ନୂଆଦିଲ୍ଲୀ, ୩୦ ମାର୍ଚ୍ଚ (ହି.ସ.)- ଜାତୀୟ ବଜେଟ୍ ବିମାନ ସେବା ପ୍ରଦାନକାରୀ ସଂସ୍ଥା ଇଣ୍ଡିଗୋ କୋଲକାତା ଏବଂ ଚୀନ୍ ର ସାଂଘାଇ ମଧ୍ୟରେ ପ୍ରତିଦିନ ସିଧାସଳଖ ବିମାନ ସେବା ଆରମ୍ଭ କରିଛି । ଏହା କୋଲକାତାରୁ ଚୀନ୍ ପାଇଁ ଦ୍ୱିତୀୟ ସିଧା ଉଡାଣ, ଯାହାକି ଭାରତ ଏବଂ ଚୀନ୍ ମଧ୍ୟରେ ବାଣିଜ୍ୟ ଏବଂ ପର୍ଯ୍ୟଟନକୁ ପ୍ରୋତ୍ସାହିତ କରିବ ।

ଇଣ୍ଡିଗୋ ସୋମବାର ଏକ ବିବୃତିରେ କହିଛି ଯେ, ଏହା ମାର୍ଚ୍ଚ ୨୯ ତାରିଖ ଠାରୁ କୋଲକାତା ଏବଂ ସାଂଘାଇ ମଧ୍ୟରେ ପ୍ରତିଦିନ ନନ୍-ଷ୍ଟପ୍ ବିମାନ ସେବା ଆରମ୍ଭ କରିଛି । ଏହାଦ୍ୱାରା ଏହାର ଅନ୍ତର୍ଜାତୀୟ ନେଟୱାର୍କକୁ ଆହୁରି ବିସ୍ତାରିତ ହୋଇଛି ଏବଂ ଭାରତ ଏବଂ ଚୀନ୍ ମଧ୍ୟରେ ବିମାନ ସଂଯୋଗକୁ ଆହୁରି ସୁଦୃଢ଼ କରିଛି । କମ୍ପାନୀ କହିଛି ଯେ, ଏହି ରୁଟ୍ ରେ ଏୟାରଲାଇନ ଏ ୩୨୦ ନିୟୋ ବିମାନର ବ୍ୟବହାର କରିବ, ଯାହାଦ୍ୱାରା ଦୁଇ ଦେଶ ମଧ୍ୟରେ ବ୍ୟବସାୟ ଏବଂ ଅବସର ବିନୋଦନ ଯାତ୍ରାର ବର୍ଦ୍ଧିତ ଚାହିଦା ପୂରଣ କରାଯାଇ ପାରିବ । କମ୍ପାନୀର ଏହି ନୂତନ ସେବା ଚୀନ୍ ରେ ଇଣ୍ଡିଗୋର ବର୍ତମାନର ବିସ୍ତାର କ୍ଷେତ୍ରରେ ଆଉ ଏକ ପଦକ୍ଷେପ । ଏହା ପୂର୍ବରୁ କୋଲକାତା-ଗୁଆଙ୍ଗଝୁ ବିମାନ ପୁନଃଆରମ୍ଭ କରାଯାଇଥିଲା ଏବଂ ଦିଲ୍ଲୀରୁ ମଧ୍ୟ କାର୍ଯ୍ୟ ଆରମ୍ଭ କରାଯାଇଥିଲା । ଏହି ନୂତନ ସେବା ଯୋଡିବା ସହିତ, ବିମାନ କମ୍ପାନୀ ଏବେ ପ୍ରତି ସପ୍ତାହରେ ଚୀନ୍ କୁ ୨୧ଟି ବିମାନ ପରିଚାଳନା କରୁଛି ।

ବିମାନ କମ୍ପାନୀ କହିଛି ଯେ, ସାଂଘାଇକୁ ତା’ର ନେଟୱାର୍କରେ ଯୋଡିବା ସହିତ, ଇଣ୍ଡିଗୋ ଯାତ୍ରା ବିକଳ୍ପଗୁଡ଼ିକୁ ବିସ୍ତାର କରିବା ଏବଂ ବିଶ୍ୱର ଦୁଇଟି ସର୍ବାଧିକ ଜନସଂଖ୍ୟା ବିଶିଷ୍ଟ ଦେଶ ମଧ୍ୟରେ ବ୍ୟବସାୟ ଏବଂ ପର୍ଯ୍ୟଟନର ବର୍ଦ୍ଧିତ ଚାହିଦା ପୂରଣ କରିବା ଜାରି ରଖିଛି । ଏହା ବ୍ୟତୀତ, ଦିଲ୍ଲୀ, ମୁମ୍ବାଇ, ହାଇଦ୍ରାବାଦ, ବେଙ୍ଗାଲୁରୁ, ଚେନ୍ନାଇ, ଅହମ୍ମଦାବାଦ, ପୁଣେ, ଜୟପୁର ଏବଂ ଭୁବନେଶ୍ୱର ସମେତ ଅନେକ ଭାରତୀୟ ସହର ଏବେ କୋଲକାତା ଦେଇ ସାଂଘାଇ ସହିତ ସହଜରେ ସଂଯୋଗ ହୋଇପାରିବ ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ