ଭଦ୍ରକ, ୨୯ ଅପ୍ରେଲ (ହି.ସ.) - ମଣିଷ ବଂଚିଥିବା ବେଳେ ତା’ର ଭୋଟ୍ ପାଇଁ ରାଜନୈତିକ ଦଳଗୁଡ଼ିକ ମଧ୍ୟରେ ଯେତିକି ପ୍ରତିଯୋଗିତା ହୁଏ, ଆଶ୍ଚର୍ଯ୍ୟର କଥା ଯେ ମୃତ୍ୟୁ ପରେ ତା’ର ଶବ କିମ୍ବା କଙ୍କାଳକୁ ନେଇ ମଧ୍ୟ ସେତିକି ଘମାଘୋଟ ଲଢ଼େଇ ଚାଲେ। ବର୍ତମାନର ରାଜନୈତିକ ପରିବେଶରେ କଙ୍କାଳ ରାଜନୀତି ଏକ ନୂଆ ଅସ୍ତ୍ର ଭାବେ ଉଭା ହୋଇଛି। ଯାହା ସଭ୍ୟ ସମାଜ ପାଇଁ ଅନେକ ପ୍ରଶ୍ନବାଚୀ ସୃଷ୍ଟି କରୁଛି। କାହିଁକି ଏହି କଙ୍କାଳ ରାଜନୀତି! ଯେତେବେଳେ କୌଣସି ଅପ୍ରୀତିକର ପରିସ୍ଥିତିରେ ବା ପୁରୁଣା ମାମଲାରେ କଙ୍କାଳ ଉଦ୍ଧାର ହୁଏ, ସେତେବେଳେ ସେହି କଙ୍କାଳର ପରିଚୟ ଖୋଜିବା ଅପେକ୍ଷା ବିରୋଧୀଙ୍କୁ ଘେରିବାର ପ୍ରୟାସ ଅଧିକ ଦେଖିବାକୁ ମିଳୁଛି। ଦୋଷ ଲଦାଲଦିର ମାଧ୍ୟମ: ପ୍ରତିପକ୍ଷ ଦଳକୁ ଅପରାଧୀ ବା ହିଂସାକାରୀ ପ୍ରମାଣିତ କରିବା ପାଇଁ ପୁରୁଣା ଘଟଣାର କଙ୍କାଳକୁ ଖୋଳି ବାହାର କରାଯାଉଛି। ଭୋଟ୍ ବ୍ୟାଙ୍କ ଉପରେ ନଜର: କୌଣସି ନିର୍ଦ୍ଦିଷ୍ଟ ଗୋଷ୍ଠୀ ବା ଅଂଚଳରୁ କଙ୍କାଳ ମିଳିଲେ, ତାକୁ ନେଇ ଭାବପ୍ରବଣତା ସୃଷ୍ଟି କରିବା ଏବଂ ଭୋଟ୍ ହାତେଇବା ଏକ ପୁରୁଣା ରଣନୀତି ପାଲଟିଛି। ପ୍ରକୃତ ପ୍ରସଙ୍ଗରୁ ଦୃଷ୍ଟି ହଟାଇବା: ବେକାରୀ, ଦରଦାମ ବୃଦ୍ଧି କିମ୍ବା ବିକାଶମୂଳକ କାର୍ଯ୍ୟ ଅପେକ୍ଷା କାହାର ପାପ କଙ୍କାଳ ବାହାରିଲା, ସେଥିରେ ଚର୍ଚ୍ଚାକୁ ସୀମିତ ରଖିବା ଶାସକ ଓ ବିରୋଧୀ ଉଭୟଙ୍କ ପାଇଁ ସୁବିଧାଜନକ ହେଉଛି। କଙ୍କାଳକୁ ନେଇ ରାଜନୈତିକ କାଦୁଅ ଫିଙ୍ଗାଫିଙ୍ଗି ମଧ୍ୟରେ ପ୍ରକୃତ ପୀଡ଼ିତଙ୍କ ପରିବାର ଆଜି ବି ନ୍ୟାୟ ଅପେକ୍ଷାରେ ରହୁଛନ୍ତି। ଫୋରେନସିକ୍ ରିପୋର୍ଟ କିମ୍ବା ତଦନ୍ତ ପ୍ରକ୍ରିୟା ଶେଷ ହେବା ପୂର୍ବରୁ ରାଜନୈତିକ ମଂଚରେ ରାୟ ଶୁଣାଇ ଦିଆଯାଉଛି। ଏହା କେବଳ ମୃତକଙ୍କ ପ୍ରତି ଅସମ୍ମାନ ନୁହେଁ, ବରଂ ଗଣତନ୍ତ୍ରର ଏକ ବିକୃତ ଚିତ୍ର। ସାଧାରଣ ଜନତା ଏବେ ପଚାରୁଛନ୍ତି, କଙ୍କାଳକୁ ନେଇ ଆଉ ରାଜନୀତି କାହିଁକି’! ମୃତ୍ୟୁ ପରେ ଜଣେ ବ୍ୟକ୍ତିର ଅବଶେଷ କେବଳ ଏକ ପ୍ରମାଣ ହେବା ଉଚିତ୍, କୌଣସି ଦଳର ପ୍ରଚାର ପୋଷ୍ଟର ନୁହେଁ। ଯଦି ପ୍ରକୃତରେ ଅପରାଧ ଘଟିଛି, ତେବେ ତାହା ଆଇନ ଅନୁଯାୟୀ ସମାଧାନ ହେଉ, ରାଜନୀତିର କ୍ଷୁଧା ଏତେ ଭୟଙ୍କର ଯେ ତାହା ଶବକୁ ବି ଛାଡୁନାହିଁ। ସମୟ ଆସିଛି, ଜନସାଧାରଣ ଏହି ସଂକୀର୍ଣ୍ଣ ରାଜନୀତିକୁ ବୁଝିବା ଦରକାର ଏବଂ ନେତାମାନେ କଙ୍କାଳ ବଦଳରେ ବିକାଶର କଳେବର’ ଉପରେ ଧ୍ୟାନ ଦେବା ଉଚିତ୍।
ହିନ୍ଦୁସ୍ଥାନ ସମାଚାର / ପ୍ରମୋଦ
---------------
ହିନ୍ଦୁସ୍ଥାନ ସମାଚାର / ପ୍ରମୋଦ କୁମାର ରାୟ
