ଗୌହାଟୀ, ୨୦ ମଇ (ହି.ସ.)- ଗୌହାଟୀର ଗଡ଼ଚୁକ୍ ଅଂଚଳରୁ ମାନବ ତସ୍କରୀର ଏକ ଅତ୍ୟନ୍ତ ଉଦ୍ବେଗଜନକ ମାମଲା ସାମ୍ନାକୁ ଆସିଛି । ଅଭିଯୋଗ ହୋଇଛି ଯେ, ଜଣେ ଯୁବତୀଙ୍କୁ ପ୍ରଥମେ ପ୍ରେମ ଜାଲରେ ଫସାଇ ଅପହରଣ କରାଯାଇଥିଲା ଏବଂ ପରେ ତାଙ୍କୁ ରାଜ୍ୟ ବାହାରକୁ ନେଇଯାଇ ବିକ୍ରି କରାଯାଇଥିଲା । ଏହି ଘଟଣା ଆସାମରେ ମହିଳା ଏବଂ ଯୁବତୀମାନଙ୍କ ସୁରକ୍ଷାକୁ ନେଇ ଗମ୍ଭୀର ପ୍ରଶ୍ନ ଉଠାଇଛି ।

ପୋଲିସ୍ ସୂତ୍ର ଅନୁଯାୟୀ, ମାନବ ଚୋରା ଚାଲାଣକାରୀ ଗ୍ୟାଙ୍ଗ ପ୍ରଥମେ ଝିଅକୁ ବିହାର ନେଇଯାଇଥିଲା, ଯେଉଁଠାରେ ତାଙ୍କୁ କିଛି ଦିନ ପାଇଁ ଏକ ବେଶ୍ୟାଶାଳାରେ ରଖାଯାଇଥିଲା । ଏହାପରେ ଝିଅଟିକୁ ରାଜସ୍ଥାନରେ ବିକ୍ରି କରିଦିଆଯାଇଥିଲା । ତଦନ୍ତ ସମୟରେ ପୋଲିସ ବାଳିକାକୁ ଚୋରା ଚାଲାଣକାରୀଙ୍କ କବଳରୁ ସୁରକ୍ଷିତ ଭାବେ ଉଦ୍ଧାର କରିଥିଲା ଏବଂ ଜଣେ ମହିଳାଙ୍କ ସମେତ ତିନି ଜଣ ଅଭିଯୁକ୍ତଙ୍କୁ ଗିରଫ କରିଥିଲା ।

ପ୍ରେମ ସମ୍ପର୍କ ରଖିବା ବାହାନା କରି ନାବାଳିକାକୁ ଗୌହାଟୀର କାଟାବାଡ଼ି ଅଂଚଳରୁ ନେଇଯାଇଥିବା ସୂଚନା ମିଳିଛି । ପୀଡ଼ିତାଙ୍କ ମାଆଙ୍କ ଦ୍ୱାରା ଦାଖଲ ହୋଇଥିବା ଏଫ୍. ଆଇ. ଆର. ଆଧାରରେ କାର୍ଯ୍ୟାନୁଷ୍ଠାନ ଗ୍ରହଣ କରି ପୋଲିସ ମୁଖ୍ୟ ଅଭିଯୁକ୍ତ ଅବୁ ବକ୍କର ସିଦ୍ଦିକିଙ୍କୁ କାମରୂପ ଜିଲ୍ଲାର ଛାୟଗାଓଁରୁ ଗିରଫ କରିଛି । ବିହାରର ଅଙ୍କିତ କୁମାର ଏବଂ କାଜଲି କୁମାରଙ୍କୁ ମଧ୍ୟ ଅଟକ ରଖାଯାଇଛି ।

ଅନୁସନ୍ଧାନରୁ ଜଣାପଡ଼ିଛି ଯେ, ମାନବ ଚାଲାଣରେ ସମ୍ପୃକ୍ତ ଗ୍ୟାଙ୍ଗମାନେ ଯୁବତୀମାନଙ୍କୁ ପ୍ରେମ, ବିବାହ ଏବଂ ଉନ୍ନତ ଜୀବନର ସ୍ୱପ୍ନ ଦେଖାଇ ପ୍ରଲୋଭିତ କରୁଛନ୍ତି । ଗିରଫ ଅଭିଯୁକ୍ତ ଏକ ବୃହତ ଆନ୍ତଃରାଜ୍ୟ ମାନବ ଚାଲାଣ ନେଟୱାର୍କ ସହିତ ଜଡିତ ଥାଇପାରେ ବୋଲି ପୋଲିସ ସନ୍ଦେହ କରୁଛି । ଏହି ଘଟଣାରେ ଅଧିକ ତଦନ୍ତ ଜାରି ରହିଛି ଏବଂ ଅନ୍ୟ ଅଭିଯୁକ୍ତମାନଙ୍କୁ ଧରିବା ପାଇଁ ଖୋଜାଖୋଜି ଚାଲିଛି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ