ନୂଆଦିଲ୍ଲୀ, ୨୬ ମଇ (ହିସ): ସମୁଦ୍ର ପଥରେ ଶ୍ରୀଲଙ୍କାକୁ ହସିସ୍ (ଏକ ପ୍ରକାରର ନିଶାଦ୍ରବ୍ୟ) ଏବଂ ମେଥାମ୍ଫେଟାମାଇନ୍ (ଆଇସ୍ ଡ୍ରଗ୍ସ) ଚୋରାଚାଲାଣ କରୁଥିବା ଏକ ଗ୍ୟାଙ୍ଗ ବିରୋଧରେ ପ୍ରବର୍ତନ ନିର୍ଦ୍ଦେଶାଳୟ (ଇଡି) ଚେନ୍ନାଇ ଏବଂ ମଦୁରାଇର ପାଂଚଟି ସ୍ଥାନରେ ଚଢାଉ କରିଛି। ତଦନ୍ତରେ ପ୍ରାୟ ୨୫୮ କୋଟି ଟଙ୍କାର ଡ୍ରଗ୍ସ ଚାଲାଣ ହୋଇଥିବା ଜଣାପଡ଼ିଛି।
ଇଡି କହିଛି ଯେ ଜନ୍ ବ୍ରିଟୋ ଏବଂ ଅନ୍ୟମାନଙ୍କ ବିରୁଦ୍ଧରେ ରାଜସ୍ୱ ଗୁଇନ୍ଦା ନିର୍ଦ୍ଦେଶାଳୟ ଦ୍ୱାରା ପଞ୍ଜିକୃତ ଦୁଇଟି ଅପରାଧିକ ମାମଲା ଉପରେ ଏହି ମାମଲା ଆଧାରିତ। ଏନଡିପିଏସ୍ ଆଇନ ଏବଂ କଷ୍ଟମ୍ସ ଆଇନ ଅନୁଯାୟୀ ଏହି ମାମଲାରେ କାର୍ଯ୍ୟାନୁଷ୍ଠାନ ନିଆଯାଇଥିଲା।
ତଦନ୍ତକାରୀ ସଂସ୍ଥା ଅନୁଯାୟୀ, ଏହି ଗ୍ୟାଙ୍ଗ ସମୁଦ୍ର ପଥରେ ଶ୍ରୀଲଙ୍କାକୁ ବିପୁଳ ପରିମାଣର ହସିସ୍ ଏବଂ ମେଥାମ୍ଫେଟାମାଇନ୍ ଚୋରାଚାଲାଣ କରିଥିଲା। ହସିସ୍ ହେଉଛି ଗଂଜେଇରୁ ପ୍ରାପ୍ତ ଏକ ନିଶାଦ୍ରବ୍ୟ। ଇଡି ଅନୁଯାୟୀ, ଏହି ଗ୍ୟାଙ୍ଗ ୯୯ କିଲୋଗ୍ରାମ ହସିସ୍ (ଆନୁମାନିକ ବଜାର ମୂଲ୍ୟ ପ୍ରାୟ ୧୦୮ କୋଟି ଟଙ୍କା) ଏବଂ ୩୭.୫ କିଲୋଗ୍ରାମ ମେଥାମ୍ଫେଟାମାଇନ୍ (ଆନୁମାନିକ ବଜାର ମୂଲ୍ୟ ପ୍ରାୟ ୧୫୦ କୋଟି ଟଙ୍କା) ଚୋରାଚାଲାଣ କରିବାକୁ ଚେଷ୍ଟା କରିଥିଲା।
----------------------------
---------------
ହିନ୍ଦୁସ୍ଥାନ ସମାଚାର / ଗଗନ