ବଲାଙ୍ଗିର, ୦୭ ଏପ୍ରିଲ୍ ( ହି.ସ.) - ଓଡ଼ିଆ ପକ୍ଷ-୨୦୨୬ ପାଳନ ଅବସରରେ ଜିଲ୍ଲା ଶିକ୍ଷା କାର୍ଯ୍ୟାଳୟ ତରଫରୁ ସ୍ଥାନୀୟ ପ୍ରାକ୍ଟିସିଂ ବିଦ୍ୟାଳୟ ଠାରେ 'ଶିଶୁ କଥା ଦିବସ' ପାଳିତ ହୋଇଯାଇଛି। ଜିଲ୍ଲା ଶିକ୍ଷା ଅଧିକାରୀ ପ୍ରଦୀପ କୁମାର ନାଗ ଙ୍କ ପ୍ରତ୍ୟକ୍ଷ ତତ୍ୱାବଧାନରେ ଏହି କାର୍ଯ୍ୟକ୍ରମ ଆୟୋଜନ ହୋଇଥିଲା। ବିଦ୍ୟାଳୟ ର ପ୍ରଧାନ ଶିକ୍ଷୟତ୍ରୀ ସସ୍ମିତା ନାଗ ଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମ ରେ ମୁଖ୍ୟ ଅତିଥି ଭାବେ ବଲାଙ୍ଗୀର ମୁଖ୍ୟ ବିକାଶ ଅଧିକାରୀ ତଥା କାର୍ଯ୍ୟନିର୍ବାହୀ ଅଧିକାରୀ ତରଣୀ ସୁନା,ନିମନ୍ତ୍ରିତ ଅତିଥି ଭାବେ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ରୀନା କୁମାରୀ ବେହେରା,ସେବାଶ୍ରୀ ଭୋଇ,ସମ୍ମାନୀତ ଅତିଥି ଭାବେ ସିଆରସିସି ଗିରିଶ ବେହେରା ଯୋଗ ଦେଇଥିଲେ।ଶିଶୁ ବାଟିକା ର ୧୫ଜଣ ଶିଶୁଙ୍କୁ ଛବିଲ ମଧୁ ବର୍ଣ୍ଣବୋଧ ପୁସ୍ତକ ଓ ୩୫ଜଣ ପ୍ରଥମରୁ ପଂଚମ ଶ୍ରେଣୀର ଛାତ୍ରଛାତ୍ରୀଙ୍କୁ ଶିଶୁଲେଖା ପୁସ୍ତକ ମୁଖ୍ୟ ଅତିଥି ସୁନା ବଂଟନ କରିଥିଲେ।ନିଜ ବକ୍ତବ୍ୟରେ ଶ୍ରୀ ସୁନା ଶିଶୁ ମାନେ ହେଉଛନ୍ତି ଆମ ସମାଜର ସବୁଠାରୁ ମୂଲ୍ୟବାନ ସମ୍ପଦ।ଶିଶୁମାନଙ୍କ ର ଭାଷା ଓ ଚିନ୍ତନ ଶକ୍ତିକୁ ଉନ୍ନତ କରିବା ଆମର ପ୍ରଥମ କର୍ତବ୍ୟ ବୋଲି କହିବା ସହ ତାଙ୍କର ଶିକ୍ଷା,ସଂସ୍କାର ଓ ଚିନ୍ତାଧାରା ଉପରେ ଦେଶର ଭବିଷ୍ୟତ ନିର୍ଭର କରେ ବୋଲି କହିଥିଲେ। ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ରୀନା କୁମାରୀ ବେହେରା ନିଜ ବକ୍ତବ୍ୟରେ ଏହି ଦିବସ ପାଳନ ଅବସରରେ ବର୍ଣ୍ଣବୋଧ ଓ ଶିଶୁଲେଖା ପୁସ୍ତକ ବଂଟନ ଛାତ୍ରଛାତ୍ରୀଙ୍କ ମନରେ ନୂତନ ଆଗ୍ରହ ସୃଷ୍ଟି କରିବା ସହ ତାଙ୍କର ଲେଖନ କୌଶଳ,ଚିନ୍ତନ ଶକ୍ତି ଓ ସୃଜନଶୀଳତାକୁ ଆହୁରି ଉନ୍ନତ କରିବ ବୋଲି କହିଥିଲେ।ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଶ୍ରୀମତୀ ବେହେରା ନିଜ ବକ୍ତବ୍ୟରେ ଜୀବନରେ ସଫଳତା ପାଇଁ ଶ୍ରମ,ଶିଷ୍ଟାଚାର ଓ ସତ୍ୟ ନିଷ୍ଠା ଆବଶ୍ୟକ ବୋଲି କହିବା ସହ ଶିଶୁମାନଙ୍କ ମନୋବୃତିକୁ ବୁଝି ସେମାନଙ୍କୁ ଭଲ ଦିଗରେ ପରିଚାଳନା କରନ୍ତୁ ବୋଲି ଉପସ୍ଥିତ ସମସ୍ତ ଶିକ୍ଷୟତ୍ରୀ ତଥା ଅଭିଭାବକ ଅଭିଭାବିକା ମାନଙ୍କୁ କହିଥିଲେ। କାର୍ଯ୍ୟକ୍ରମ ରେ ବିଦ୍ୟାଳୟ ର ଶିକ୍ଷୟତ୍ରୀ ଯମୁନାବାଲା ମଲ୍ଲିକ, ମୀନା ପଧାନ,ମମତା ରଥ, ଯୋଗମୟୀ ଗେଜୋ,ପାଚିକା ଜୟା ପୋଢ଼,ବିଦ୍ୟାଳୟ ପରିଚାଳନା କମିଟି ର ସମସ୍ତ ସଭ୍ୟ ସହଯୋଗ କରିଥିଲେ।

ହିନ୍ଦୁସ୍ଥାନ ସମାଚାର / ଗୋପବନ୍ଧୁ