ଜୟପୁର, ୨୦ ଏପ୍ରିଲ୍ (ହି.ସ.) - ଏକ ବୋଲେରୋ ପିକଅପ୍ ଭ୍ୟାନ୍ ରୁ ୪୦ ବସ୍ତା ଧାନ ଲୁଟ ହୋଇଥିବା ଏକ ହାଇୱେ ଡକାୟତି ଘଟଣାରେ କୋରାପୁଟ ପୋଲିସ ତିନି ଜଣ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ କୋରାପୁଟ ସଦର ଥାନା ଅନ୍ତର୍ଗତ ରହିମ ଭତ୍ରା (୨୧), ଆଶେର ବାଘ (୨୧) ଏବଂ ରୁହେନ ବେନିଅ (୨୨) ବୋଲି ପୋଲିସ ତରଫରୁ ସୂଚନା ଦିଆଯାଇଛି ।

କୋରାପୁଟ ସଦର ଥାନାରେ ଜଗଦୀଶ ପାଣିଗ୍ରାହୀ ଏପ୍ରିଲ ୧୦ ତାରିଖରେ ଅଭିଯୋଗ ଅନୁଯାୟୀ, ତାଙ୍କ ବୋଲେରୋ ପିକଅପ୍ ଭ୍ୟାନ୍ (ପଞ୍ଜିକରଣ ନମ୍ବର ଓଡି୧୦ଏମ୯୫୧୯ ର ଡ୍ରାଇଭର କାକ୍ରିଗୁମାରୁ ବୋରିଗୁମା ଅଭିମୁଖେ ୬୫ ବସ୍ତା ଧାନ ପରିବହନ କରୁଥିଲେ। ମାଛରା ଘାଟି ରାସ୍ତାରେ, ଦୁଇଟି ବୁଲେଟ୍ ବାଇକ୍ ସମେତ ଚାରିଟି ମୋଟରସାଇକେଲରେ ଆଠ ଜଣ ସଶସ୍ତ୍ର ଦୁର୍ବୃତ୍ତ ଗାଡ଼ିକୁ ଅଟକାଇ ଦେଇଥିଲେ। ସେମାନେ ଡ୍ରାଇଭରଙ୍କୁ ଖଣ୍ଡାରେ ଧମକାଇ ବୋଲେରୋକୁ ଅଟକାଇ ଥିଲେ l ୪୦ ବସ୍ତା ଧାନ ଖାଲି କରିଥିଲେ ଏବଂ ପରେ ଖାଲି ଗାଡ଼ିଟିକୁ ଫେରାଇ ଦେଇଥିଲେ। ଦୁର୍ବୃତ୍ତମାନେ ଡ୍ରାଇଭରଙ୍କ ମୋବାଇଲ୍ ଫୋନ୍ ଏବଂ ନଗଦ ୧,୦୦୦ ଟଙ୍କା ଲୁଟି ନେଇ ପଳାଇ ଯାଇଥିଲେ।

ଅଭିଯୋଗକୁ ଭିତ୍ତି କରି କୋରାପୁଟ ସଦର ପୋଲିସ ତଦନ୍ତ ସମୟରେ ତିନି ଅଭିଯୁକ୍ତଙ୍କୁ ଗିରଫ କରି ୪୦ଟି ଧାନ ବସ୍ତା (ପ୍ରତ୍ୟେକ ୫୦ କିଲୋଗ୍ରାମ), ଦୁଇଟି ବୁଲେଟ୍ ମୋଟରସାଇକେଲ୍, ଗୋଟିଏ କଳା ଟିଭିଏସ୍ ଜୁପିଟର୍ ସ୍କୁଟି ଏବଂ ଗୋଟିଏ ସାମସଙ୍ଗ ଟାବଲେଟ୍ ଜବତ କରିଛି ।

ଗିରଫ ବ୍ୟକ୍ତିଙ୍କୁ ପଚରାଉଚରା କରିବାରୁ ଜଣାପଡ଼ିଛି ଯେ, କୋରାପୁଟ ଜିଲ୍ଲାରେ ଭାରତ ଫାଇନାନ୍ସିଆଲ୍ ଇନକ୍ଲୁଜନ ଲିମିଟେଡର କ୍ଷେତ୍ର କର୍ମଚାରୀଙ୍କୁ ଟାର୍ଗେଟ କରି ପୂର୍ବରୁ ଅନ୍ୟ ଦୁଇଟି ଡକାୟତି ମାମଲାରେ ଦଳ ସମ୍ପୃକ୍ତ ଥିଲା। ପ୍ରଥମ ମାମଲାରେ ଜାନୁଆରୀ ୩, ୨୦୨୬ରେ ସାନା ଚିନ୍ଦ୍ରି ଗ୍ରାମ ନିକଟରେ ଜଣେ କର୍ମଚାରୀଙ୍କ ଠାରୁ ତିନି ଜଣ ଦୁର୍ବୃତ୍ତ ଏକ ସାମସଙ୍ଗ ଟାବଲେଟ୍ ଲୁଟି ନେଇଥିଲେ। ଦ୍ୱିତୀୟ ଘଟଣାରେ ଫେବୃଆରୀ ୧୮, ୨୦୨୬ରେ ପଦ୍ମପୁର ଏବଂ ପଣସପୁଟ ମଧ୍ୟରେ ଫେରୁଥିବା ସମୟରେ ଅନ୍ୟ ଜଣେ ମହିଳା କ୍ଷେତ୍ର କର୍ମଚାରୀଙ୍କ ଟିଭିଏସ୍ ଜୁପିଟର୍ ସ୍କୁଟି, ୭୪,୭୦୮ ଟଙ୍କା, ଏକ ସାମସଙ୍ଗ ଟାବଲେଟ୍, ବାୟୋମେଟ୍ରିକ୍ ସ୍କାନର ଏବଂ ଅନ୍ୟାନ୍ୟ କାଗଜପତ୍ର ଲୁଟି ନିଆଯାଇଥିଲା।କୋରାପୁଟ ସଦର ଥାନାରେ ଧାରା ୩୧୦(୨) ବିଏନଏସ୍ ଅଧୀନରେ ଏକ ମାମଲା ରୁଜୁ କରାଯାଇଛି। ତଦନ୍ତକାରୀ ଅଧିକାରୀ, ଏସଆଇ ସୁଧାଂସୁ କୁମାର ନାୟକ କହିଛନ୍ତି ଯେ, ଏନେଇ ଅଧିକ ତଦନ୍ତ ଚାଲିଛି ଏବଂ ଗ୍ୟାଙ୍ଗର ବାକି ସଦସ୍ୟମାନଙ୍କୁ ଖୁବ୍ ଶୀଘ୍ର ଗିରଫ କରାଯିବ।

ହିନ୍ଦୁସ୍ଥାନ ସମାଚାର / ପିକେପି