ଝାରସୁଗୁଡା,୧୫ ମଇ (ହି.ସ.)- ଝାରସୁଗୁଡାରେ ପ୍ରଥମଥର ପାଇଁ “ଝାରସୁଗୁଡା ପ୍ରିମିୟମ ଲିଗ୍” ନାମରେ ଏକ ବୃହତ୍ ଡେ-ନାଇଟ୍ କ୍ରିକେଟ୍ ପ୍ରତିଯୋଗିତାର ଆୟୋଜନ କରାଯାଉଛି। ଝାରସୁଗୁଡା ପ୍ରିମିୟମ ଲିଗ୍ ଆସନ୍ତା ୧୬ ରୁ ଆରମ୍ଭ ହେବ। ଆଜି ସ୍ଥାନୀୟ ଏକ ହୋଟେଲରେ ଝାରସୁଗୁଡା ପ୍ରୀମୀୟର ଲିଗ୍ ଆୟାଜକ ତରଫରୁ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି । ଏଥିରେ ରେଶବ ସିଂ, ୟାସିନ କ୍ୟୁରେସି, ପୁଷ୍କର ରାଜ ପ୍ରତିକ ଯାଦବ ଓ ଚନ୍ଦ୍ର କିରଣ ଉପସ୍ଥିତ ଥିଲେ।

ଏହି ପ୍ରତିଯୋଗିତାରେ ମୋଟ ୮ଟି ଟିମ୍ ଅଂଶଗ୍ରହଣ କରୁଥିବା ବେଳେ ୧୫ ଜଣିଆ ଦଳ ଗଠନ କରାଯାଇଛି। ସମସ୍ତ ଖେଳାଳି ଝାରସୁଗୁଡା ଜିଲ୍ଲାର ହେବା ସହ ଦଳ ପିଛା ଝାରସୁଗୁଡା ବାହାରରୁ ସର୍ବାଧିକ ୩ ଜଣ ଖେଳାଳିଙ୍କୁ ରଖିବାକୁ ଅନୁମତି ଦିଆଯାଇଛି। ପ୍ରତିଯୋଗିତାର ପ୍ରଥମ ମ୍ୟାଚ୍ ଓ ଫାଇନାଲ୍ ମ୍ୟାଚ୍ ରାତିରେ ଅନୁଷ୍ଠିତ ହେବା ସହ ଫାଇନାଲ୍ ମ୍ୟାଚ୍ ୨୪ ତାରିଖରେ ଖେଳାଯିବ। ଅନ୍ୟ ସମସ୍ତ ମ୍ୟାଚ୍ ଡେ-ନାଇଟ୍ ଫର୍ମାଟରେ ହେବ। ମ୍ୟାଚ୍ଗୁଡିକ ଦୁପର ୩.୩୦ ଓ ସନ୍ଧ୍ୟା ୭.୩୦ରେ ଆରମ୍ଭ ହେବ।

ଆୟୋଜକମାନେ କହିଛନ୍ତି ଯେ, ଜିଲ୍ଲାର ଲୁକ୍କାୟିତ କ୍ରିକେଟ୍ ପ୍ରତିଭାକୁ ଆଗକୁ ଆଣିବା ହେଉଛି ଏହି ଲିଗ୍ ର ପ୍ରମୁଖ ଉଦ୍ଦେଶ୍ୟ। ଆଇପିଏଲ୍ ଢଂଗରେ ଖେଳାଳିମାନଙ୍କର ଅକ୍ସନ୍ ମଧ୍ୟ କରାଯାଇଥିଲା। ଏଥିପାଇଁ ପ୍ରାୟ ୨୦୦ ଜଣ ଖେଳାଳି ଅଂଶଗ୍ରହଣ କରିଥିଲେ। ଏହି ଅକ୍ସନ୍ ରେ ସନ୍ତୋଷ ଯାଦବ ସବୁଠାରୁ ମହଙ୍ଗା ଖେଳାଳି ଭାବେ ଆର୍ୟନ ଡିସି ଦଳରେ ସ୍ଥାନ ପାଇଛନ୍ତି। ଆଇପିଏଲ୍ ସମସ୍ତ ନିୟମକୁ ଅନୁସରଣ କରି ଏହି ଲିଗ୍ ଆୟୋଜନ କରାଯାଉଥିବା ଆୟୋଜକମାନେ ସୂଚନା ଦେଇଛନ୍ତି।

ହିନ୍ଦୁସ୍ଥାନ ସମାଚାର / ସଞ୍ଜୟ