ପାଟନା, ୩୧ ମାର୍ଚ୍ଚ (ହି.ସ.)- ବିହାରର ନାଳନ୍ଦା ଜିଲ୍ଲାର ମାଘରା ଗ୍ରାମରେ ଥିବା ମାତା ଶୀତଳାଷ୍ଟମୀ ମନ୍ଦିରରେ ମଙ୍ଗଳବାର ଦିନ ଏକ ବିଶାଳ ଭିଡ଼ ମଧ୍ୟରେ ଦଳାଚକଟା ଘଟି ୮ ଜଣ ଶ୍ରଦ୍ଧାଳୁଙ୍କ ମୃତ୍ୟୁ ଘଟିଥିବା ବେଳେ ୬ ରୁ ଅଧିକ ଆହତ ହୋଇଛନ୍ତି । ତଥାପି, ପ୍ରଶାସନ ପକ୍ଷରୁ ମୃତକଙ୍କ ସଂଖ୍ୟା ଆନୁଷ୍ଠାନିକ ଭାବରେ ନିଶ୍ଚିତ କରାଯାଇ ନାହିଁ ।
ଏହି ଘଟଣା ପରେ ମନ୍ଦିର ପରିସର ଏବଂ ହସ୍ପିଟାଲରେ ଉତେଜନା ପ୍ରକାଶ ପାଇଥିଲା । ଆହତମାନଙ୍କୁ ଚିକିତ୍ସା ପାଇଁ ତୁରନ୍ତ ମଡେଲ ହସ୍ପିଟାଲରେ ଭର୍ତି କରାଯାଇଥିଲା । ସମସ୍ତ ମୃତକ ମହିଳା ବୋଲି ଜଣାପଡିଛି । ଏପର୍ଯ୍ୟନ୍ତ ମୃତକଙ୍କ ମଧ୍ୟରୁ ଦୁଇଜଣଙ୍କ ପରିଚୟ ମିଳିଛି । ସେମାନେ ହେଲେ ସକୁନ୍ତ ବିହାରର ବାସିନ୍ଦା ଦିନେଶ ରଜକଙ୍କ ପତ୍ନୀ ୫୦ ବର୍ଷିୟା ରୀତା ଦେବୀ ଏବଂ ମଥୁରାପୁର (ନୁରସରାଇ) ନିବାସୀ କମଲେଶ ପ୍ରସାଦଙ୍କ ପତ୍ନୀ ୪୫ ବର୍ଷୀୟା ରେଖା ଦେବୀ । ଇତିମଧ୍ୟରେ, ମୁଖ୍ୟମନ୍ତ୍ରୀ ନୀତିଶ କୁମାର ଶୀତଳା ଦେବୀ ମନ୍ଦିରରେ ଦଳାଚକଟା ଘଟି ଶ୍ରଦ୍ଧାଳୁଙ୍କ ମୃତ୍ୟୁ ପାଇଁ ଗଭୀର ଶୋକ ପ୍ରକାଶ କରିଛନ୍ତି । ଦୁର୍ଘଟଣାରେ ଆହତଙ୍କ ଶୀଘ୍ର ଆରୋଗ୍ୟ ପାଇଁ ସେ ପ୍ରାର୍ଥନା କରିଛନ୍ତି । ମୁଖ୍ୟମନ୍ତ୍ରୀ ମୃତକଙ୍କ ପରିବାରକୁ ପ୍ରତ୍ୟେକଙ୍କୁ ୬ ଲକ୍ଷ ଟଙ୍କା ଲେଖାଏଁ ସହାୟତା ଦେବାକୁ ନିର୍ଦ୍ଦେଶ ଦେଇଛନ୍ତି ।
ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁଯାୟୀ, ଭିଡ଼ ଏବଂ ବିଶୃଙ୍ଖଳା ହଠାତ୍ ବୃଦ୍ଧି ପାଇବାରୁ ଦଳାଚକଟା ସୃଷ୍ଟି ହୋଇଥିଲା, ଲୋକମାନେ ପରସ୍ପର ଉପରେ ପଡ଼ି ଯାଇଥିଲେ ଏବଂ ପରିସ୍ଥିତି ନିୟନ୍ତ୍ରଣ ବାହାରକୁ ଚାଲିଯାଇଥିଲା ।
ପ୍ରତ୍ୟକ୍ଷଦର୍ଶୀମାନେ କହିଛନ୍ତି ଯେ ଚୈତ୍ର ମାସର ଶେଷ ଦିନ ହୋଇଥିବାରୁ ଆଜି ଏହି ମେଳା ଅନୁଷ୍ଠିତ ହେଉଥିଲା ଏବଂ ଭକ୍ତମାନଙ୍କର ଏକ ବଡ଼ ଭିଡ଼ ଜମା ହୋଇଥିଲା । ଲୋକମାନେ ଯଥାଶୀଘ୍ର ଦର୍ଶନ କରିବା ପାଇଁ ପରସ୍ପରକୁ ପଛରେ ପକାଇବାକୁ ଚେଷ୍ଟା କରୁଥିଲେ । ମନ୍ଦିରର ଗର୍ଭଗୃହ ବହୁତ ଛୋଟ, କେବଳ ଗୋଟିଏ ପ୍ରବେଶ ଦ୍ୱାର ସହିତ । ପ୍ରବଳ ଭିଡ଼ ହଠାତ୍ ଦଳାଚକଟା ସୃଷ୍ଟି କରିଥିଲା, ଯାହା ଫଳରେ ଦୁର୍ଘଟଣା ଘଟିଥିଲା ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ