ନୂଆଦିଲ୍ଲୀ, ୧୮ ଅପ୍ରେଲ (ହି.ସ.)- ସଂସଦର ବଜେଟ୍ ଅଧିବେଶନ ଶନିବାର ଶେଷ ହୋଇଛି ଏବଂ ଉଭୟ ଗୃହ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯାଇଛି । ଏହି ଅଧିବେଶନ ରାଜନୈତିକ ଭାବରେ ଅଶାନ୍ତ ଥିଲା ଏବଂ ନିର୍ବାଚନ ସଂସ୍କାର ବିଷୟରେ ଆଲୋଚନା କରାଯାଇଥିବା ସ୍ୱତନ୍ତ୍ର ବୈଠକ ପାଇଁ ଆବଂଟିତ ସମୟଠାରୁ ଅଧିକ ବୃଦ୍ଧି କରାଯାଇଥିଲା ।
ମହିଳାମାନଙ୍କୁ ୩୩ ପ୍ରତିଶତ ସଂରକ୍ଷଣ ଦେବା ଏବଂ ସୀମା ନିର୍ଦ୍ଧାରଣ ପ୍ରକ୍ରିୟାକୁ କାର୍ଯ୍ୟକାରୀ କରିବା ପାଇଁ ଅଧିବେଶନ ସମୟରେ ସରକାରଙ୍କ ଦ୍ୱାରା ଉପସ୍ଥାପିତ ସମ୍ବିଧାନ (ଏକ ଶହ ତୃତୀୟ ସଂଶୋଧନ) ବିଲ୍, ୨୦୨୬, ଲୋକସଭାରେ ଆବଶ୍ୟକ ଦୁଇ ତୃତୀୟାଂଶ ସଂଖ୍ୟାଗରିଷ୍ଠତା ହାସଲ କରିପାରିନଥିଲା । ଏହି ବିଲ୍ ସପକ୍ଷରେ ୨୯୮ ଏବଂ ବିପକ୍ଷରେ ୨୩୦ ଭୋଟ୍ ପଡିଥିଲା, ଯେତେବେଳେ ପାସ୍ ପାଇଁ ୩୫୨ ଭୋଟ୍ ଆବଶ୍ୟକ ଥିଲା ।
ଲୋକସଭା ବାଚସ୍ପତି ଓମ ବିର୍ଲା ତାଙ୍କ ଉଦ୍ଯାପନୀ ଅଭିଭାଷଣରେ ସୂଚନା ଦେଇଥିଲେ ଯେ, ଗୃହର ଉତ୍ପାଦକତା ପାଖାପାଖି ୯୩ ପ୍ରତିଶତ ରହିଛି । ସେ ସୂଚନା ଦେଇଥିଲେ ଯେ, ଜାନୁଆରୀ ୨୮ରେ ଆରମ୍ଭ ହୋଇଥିବା ଏହି ଅଧିବେଶନରେ ମୋଟ୍ ୩୧ଟି ବୈଠକ ହୋଇଥିଲା, ଯାହା ୧୫୧ ଘଂଟା ୪୨ ମିନିଟ୍ ପର୍ଯ୍ୟନ୍ତ ଚାଲିଥିଲା । ଅଧିବେଶନ ସମୟରେ କେନ୍ଦ୍ର ବଜେଟ୍ ୨୦୨୬-୨୭ ଉପରେ ପ୍ରାୟ ୧୩ ଘଂଟା ଧରି ଆଲୋଚନା କରାଯାଇଥିଲା, ଯେଉଁଥିରେ ୬୩ ଜଣ ସଦସ୍ୟ ଯୋଗ ଦେଇଥିଲେ । ବାଚସ୍ପତି ସୂଚନା ଦେଇଥିଲେ ଯେ, ସମ୍ବିଧାନ (୧୩୧ତମ ସଂଶୋଧନ) ବିଲ୍, କେନ୍ଦ୍ରଶାସିତ ଅଂଚଳ ଆଇନ (ସଂଶୋଧନ) ବିଲ୍ ଏବଂ ସୀମା ନିର୍ଦ୍ଧାରଣ ବିଲ୍, ୨୦୨୬ ଉପରେ ୨୧ ଘଂଟା ୨୭ ମିନିଟ୍ ଧରି ଆଲୋଚନା କରାଯାଇଥିଲା, ଯେଉଁଥିରେ ୧୩୧ ଜଣ ସଦସ୍ୟ ଅଂଶଗ୍ରହଣ କରିଥିଲେ, କିନ୍ତୁ ସମ୍ବିଧାନ ସଂଶୋଧନ ବିଲ୍ ପାରିତ ହୋଇପାରିନଥିଲା ।
ଏହି ଅଧିବେଶନରେ ୧୨ଟି ସରକାରୀ ବିଧେୟକ ଉପସ୍ଥାପନ କରାଯାଇଥିଲା, ଯେଉଁଥିରୁ ୯ଟି ବିଧେୟକ ପାରିତ ହୋଇଥିଲା । ଏହାବ୍ୟତୀତ, ଗୃହରେ ସାର୍ବଜନୀନ ଗୁରୁତ୍ୱ ବହନ କରୁଥିବା ୩୨୬ଟି ପ୍ରସଙ୍ଗ ଉଠାଯାଇଥିଲା ଏବଂ ନିୟମ ୩୭୭ ଅଧୀନରେ ୬୫୦ଟି ମାମଲା ଉପସ୍ଥାପନ କରାଯାଇଥିଲା । ଓମ ବିର୍ଲା ସୂଚନା ଦେଇଥିଲେ ଯେ, ଅଧିବେଶନରେ ୧୨୬ଟି ତାରକାଚିହ୍ନିତ ପ୍ରଶ୍ନର ମୌଖିକ ଉତର ଦିଆଯାଇଥିଲା । ଆହୁରି ମଧ୍ୟ, ସଂସଦୀୟ କମିଟିଗୁଡ଼ିକ ଦ୍ୱାରା ୭୩ଟି ରିପୋର୍ଟ ଦାଖଲ କରାଯାଇଥିଲା ଏବଂ ମୋଟ୍ ୨୦୮୯ଟି ଦସ୍ତାବିଜ ଗୃହର ଟେବୁଲରେ ରଖାଯାଇଥିଲା ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ