ନୂଆଦିଲ୍ଲୀ, 19 ମାର୍ଚ୍ଚ (ହି.ସ.)- କଂଗ୍ରେସ ଉଚ୍ଚ ଶିକ୍ଷା ନିୟାମକ ଢାଞ୍ଚାରେ ପ୍ରସ୍ତାବିତ

ପରିବର୍ତ୍ତନକୁ ନେଇ ପ୍ରଶ୍ନ ଉଠାଇ କହିଛି ଯେ ସଂସଦର ସ୍ଥାୟୀ ସମିତିର ରିପୋର୍ଟରେ

ବିଶ୍ୱବିଦ୍ୟାଳୟ ଅନୁଦାନ ଆୟୋଗ (ୟୁଜିସି) ଏବଂ ଅଖିଲ ଭାରତୀୟ ପ୍ରାବିଧିକ ଶିକ୍ଷା ପରିଷଦ

(ଏଆଇସିଟିଇ) ପରି ପ୍ରମୁଖ ସଂସ୍ଥାମାନଙ୍କରେ ବହୁ ସଂଖ୍ୟକ ଖାଲି ପଦ ରହିଥିବାର ଖୁଲାସା ହୋଇଛି।

ଏମିତି ସମୟରେ ସରକାର ଆଣିଥିବା “ବିକଶିତ ଭାରତ ଶିକ୍ଷା ଅଧିଷ୍ଠାନ (ଭିବିଏସଏ) ବିଧେୟକ-2025”

ଚିନ୍ତାଜନକ ଅଟେ।

କଂଗ୍ରେସ ମହାସଚିବ (ସଂଚାର) ଏବଂ ସାଂସଦ ଜୟରାମ ରମେଶ ପାର୍ଟିର

ଆଧିକାରିକ ପତ୍ର ଜାରି କରି କହିଛନ୍ତି ଯେ ଏହି ବିଧେୟକର ବର୍ତ୍ତମାନ ରୂପକୁ ନେଇ ପାର୍ଟିର 7ଟି

ଆପତ୍ତି ରହିଛି। ଶିକ୍ଷା ସଂବିଧାନର ସମବର୍ତ୍ତୀ ସୂଚୀରେ ରହିଥିଲେ ମଧ୍ୟ, ଏହି ବିଧେୟକର ଖସଡା

ପ୍ରସ୍ତୁତି ସମୟରେ ରାଜ୍ୟ ସରକାରମାନଙ୍କ ସହ କୌଣସି ପରାମର୍ଶ ହୋଇନାହିଁ, ଯାହାକୁ ସେ

ଫେଡେରାଲ୍ ଢାଞ୍ଚାର ଉଲ୍ଲଂଘନ ବୋଲି କହିଛନ୍ତି।

ପତ୍ରରେ କୁହାଯାଇଛି ଯେ ବିଧେୟକରେ ଅନୁଦାନ ଦେବା ପାଇଁ ପରିଷଦର

ବ୍ୟବସ୍ଥା ନାହିଁ, ଯେତେବେଳେ ଜାତୀୟ

ଶିକ୍ଷା ନୀତି 2020 ରେ ଏହାର ସ୍ପଷ୍ଟ ଉଲ୍ଲେଖ ରହିଛି। ଏହାର ଫଳରେ ଅନୁଦାନ ଦେବାର ଶକ୍ତି

ଶିକ୍ଷା ସଂସ୍ଥାମାନଙ୍କ ଠାରୁ ମନ୍ତ୍ରଣାଳୟର ହାତକୁ ଯାଇପାରେ, ଯାହା ଉଚ୍ଚ

ଶିକ୍ଷାର କେନ୍ଦ୍ରୀକରଣ କରିବା ସହ ଶିକ୍ଷାଗତ ସ୍ୱାଧୀନତାକୁ ପ୍ରଭାବିତ କରିପାରେ।

ଜୟରାମ ରମେଶ କହିଛନ୍ତି ଯେ ନୂତନ ବ୍ୟବସ୍ଥାରେ ୟୁଜିସି, ଏଆଇସିଟିଇ ଏବଂ

ଏନସିଟିଇ ର ପ୍ରଶାସନ ଏବେ ଶିକ୍ଷାବିଦମାନଙ୍କ ପରିବର୍ତ୍ତେ ପ୍ରଶାସନିକ ଅଧିକାରୀଙ୍କ ହାତରେ

ରହିବ। ଏହାର ଫଳରେ ଶିକ୍ଷାର ପରିଚାଳନା ଶିକ୍ଷାଗତ ଦୃଷ୍ଟିକୋଣ ଠାରୁ ହଟି ପ୍ରଶାସନିକ

ଦୃଷ୍ଟିକୋଣକୁ ଯାଇପାରେ।

---------------

ହିନ୍ଦୁସ୍ଥାନ ସମାଚାର / ସ୍ୱାଗତିକା