ନୂଆଦିଲ୍ଲୀ, ୨୨ ଏପ୍ରିଲ୍(ହି.ସ.) – ପଶ୍ଚିମ ଏସିଆରେ ଚାଲିଥିବା ଇରାନ-ଆମେରିକା ଏବଂ ଇସ୍ରାଏଲ ବିବାଦ ସମୟରେ କେନ୍ଦ୍ର ସରକାର ସୂଚନା ଦେଇଛନ୍ତି ଯେ ପେଟ୍ରୋଲିୟମ ଏବଂ ଗ୍ୟାସ୍ ଯୋଗାଣରେ ବ୍ୟାଘାତ ସତ୍ୱେ ଦେଶକୁ ତୈଳ ଏବଂ ଗ୍ୟାସ ଯୋଗାଣ ସ୍ୱାଭାବିକ ଥିଲା। ଏହା ମଧ୍ୟ ଦାବି କରିଛି ଯେ ଜଳପଥ ଦ୍ୱାରା ଦେଶ ବାହାରକୁ ଯାଉଥିବା ସମସ୍ତ ଭାରତୀୟ ନାବିକ ସୁରକ୍ଷିତ ଅଛନ୍ତି, ଘରୋଇ ଏଲ୍ପିଜି ଯୋଗାଣ ସ୍ୱାଭାବିକ ସ୍ତରକୁ ଫେରିଛି ଏବଂ ଇନ୍ଧନ ଏବଂ ଗ୍ୟାସର ନିରବଚ୍ଛିନ୍ନ ଯୋଗାଣ ସୁନିଶ୍ଚିତ କରିବା ପାଇଁ ଅନେକ ପଦକ୍ଷେପ ନିଆଯାଇଛି।

ଗତ ୨୪ ଘଂଟା ମଧ୍ୟରେ କୌଣସି ଭାରତୀୟ ଫ୍ଲାଗ୍ ଜାହାଜରେ କୌଣସି ଘଟଣା ଘଟିନାହିଁ ଏବଂ ଆମର ନାବିକମାନେ ସୁରକ୍ଷିତ ଅଛନ୍ତି ବୋଲି କେନ୍ଦ୍ର ବନ୍ଦର, ଜାହାଜ ଚଳାଚଳ ଏବଂ ଜଳପଥ ମନ୍ତ୍ରଣାଳୟର ଅତିରିକ୍ତ ସଚିବ ମୁକେଶ ମଙ୍ଗଳ ଜାତୀୟ ଗଣମାଧ୍ୟମ କେନ୍ଦ୍ରରେ ଦୈନିକ ଆନ୍ତଃମନ୍ତ୍ରି ସ୍ତରୀୟ ସାମ୍ବାଦିକ ସମ୍ମିଳନୀରେ କହିଛନ୍ତି। ଭାରତୀୟ ପତାକା ଥିବା ଅଶୋଧିତ ତୈଳ ଟ୍ୟାଙ୍କର୍ ମାର୍ଚ୍ଚ ୧୮ରେ ସୁରକ୍ଷିତ ଭାବରେ ଦେଶର ଅଂଚଳରେ ପ୍ରବେଶ କରିଛି ଏବଂ ଆଜି ସନ୍ଧ୍ୟାରେ ୩୧ ଜଣ ଭାରତୀୟ ନାବିକଙ୍କୁ ନେଇ ମୁମ୍ବାଇରେ ପହଂଚିବ ବୋଲି ଆଶା କରାଯାଉଛି। ମନ୍ତ୍ରଣାଳୟ ଏପର୍ଯ୍ୟନ୍ତ ୨,୬୧୫ ଜଣ ଭାରତୀୟ ନାବିକଙ୍କ ନିରାପଦ ପ୍ରତ୍ୟାବର୍ତନକୁ ସୁଗମ କରିଛି, ଯେଉଁଥିରେ ଗତ ୨୪ ଘଂଟା ମଧ୍ୟରେ ୨୫ ଜଣ ନାବିକ ସାମିଲ ଅଛନ୍ତି।

କେନ୍ଦ୍ର ପେଟ୍ରୋଲିୟମ ମନ୍ତ୍ରଣାଳୟର ଯୁଗ୍ମ ସଚିବ ସୁଜାତା ଶର୍ମା କହିଛନ୍ତି ଯେ ଘରୋଇ ଏଲ୍ପିଜି ଯୋଗାଣ ସ୍ୱାଭାବିକ ସ୍ତରକୁ ଫେରିଛି। ଏପ୍ରିଲ ମାସରେ ଏକ ଲକ୍ଷ ଟନ୍ରୁ ଅଧିକ ଏଲ୍ପିଜି ଯୋଗାଇ ଦିଆଯାଇଛି ଏବଂ ଏକ ଲକ୍ଷରୁ ଅଧିକ ସିଲିଣ୍ଡର ବଂଟନ କରାଯାଉଛି। ସରକାର ପାଇପ୍ ପ୍ରାକୃତିକ ଗ୍ୟାସ(ପି.ଏନ୍.ଜି.)କୁ ପ୍ରୋତ୍ସାହନ ଦେଉଛନ୍ତି ଏବଂ ସଂଯୋଗ ଏବଂ ଭିତିଭୂମିରେ ଦ୍ରୁତ ବୃଦ୍ଧି ଘଟୁଛି। ନୂତନ ଏଲ୍ପିଜି ଗ୍ରାହକଙ୍କ ସଂଖ୍ୟା ମଧ୍ୟ ବୃଦ୍ଧି ପାଇଛି ଏବଂ ବିଶୋଧନାଗାରଗୁଡ଼ିକ ସେମାନଙ୍କର ପୂର୍ଣ୍ଣ କ୍ଷମତାରେ କାର୍ଯ୍ୟ କରୁଛନ୍ତି। ନିକଟରେ ହଜାର ହଜାର ଚଢ଼ାଉ କରାଯାଇଛି ଏବଂ ସିଲିଣ୍ଡର ଜବତ କରାଯାଇଛି। ତୈଳ ବିପଣନ କମ୍ପାନୀଗୁଡ଼ିକ ମଧ୍ୟ ଜମାଖୋରୀ ଏବଂ ବେଆଇନ ବିକ୍ରୟକୁ ରୋକିବା ପାଇଁ ଆକସ୍ମିକ ଯାଂଚ କରୁଛନ୍ତି।

ହିନ୍ଦୁସ୍ଥାନ ସମାଚାର/ବୀଣାପାଣି

.......................................

ହିନ୍ଦୁସ୍ଥାନ ସମାଚାର / ବୀଣାପାଣି