ନୂଆଦିଲ୍ଲୀ, ୧୪ ଏପ୍ରିଲ (ହିସ)- ସଂସଦର ଆଗାମୀ ତିନି ଦିନିଆ ସ୍ୱତନ୍ତ୍ର ଅଧିବେଶନରେ କେନ୍ଦ୍ର ସରକାର ତିନୋଟି ବିଲ୍ ପାସ୍ କରିବାକୁ ଯାଉଛନ୍ତି। ବିଲ୍ ର ନକଲ ସାଂସଦମାନଙ୍କୁ ପଠାଯାଇଛି। ଏଥିରେ ସମ୍ବିଧାନ (୧୩୧ତମ ସଂଶୋଧନ) ବିଲ୍, ୨୦୨୬, ସୀମା ନିର୍ଦ୍ଧାରଣ ବିଲ୍, ୨୦୨୬ ଏବଂ କେନ୍ଦ୍ରଶାସିତ ଅଂଚଳ ସଂଶୋଧନ ବିଲ୍ ଅନ୍ତର୍ଭୁକ୍ତ।

ଏହି ବିଲ୍ ଗୁଡିକ ଜନଗଣନା ଆଧାରରେ ସୀମା ନିର୍ଦ୍ଧାରଣ (ସିଟ୍ ପୁନଃନିର୍ମାଣ) କାର୍ଯ୍ୟକାରୀ କରିବା, ଲୋକସଭା ଆସନ ସଂଖ୍ୟା ୫୪୩ ରୁ ୮୩୦ କୁ ବୃଦ୍ଧି କରିବା ଏବଂ କେନ୍ଦ୍ର ଏବଂ ରାଜ୍ୟ ବିଧାନସଭାରେ ମହିଳାଙ୍କ ପାଇଁ ୩୩ ପ୍ରତିଶତ ସ୍ଥାନ ସଂରକ୍ଷଣ କରିବା ଲକ୍ଷ୍ୟ ରଖିଛି।

ସମ୍ବିଧାନ (୧୩୧ତମ ସଂଶୋଧନ) ବିଲ୍, ୨୦୨୬, ଲୋକସଭାରେ ରାଜ୍ୟଗୁଡ଼ିକରୁ ସର୍ବାଧିକ ୮୧୫ ଆସନ ଏବଂ କେନ୍ଦ୍ରଶାସିତ ଅଂଚଳଗୁଡ଼ିକରୁ ସର୍ବାଧିକ ୩୫ ଆସନ ବୃଦ୍ଧି କରିବାର ବ୍ୟବସ୍ଥା କରିଛି। ଏହା ଜନସଂଖ୍ୟାର ପରିଭାଷାରେ ପରିବର୍ତନ ପାଇଁ ମଧ୍ୟ ବ୍ୟବସ୍ଥା କରିଛି। ଏହା ସର୍ବଶେଷ ଜନଗଣନା ଆଧାରରେ ନିର୍ବାଚନମଣ୍ଡଳୀର ପୁନଃନିର୍ମାଣକୁ ସକ୍ଷମ କରିବ।

ସୀମା ନିର୍ଦ୍ଧାରଣ ବିଲ୍, ୨୦୨୬, ଏକ କମିଶନ ପ୍ରତିଷ୍ଠା କରିବ। ଏହି କମିଶନ ସର୍ବଶେଷ ଜନଗଣନା ତଥ୍ୟ ଆଧାରରେ ଲୋକସଭା ଏବଂ ରାଜ୍ୟ ବିଧାନସଭାଗୁଡ଼ିକରେ ଆସନ ବଂଟନ ଏବଂ ନିର୍ବାଚନମଣ୍ଡଳୀର ବିଭାଜନର ଖସଡ଼ା ପ୍ରସ୍ତୁତ କରିବ। କମିଶନଙ୍କ ଅଧ୍ୟକ୍ଷତା ଜଣେ ବର୍ତମାନର କିମ୍ବା ପୂର୍ବତନ ସୁପ୍ରିମକୋର୍ଟ ବିଚାରପତି କରିବେ। ଏହି ବିଲ୍ ଦ୍ୱାରା ଲୋକସଭା ଏବଂ ରାଜ୍ୟ ବିଧାନସଭାଗୁଡ଼ିକରେ ମହିଳାଙ୍କ ପାଇଁ ପ୍ରାୟ ଏକ ତୃତୀୟାଂଶ ଆସନ ସଂରକ୍ଷଣ ସୁନିଶ୍ଚିତ କରାଯିବ।

କେନ୍ଦ୍ରଶାସିତ ଅଂଚଳ ଆଇନ (ସଂଶୋଧନ) ବିଲ୍, ୨୦୨୬, ପୁଡୁଚେରୀ, ଦିଲ୍ଲୀ ଏବଂ ଜମ୍ମୁ ଏବଂ କାଶ୍ମୀରର ଆଇନଗୁଡ଼ିକୁ ନୂତନ ସୀମା ନିର୍ଦ୍ଧାରଣ ନିୟମ ଏବଂ ମହିଳା ସଂରକ୍ଷଣ (ସମ୍ବିଧାନର ଧାରା ୩୩୪ଏ) ସହିତ ସମନ୍ୱୟ ରଖିବା ପାଇଁ ସଂଶୋଧନ କରିବ।

--------

---------------

ହିନ୍ଦୁସ୍ଥାନ ସମାଚାର / ଗଗନ