ଝାରସୁଗୁଡ଼ା, ୨୬ ମଇ (ହି.ସ.)- ଜିଲ୍ଲାରେ ବେଆଇନ ଦେଶୀ ମଦ ପ୍ରସ୍ତୁତି ଓ ଚୋରା ଚାଲାଣ ବିରୋଧରେ ଜିଲ୍ଲା ପୋଲିସ ପକ୍ଷରୁ ଏକ ବଡ଼ ଧରଣର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଜିଲ୍ଲା ଆରକ୍ଷୀ ଅଧୀକ୍ଷକ ଜି.ଆର. ରାଘବେନ୍ଦ୍ରଙ୍କ ପ୍ରତ୍ୟକ୍ଷ ନେତୃତ୍ୱରେ ଗଠିତ ଏକ ସ୍ୱତନ୍ତ୍ର ଟିମ୍ ବିଭିନ୍ନ ବେଆଇନ ମଦ ପ୍ରସ୍ତୁତି କେନ୍ଦ୍ର ଓ ଆଡ୍ଡା ଉପରେ ଅତର୍କିତ ଚଢ଼ଉ କରିଛି। ଏହି ଅପରେସନରେ ବିପୁଳ ପରିମାଣର ଦେଶୀ ରନ୍ଧା ମଦ, କଞ୍ଚାମାଲ ଏବଂ ଚୋରା ଚାଲାଣରେ ବ୍ୟବହୃତ ଗାଡ଼ି ଜବତ କରାଯାଇଛି।

ଏହି ସ୍ୱତନ୍ତ୍ର ଚଢ଼ଉ ସମୟରେ ପୋଲିସ ସମୁଦାୟ ୮୭୦ ଲିଟର ବେଆଇନ ଦେଶୀ ରନ୍ଧା ମଦ ଜବତ କରିଛି। ଏହା ସହିତ ମଦ ପ୍ରସ୍ତୁତି ପାଇଁ ରଖାଯାଇଥିବା ୩୦ କ୍ୱିଣ୍ଟାଲରୁ ଅଧିକ ମହୁଲ ପୋଚକୁ ପୋଲିସ ନିଜ ନିୟନ୍ତ୍ରଣକୁ ନେଇଥିଲା। ବେଆଇନ ମଦ କାରବାରର ମୂଳୋତ୍ପାଟନ କରିବା ପାଇଁ ପୋଲିସ ତତ୍କାଳ ପଦକ୍ଷେପ ସ୍ୱରୂପ ଭାଟିଗୁଡ଼ିକୁ ଭାଙ୍ଗିବା ସହ ଘଟଣାସ୍ଥଳରେ ୨୦ କ୍ୱିଣ୍ଟାଲରୁ ଅଧିକ ମହୁଲ ପୋଚ ଓ ମଦ ପ୍ରସ୍ତୁତି ସାମଗ୍ରୀକୁ ସମ୍ପୂର୍ଣ୍ଣ ରୂପେ ନଷ୍ଟ କରିଦେଇଛି।

ମଦ ମାଫିଆମାନେ ଚୋରା ଚାଲାଣ ପାଇଁ ବ୍ୟବହାର କରୁଥିବା ଗାଡ଼ିଗୁଡ଼ିକୁ ମଧ୍ୟ ପୋଲିସ ଜବତ କରିବାରେ ସଫଳ ହୋଇଛି। ଚଢ଼ଉ ବେଳେ ଗୋଟିଏ ୪ ଚକିଆ ଯାନ (କାର୍/ଭ୍ୟାନ୍) ଏବଂ ୪ଟି ମୋଟରସାଇକେଲ୍ (୨ ଚକିଆ ଯାନ) ଜବତ କରାଯାଇଛି। ଜବତ ହୋଇଥିବା ଗାଡ଼ି ଗୁଡ଼ିକ ଖୁବ୍ ଶୀଘ୍ର ନିଲାମ କରାଯିବ ବୋଲି ଜିଲ୍ଲା ଅବକାରୀ ବିଭାଗ ସୂଚନା ଦେଇଛନ୍ତି। ଏହା ବ୍ୟତୀତ ମଦ ରାନ୍ଧିବା ପାଇଁ ବ୍ୟବହୃତ ବିପୁଳ ପରିମାଣର ପାତ୍ର, ଉପକରଣ ଏବଂ ମଦ ପ୍ରସ୍ତୁତିରେ ବ୍ୟବହାର କରାଯାଉଥିବା ଅନ୍ୟାନ୍ୟ ନିଷିଦ୍ଧ କେମିକାଲ୍ ଓ ସାମଗ୍ରୀକୁ ପୋଲିସ ଜବତ କରିଛି। ଜିଲ୍ଲାରେ ବେଆଇନ ନିଶା କାରବାରକୁ କୌଣସି ପରିସ୍ଥିତିରେ ପ୍ରଶ୍ରୟ ଦିଆଯିବ ନାହିଁ ଏବଂ ଆଗକୁ ଏହିପରି ଚଢ଼ଉ ଆହୁରି ଜୋରଦାର କରାଯିବ ବୋଲି କୁହାଯାଇଛି। ଏହି ମାମଲାରେ ସମ୍ପୃକ୍ତ ଥିବା ଅଭିଯୁକ୍ତମାନଙ୍କ ବିରୁଦ୍ଧରେ ଓଡ଼ିଶା ଅବକାରୀ ଆଇନ ଅନୁଯାୟୀ ମାମଲା ରୁଜୁ କରାଯାଇ କୋର୍ଟ ଚାଲାଣ କରାଯାଉଛି ଏବଂ ଏହି ର଼୍ୟାକେଟ୍ ପଛରେ ଥିବା ଅନ୍ୟ ଅପରାଧୀମାନଙ୍କୁ ଗିରଫ କରିବା ପାଇଁ ପୋଲିସ ତଦନ୍ତ ଜାରି ରଖିଛି।

ହିନ୍ଦୁସ୍ଥାନ ସମାଚାର / ସଞ୍ଜୟ