏହି କେନ୍ଦ୍ରରେ ଦୁଇ ହଜାରରୁ ଅଧିକ ଲୋକ ଉପସ୍ଥିତ ଥିଲେ, ଯେଉଁଥିରେ ଅତି କମ୍ରେ ଶହେ ଲୋକ ପ୍ରାଣ ହରାଇଥିଲେ । ବହୁ ସଂଖ୍ୟକ ଲୋକ ଆହତ ହୋଇଛନ୍ତି, ଅନେକଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ଡାକ୍ତରଖାନାରେ ଭର୍ତି କରାଯାଇଛି । ମୃତ୍ୟୁ ସଂଖ୍ୟା ବୃଦ୍ଧି ପାଇବାର ଆଶଙ୍କା କରାଯାଉଛି ।
ହିନ୍ଦୁସ୍ଥାନ ସମାଚାର / ଭାନୁ ଚରଣ