ପ୍ରତିରକ୍ଷା ମନ୍ତ୍ରୀ ତିନି ସେନାର ମୁଖ୍ୟଙ୍କ ସହ ନିକଟରେ ବୈଶ୍ୱିକ

ଓ ଆଂଚଳିକ ସୁରକ୍ଷା ଘଟଣା ଉପରେ କଲେ ଚର୍ଚ୍ଚା

ନୂଆଦିଲ୍ଲୀ, 24 ମାର୍ଚ୍ଚ (ହି.ସ.)- ପଶ୍ଚିମ ଏସିଆରେ ଚାଲୁଥିବା ଯୁଦ୍ଧ ମଧ୍ୟରେ

ରକ୍ଷାମନ୍ତ୍ରୀ ରାଜନାଥ ସିଂହ ମଙ୍ଗଳବାର ଚିଫ୍ ଅଫ୍ ଡିଫେନ୍ସ ଷ୍ଟାଫ୍ (ସିଡିଏସ୍) ଜେନେରାଲ୍

ଅନିଲ ଚୌହାନ ଓ ତିନୋଟି ସେନାର ପ୍ରମୁଖମାନଙ୍କ ସହିତ ବୈଠକ କରି ଭାରତର ରକ୍ଷା ପ୍ରସ୍ତୁତି ଉପରେ

ଆଲୋଚନା କରିଛନ୍ତି। ଏହି ଗୁରୁତ୍ୱପୂର୍ଣ୍ଣ ବୈଠକରେ ସମ୍ପ୍ରତିର ବିଶ୍ୱ ଓ ଅଞ୍ଚଳୀୟ ସୁରକ୍ଷା

ଘଟଣାବଳୀର ମଧ୍ୟ ସମୀକ୍ଷା କରାଯାଇଥିଲା। ରକ୍ଷାମନ୍ତ୍ରୀ କହିଛନ୍ତି ଯେ ପଶ୍ଚିମ ଏସିଆରେ

ଘଟୁଥିବା ଆକ୍ରମଣ କେବଳ ଭାରତ ପାଇଁ ନୁହେଁ, ସମଗ୍ର ବିଶ୍ୱ ପାଇଁ ମଧ୍ୟ ଚିନ୍ତାର ବିଷୟ।

ଏହି ବୈଠକରେ ଡିଫେନ୍ସ ରିସର୍ଚ୍ଚ ଏଣ୍ଡ ଡେଭଲପମେଣ୍ଟ ଅର୍ଗାନାଇଜେସନ୍

(ଡିଆରଡିଓ)ର ଅଧ୍ୟକ୍ଷ ଡା. ସମୀର କାମତ, ବାୟୁ ସେନା ପ୍ରମୁଖ ଏୟାର ଚିଫ୍ ମାର୍ଶାଲ୍ ଅମର ପ୍ରୀତ ସିଂହ, ସେନାପତି ଜେନେରାଲ୍

ଉପେନ୍ଦ୍ର ଦ୍ୱିବେଦୀ, ନୌସେନା ପ୍ରମୁଖ

ଏଡମିରାଲ୍ ଦିନେଶ କେ ତ୍ରିପାଠୀ ଓ ଶୀର୍ଷ ଅଧିକାରୀମାନେ ପଶ୍ଚିମ ଏସିଆରେ ବଦଳୁଥିବା ପରିସ୍ଥିତି

ଉପରେ ଆଲୋଚନା କରିଥିଲେ। ସୁରକ୍ଷା ସମୀକ୍ଷା ବୈଠକରେ ରକ୍ଷାମନ୍ତ୍ରୀ ରାଜନାଥ ସିଂହ ଭାରତର

ରକ୍ଷା ପ୍ରସ୍ତୁତିର ଆକଳନ କରିଥିଲେ। ପଶ୍ଚିମ ଏସିଆରେ ଚାଲୁଥିବା ସଂଘର୍ଷ ଏବେ ଚତୁର୍ଥ

ସପ୍ତାହକୁ ପ୍ରବେଶ କରିଛି ଏବଂ ହୋର୍ମୁଜ୍ ଜଳମାର୍ଗ ଦ୍ୱାରା ହେଉଥିବା ବ୍ୟାପାର ପ୍ରାୟ ବନ୍ଦ

ହୋଇଯାଇଛି।

ଆମେରିକା-ଇଜରାଇଲର ସଂଯୁକ୍ତ ଆକ୍ରମଣରେ 28 ଫେବୃଆରୀରେ ଇରାନର 86

ବର୍ଷୀୟ ସୁପ୍ରିମ୍ ଲିଡର ଆୟାତୋଲ୍ଲା ଆଲି ଖାମେନେଇଙ୍କ ମୃତ୍ୟୁ ପରେ ବିବାଦ ବଢ଼ିଛି।

ପ୍ରତିକ୍ରିୟା ସ୍ୱରୂପ ଇରାନ ଅନେକ ଉପସାଗରୀୟ ଦେଶରେ ଇସ୍ରାଇଲ ଓ ଆମେରିକାର ସମ୍ପତ୍ତିକୁ

ଲକ୍ଷ୍ୟ କରିଥିଲା, ଯାହା ଫଳରେ ସମୁଦ୍ର

ମାର୍ଗରେ ଅଧିକ ବାଧା ସୃଷ୍ଟି ହୋଇଥିଲା ଏବଂ ଆନ୍ତର୍ଜାତୀୟ ଉର୍ଜା ବଜାର ସହିତ ବିଶ୍ୱ ଆର୍ଥିକ

ସ୍ଥିରତା ଉପରେ ମଧ୍ୟ ପ୍ରଭାବ ପଡ଼ିଛି।

ଏହା ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ଲୋକସଭାରେ

ସଦସ୍ୟମାନଙ୍କୁ ପଶ୍ଚିମ ଏସିଆରେ ଘଟୁଥିବା ଘଟଣାବଳୀ ଓ ଭାରତ ଉପରେ ସେଗୁଡ଼ିକର ସମ୍ଭାବ୍ୟ

ପ୍ରଭାବ ବିଷୟରେ ଜଣାଇଥିଲେ। ସେ ପରିସ୍ଥିତିକୁ ‘ଚିନ୍ତାଜନକ’ ବୋଲି ବର୍ଣ୍ଣନା କରିଥିଲେ। ସେ

ଆଜି ରାଜ୍ୟସଭାରେ ମଧ୍ୟ ଏହି ବିଷୟରେ ବକ୍ତବ୍ୟ ଦେଇଥିଲେ।

ପ୍ରଧାନମନ୍ତ୍ରୀ ଜୋର ଦେଇ କହିଥିଲେ ଯେ ଚାଲୁଥିବା ସଂଘର୍ଷ ଅପୂର୍ବ

ଚ୍ୟାଲେଞ୍ଜ ସୃଷ୍ଟି କରିଛି, ଯାହା କେବଳ ଆର୍ଥିକ

ଓ ଜାତୀୟ ସୁରକ୍ଷା ସହିତ ଜଡିତ ନୁହେଁ, ବରଂ ମାନବିକ ପରିପ୍ରେକ୍ଷିତରେ ମଧ୍ୟ ଗୁରୁତ୍ୱପୂର୍ଣ୍ଣ। ସେ କହିଥିଲେ

ଯେ ଦେଶର କଚ୍ଚା ତେଲ ଓ ଗ୍ୟାସର ଆବଶ୍ୟକତାର ଏକ ବଡ଼ ଅଂଶ ଯୁଦ୍ଧ ପ୍ରଭାବିତ ଅଞ୍ଚଳରୁ ପୂରଣ

ହୁଏ। ଏହି ଯୁଦ୍ଧ ତିନି ସପ୍ତାହରୁ ଅଧିକ ସମୟ ଧରି ଚାଲିଛି ଏବଂ ଏହାର ଗଭୀର ପ୍ରଭାବ ବିଶ୍ୱ

ଅର୍ଥନୀତି ଓ ଲୋକମାନଙ୍କ ଜୀବନ ଉପରେ ପଡ଼ିଛି। ସେହିପାଇଁ ବିଶ୍ୱର ସମସ୍ତ ଦେଶ ଏହି ସଂଘର୍ଷକୁ

ଶୀଘ୍ର ସମାଧାନ କରିବା ପାଇଁ ଆହ୍ୱାନ କରୁଛନ୍ତି। ସେ ଆହୁରି କହିଥିଲେ ଯେ ଏହି ଅଞ୍ଚଳ ଭାରତର

ବିଶ୍ୱ ସହିତ ବ୍ୟାପାର ପାଇଁ ଏକ ମୁଖ୍ୟ ବ୍ୟାପାର ମାର୍ଗ ଭାବେ ଅତ୍ୟନ୍ତ ଜରୁରୀ।

---------------

ହିନ୍ଦୁସ୍ଥାନ ସମାଚାର / ସ୍ୱାଗତିକା