ଭୋପାଳ, ୩୦ ଅପ୍ରେଲ (ହି.ସ.)- ବୁଧବାର ରାତିରେ ମଧ୍ୟପ୍ରଦେଶର ଧାର ଜିଲ୍ଲାର ଇନ୍ଦୋର-ଅହମ୍ମଦାବାଦ ଜାତୀୟ ରାଜପଥରେ ଏକ ସଡ଼କ ଦୁର୍ଘଟଣାରେ ପ୍ରାଣ ହରାଇଥିବା ୧୬ ଜଣଙ୍କୁ ଗୁରୁବାର ସକାଳେ ବିଭିନ୍ନ ଶ୍ମଶାନରେ ଅନ୍ତିମ ସଂସ୍କାର କରାଯାଇଥିଲା । ମୃତକଙ୍କ ମଧ୍ୟରେ ନୟାପୁରାର ନଅ ଜଣ, ସେମଲୀପୁରାର ୫ ଜଣ ଏବଂ ରାମପୁରାର ଦୁଇ ଜଣ ଥିଲେ । ଏହି ଘଟଣା ପରେ ପରିବାର ଲୋକଙ୍କ ମଧ୍ୟରେ ଶୋକର ଛାୟା ଖେଳିଯାଇଛି । ଏହି ତିନୋଟି ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି ।

ବୁଧବାର ରାତିରେ ଧାର ଜିଲ୍ଲାର ଇନ୍ଦୋର-ଅହମ୍ମଦାବାଦ ଜାତୀୟ ରାଜପଥରେ ଚିକଲିଆ ଫାଟା ନିକଟରେ ଟାୟାର ଫାଟି ଯିବାରୁ ଶ୍ରମିକମାନଙ୍କୁ ନେଇ ଯାଉଥିବା ଏକ ଦ୍ରୁତଗାମୀ ପିକ୍-ଅପ୍ ଗାଡି ନିୟନ୍ତ୍ରଣ ବାହାରକୁ ଚାଲିଯାଇଥିଲା ଏବଂ ତିନିରୁ ଚାରି ଥର ଓଲଟି ଡିଭାଇଡର୍ ଅତିକ୍ରମ କରି ସ୍କର୍ପିଓକୁ ଧକ୍କା ଦେଇଥିଲା । ଏହି ଦୁର୍ଘଟଣାରେ ଛଅ ଜଣ ଶିଶୁଙ୍କ ସମେତ ୧୬ ଜଣଙ୍କର ମୃତ୍ୟୁ ଘଟିଥିଲା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଉତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏହି ଘଟଣାରେ ଦୁଃଖ ପ୍ରକାଶ କରିଛନ୍ତି ଏବଂ ମୃତ ଏବଂ ଆହତଙ୍କ ପରିବାରକୁ ଆର୍ଥିକ ସହାୟତା ଘୋଷଣା କରିଛନ୍ତି ।

ପୋଲିସର କହିବା ଅନୁଯାୟୀ, ପିକ୍-ଅପ୍ ଗାଡ଼ିରେ ୪୬ ଜଣ ଶ୍ରମିକ ଯାତ୍ରା କରୁଥିଲେ । ଗାଡ଼ିଟି ଘଂଟାପ୍ରତି ପ୍ରାୟ ୧୦୦ କି. ମି. ବେଗରେ ଚାଲିଥିଲା । ଏକ ଟାୟାର ଫାଟିବା ଫଳରେ ଏହି ଦୁର୍ଘଟଣା ଘଟିଥିଲା । ପଥଚାରୀ ଏବଂ ସ୍ଥାନୀୟ ଲୋକମାନେ ତୁରନ୍ତ ଘଟଣାସ୍ଥଳରେ ପହଂଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ଏବଂ ଫସି ରହିଥିବା ଲୋକଙ୍କୁ ଉଦ୍ଧାର କରିଥିଲେ । ସମସ୍ତ ଆହତଙ୍କୁ ଆମ୍ବୁଲାନ୍ସ ସହାୟତାରେ ଧାର ଜିଲ୍ଲା ଡାକ୍ତରଖାନାକୁ ନିଆଯାଇଥିଲା ।

ଇନ୍ଦୋର କମିଶନର ସୁଦାମ ଖାଡ଼େ କହିଛନ୍ତି ଯେ ପିକ୍ ଅପ୍ ଗାଡ଼ିରେ ପ୍ରାୟ ୪୬ ଜଣ ଲୋକ ଥିଲେ । ଆହତଙ୍କ ଚିକିତ୍ସା ପାଇଁ ପ୍ରଶାସନ ବ୍ୟବସ୍ଥା କରିଛି । ଗୁରୁତର ଆହତ ସାତ ଜଣଙ୍କୁ ଉନ୍ନତ ଚିକିତ୍ସା ପାଇଁ ଇନ୍ଦୋରକୁ ପଠାଯାଇଛି । ପ୍ରାୟ ୧୫ ଜଣ ଆହତ ସ୍ଥାନୀୟ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ଅନ୍ୟ ଛଅ ଜଣ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଛନ୍ତି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ