ହିନ୍ଦୁସ୍ଥାନ ସମାଚାରର କାର୍ଯ୍ୟକ୍ରମରେ କହିଲେ ସଂଘର ଅଖିଳ ଭାରତୀୟ ପ୍ରଚାର ପ୍ରମୁଖ

୧୯ ମାସ ମଧ୍ୟରେ ଜରୁରୀକାଳର ସମାପ୍ତି ଭାରତୀୟ ସମାଜର ଗଣତାନ୍ତ୍ରିକ ଚେତନାର ବିଜୟ ଥିଲା ବୋଲି କହିଲେ

ଗଣତନ୍ତ୍ର, ସମ୍ବିଧାନ ଓ ନାଗରିକ ସ୍ୱାଧୀନତାର ସୁରକ୍ଷା ପାଇଁ ସଂଘର୍ଷକୁ ଜାତୀୟ କର୍ତ୍ତବ୍ୟ ବୋଲି କଲେ ବର୍ଣ୍ଣନା

ପାଟନା, ୨୪ ଜୁନ୍ (ହି.ସ.) : ରାଷ୍ଟ୍ରୀୟ ସ୍ୱୟଂସେବକ ସଂଘ (ଆରଏସଏସ)ର ଅଖିଳ ଭାରତୀୟ ପ୍ରଚାର ପ୍ରମୁଖ ସୁନୀଲ ଆମ୍ବେକର କହିଛନ୍ତି ଯେ, ଜରୁରୀକାଳୀନ ପରିସ୍ଥିତିକୁ ୫୦ ବର୍ଷରୁ ଅଧିକ ସମୟ ବିତିଯାଇଥିଲେ ମଧ୍ୟ ଏହାର ପ୍ରାସଙ୍ଗିକତା ଆଜି ମଧ୍ୟ ରହିଛି। ଗଣତନ୍ତ୍ର, ମତପ୍ରକାଶ କରିବାର ସ୍ୱାଧୀନତା, ସମ୍ବିଧାନ, ଭାରତୀୟ ସଂସ୍କୃତି ଓ ପରମ୍ପରାକୁ ଜୀବନ୍ତ ରଖିବା ପାଇଁ ସେହି ସଂଘର୍ଷର ନିରନ୍ତର ସ୍ମରଣ ଆବଶ୍ୟକ ବୋଲି ସେ ମତ ପ୍ରକାଶ କରିଛନ୍ତି। ସମାଜରେ ସଦା ଏପରି ଏକ ଶକ୍ତି ରହିବା ଦରକାର, ଯାହା ଏକଛତ୍ରବାଦୀ ପ୍ରବୃତ୍ତିକୁ ନିୟନ୍ତ୍ରଣ କରିପାରିବ ବୋଲି ସେ କହିଛନ୍ତି।

ବୁଧବାର ପାଟନାର ମିଠାପୁର ଇନ୍ଷ୍ଟିଟ୍ୟୁସନାଲ୍ ଏରିଆରେ ହିନ୍ଦୁସ୍ଥାନ ସମାଚାର ପକ୍ଷରୁ ଆୟୋଜିତ ‘ଜରୁରୀକାଳୀନ ପରିସ୍ଥିତିର ୫୦ ବର୍ଷ : ବିହାର ଆନ୍ଦୋଳନ ଓ ଜରୁରୀକାଳ’ ଶୀର୍ଷକ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ସୁନୀଲ ଆମ୍ବେକର କହିଥିଲେ ଯେ, ଜରୁରୀକାଳୀନ ପରିସ୍ଥିତିର ସମୟ କେବଳ ଇତିହାସର ଏକ ଅଧ୍ୟାୟ ନୁହେଁ, ବରଂ ଗଣତନ୍ତ୍ରର ସୁରକ୍ଷା ପାଇଁ ସମାଜର ସଚେତନତାର ସର୍ବୋତ୍ତମ ଉଦାହରଣ। ଆଗାମୀ ପିଢ଼ିକୁ ସେହି ସମୟର ସଂଘର୍ଷ ଓ ବଳିଦାନ ସମ୍ପର୍କରେ ଅବଗତ କରାଇବା ଅତ୍ୟନ୍ତ ଜରୁରୀ ବୋଲି ସେ କହିଥିଲେ।

ସେ କହିଥିଲେ ଯେ, ରାଷ୍ଟ୍ରୀୟ ସ୍ୱୟଂସେବକ ସଂଘ କୌଣସି ରାଜନୈତିକ ଦଳ ନଥିଲା, ତଥାପି ଜରୁରୀକାଳୀନ ପରିସ୍ଥିତି ସମୟରେ ଏହା ଉପରେ ପ୍ରତିବନ୍ଧକ ଲାଗୁ କରାଯାଇଥିଲା। ସ୍ୱାଧୀନତା ପରଠାରୁ କିଛି ରାଜନୈତିକ ଶକ୍ତି ସଂଘକୁ ନିଜର ପ୍ରତିଦ୍ୱନ୍ଦ୍ୱୀ ଭାବେ ଦେଖୁଥିଲେ ଏବଂ ଏହାକୁ ସମାପ୍ତ କରିବାର ମାନସିକତା ପୂର୍ବରୁ ରହିଥିଲା। ତାଙ୍କ ମତରେ, ସଂଘ ଉପରେ ଲାଗିଥିବା ପ୍ରତିବନ୍ଧକ କେବଳ ପ୍ରଶାସନିକ କାରଣରୁ ନୁହେଁ, ବରଂ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଥିଲା।

ସେ କହିଛନ୍ତି ଯେ ବିଶ୍ୱର ଅନେକ ଦେଶରେ ଏକଛତ୍ରବାଦ ଦଶକ ଧରି ଚାଲିଥିଲା, କିନ୍ତୁ ଭାରତରେ ସମାଜର ସଚେତନତା ଏବଂ ଗଣତାନ୍ତ୍ରିକ ଚେତନାର କାରଣରୁ ମାତ୍ର ୧୯ ମାସ ମଧ୍ୟରେ ଜରୁରୀକାଳ ସମାପ୍ତ ହୋଇଥିଲା। ବଡ଼ ବଡ଼ ରାଜନୈତିକ ନେତାମାନେ କାରାଗାରରେ ଥିବା ସତ୍ତ୍ୱେ ସଂଘର ସାଧାରଣ କାର୍ଯ୍ୟକର୍ତ୍ତା ଓ ଗଣତନ୍ତ୍ର ସମର୍ଥକ ନାଗରିକମାନେ ସଂଘର୍ଷ ଜାରି ରଖିଥିଲେ। ଏହି କାରଣରୁ ଗଣତନ୍ତ୍ରର ପୁନଃସ୍ଥାପନ ସମ୍ଭବ ହୋଇଥିଲା। ସେ କହିଛନ୍ତି ଯେ ଯଦି ସମାଜ ସଚେତନ ନ ଥାଆନ୍ତା, ତେବେ ଭାରତ ମଧ୍ୟ ଦୀର୍ଘ ସମୟ ପର୍ଯ୍ୟନ୍ତ ଏକଛତ୍ରବାଦର ଶିକାର ହୋଇପାରୁଥାନ୍ତା।

ଆମ୍ବେକର ଆହୁରି କହିଛନ୍ତି ଯେ ସଂଘର ସଂଘର୍ଷ କୌଣସି ସତ୍ତା ପ୍ରାପ୍ତି କିମ୍ବା କେବଳ ସଂଘ ଉପରେ ଲାଗିଥିବା ପ୍ରତିବନ୍ଧକ ହଟାଇବା ପାଇଁ ନଥିଲା, ବରଂ ଏହା ସମ୍ବିଧାନ, ଗଣତନ୍ତ୍ର ଓ ନାଗରିକ ସ୍ୱାଧୀନତାର ସୁରକ୍ଷା ପାଇଁ ଥିଲା। ଏହା ସତ୍ତା ପରିବର୍ତ୍ତନର ନୁହେଁ, ବରଂ ଗଣତାନ୍ତ୍ରିକ ବ୍ୟବସ୍ଥାକୁ ବଞ୍ଚାଇ ରଖିବାର ସଂଘର୍ଷ ଥିଲା। ସେ କହିଛନ୍ତି ଯେ ଜରୁରୀକାଳ କେବଳ ରାଜନୈତିକ ସଂଘର୍ଷ ନୁହେଁ, ବରଂ ଜାତୀୟ ଚରିତ୍ରର ପରୀକ୍ଷା ଥିଲା। ଏହା ନିର୍ଣ୍ଣୟ କରିବାର ସଂଘର୍ଷ ଥିଲା ଯେ ଭାରତ ଏକଛତ୍ରବାଦ ଦିଗରେ ଯିବ କି ଗଣତାନ୍ତ୍ରିକ ମୂଲ୍ୟବୋଧ ସହିତ ଆଗକୁ ବଢ଼ିବ।

ସେ ଭାରତୀୟ ସମ୍ବିଧାନର ମୂଲ୍ୟବୋଧକୁ ଭାରତୀୟ ସଂସ୍କୃତି ସହ ଯୋଡ଼ି ଉଲ୍ଲେଖ କରି କହିଛନ୍ତି ଯେ ସ୍ୱାଧୀନତା, ସମାନତା ଓ ଭାଇଚାରା ଭଳି ଧାରଣା ଭାରତୀୟ ଜୀବନ ଦର୍ଶନର ଅଂଶ। ଗଣତନ୍ତ୍ରର ସୁରକ୍ଷା କେବଳ ଆଇନରୁ ନୁହେଁ, ବରଂ ସାଂସ୍କୃତିକ ଚେତନା ଓ ସାମାଜିକ ମୂଲ୍ୟବୋଧରୁ ମଧ୍ୟ ନିର୍ଭର କରେ। ପଣ୍ଡିତ ଦୀନଦୟାଲ ଉପାଧ୍ୟାୟଙ୍କୁ ଉଲ୍ଲେଖ କରି ସେ କହିଛନ୍ତି ଯେ ଗଣତନ୍ତ୍ରରେ ଲୋକଜାଗରଣ ସବୁଠାରୁ ଗୁରୁତ୍ୱପୂର୍ଣ୍ଣ ଉପାଦାନ। ସଚେତନ ସମାଜ ହିଁ ବ୍ୟବସ୍ଥାକୁ ସଠିକ ଦିଗ ଦେଉଥାଏ ଏବଂ ରାଜନୀତିର ଚରିତ୍ର ମଧ୍ୟ ସମାଜର ଚରିତ୍ର ଦ୍ୱାରା ନିର୍ଣ୍ଣୟ ହୁଏ।

ହିନ୍ଦୁସ୍ଥାନ ସମାଚାରର ଭୂମିକା ଉପରେ ଆଲୋଚନା କରି ଆମ୍ବେକର କହିଛନ୍ତି ଯେ ସଂସ୍ଥା ତାହାର ସ୍ଥାପନା କାଳରୁ ହିଁ ଭାରତୀୟ ଭାଷାଗୁଡ଼ିକ ଏବଂ ଜାତୀୟ ଦୃଷ୍ଟିକୋଣକୁ ପ୍ରାଥମିକତା ଦେଇଆସୁଛି ଏବଂ ବର୍ତ୍ତମାନ 15 ରୁ ଅଧିକ ଭାରତୀୟ ଭାଷାରେ ସମାଚାର ସେବା ପ୍ରଦାନ କରୁଛି। ସେ କହିଛନ୍ତି ଯେ ସୂଚନାର ଦ୍ରୁତ ପରିବର୍ତ୍ତନଶୀଳ ଯୁଗରେ ସତ୍ୟ, ସମାଜହିତ ଏବଂ ଦେଶ ହିତକୁ କେନ୍ଦ୍ରରେ ରଖି ସମାଚାର ପ୍ରଦାନ କରୁଥିବା ସଂସ୍ଥାଗୁଡ଼ିକର ଭୂମିକା ଆହୁରି ଗୁରୁତ୍ୱପୂର୍ଣ୍ଣ ହୋଇଯାଏ।

ସଂଘର ଶତବାର୍ଷିକୀ ବର୍ଷ ଅବସରରେ ଦିଆଯାଇଥିବା ପଞ୍ଚ ପରିବର୍ତ୍ତନର ଆହ୍ୱାନକୁ ଉଲ୍ଲେଖ କରି ସେ ସାମାଜିକ ସମରସତା, ପରିବାର ବ୍ୟବସ୍ଥାକୁ ସୁଦୃଢ କରିବା, ପରିବେଶ-ଅନୁକୂଳ ଜୀବନଶୈଳୀ, କର୍ତ୍ତବ୍ୟବୋଧ ଏବଂ ସମାଜ ଜାଗରଣକୁ ଗଣତନ୍ତ୍ରର ସୁଦୃଢୀକରଣ ପାଇଁ ଆବଶ୍ୟକ ବୋଲି କହିଛନ୍ତି।

ସେ କହିଛନ୍ତି ଯେ ଭାରତର ଯୁବ ପିଢ଼ି ଗଣତନ୍ତ୍ର ଏବଂ ରାଷ୍ଟ୍ର ଗଠନ ପ୍ରତି ପ୍ରତିବଦ୍ଧ। ଆପାତକାଳ ସମୟରେ ଯୁବକମାନେ ଗଣତନ୍ତ୍ରର ସୁରକ୍ଷାରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇଥିଲେ ଏବଂ ଆଜି ମଧ୍ୟ ଯୁବପିଢ଼ିରେ ଦେଶକୁ ଆଗକୁ ନେବା ପାଇଁ ସକାରାତ୍ମକ ଶକ୍ତି ଦେଖାଯାଉଛି।

ସେ ଆହୁରି କହିଛନ୍ତି ଯେ ଗଣତନ୍ତ୍ରର ସୁରକ୍ଷା କେବଳ ରାଜନୈତିକ ଦଳମାନଙ୍କର ଦାୟିତ୍ୱ ନୁହେଁ, ବରଂ ସମଗ୍ର ସମାଜ, ପରିବାର, ଶିକ୍ଷା ସଂସ୍ଥାନ ଏବଂ ସାମାଜିକ ସଂଗଠନମାନଙ୍କର ଏକ ସାମୂହିକ ଦାୟିତ୍ୱ।

ଜେପି ସେନାନୀମାନଙ୍କୁ କରାଗଲା ସମ୍ମାନିତ

କାର୍ଯ୍ୟକ୍ରମରେ ବିହାର ଆନ୍ଦୋଳନ ଏବଂ ଆପାତକାଳ ବିରୋଧୀ ସଂଘର୍ଷ ସହ ସମ୍ପୃକ୍ତ ଜେପି ସେନାନୀମାନଙ୍କୁ ସମ୍ମାନିତ କରା ଯାଇଥିଲା । ଗଣତନ୍ତ୍ରର ସୁରକ୍ଷା ପାଇଁ ସଂଘର୍ଷ କରିଥିବା ଏହି ସେନାନୀମାନଙ୍କର ଅବଦାନକୁ ସ୍ମରଣ କରି ସେମାନଙ୍କୁ ଅଙ୍ଗବସ୍ତ୍ର, ସ୍ମୃତିଚିହ୍ନ ଏବଂ ସମ୍ମାନ ପତ୍ର ପ୍ରଦାନ କରାଗଲା। ଉପସ୍ଥିତ ଲୋକମାନେ ସେମାନଙ୍କୁ ଅଭିନନ୍ଦନ ଜଣାଇ ସେମାନଙ୍କ ସଂଘର୍ଷକୁ ନୂତନ ପିଢ଼ି ପାଇଁ ପ୍ରେରଣାସ୍ରୋତ ବୋଲି ଉଲ୍ଲେଖ କରିଲେ।

ବିହାର ଆନ୍ଦୋଳନ ଏବଂ ଆପାତକାଳ ଉପରେ ଆଧାରିତ ଯୁଗବାର୍ତ୍ତା ଏବଂ ନବୋତ୍ଥାନ ପତ୍ରିକାର ଲୋକାର୍ପଣ

କାର୍ଯ୍ୟକ୍ରମ ଅବସରରେ ବିହାର ଆନ୍ଦୋଳନ ଏବଂ ଆପାତକାଳ ଉପରେ ଆଧାରିତ ପକ୍ଷିକ ପତ୍ରିକା ‘ଯୁଗବାର୍ତ୍ତା’ ଏବଂ ମାସିକ ପତ୍ରିକା ‘ନବୋତ୍ଥାନ’ର ଲୋକାର୍ପଣ କରା ଯାଇଥିଲା । ଏହି ପତ୍ରିକାରେ ଆପାତକାଳ ସମୟର ଘଟଣାବଳୀ, ଗଣତନ୍ତ୍ର ରକ୍ଷା ପାଇଁ ସଂଘର୍ଷ, ବିହାର ଆନ୍ଦୋଳନର ଭୂମିକା ଏବଂ ସେଥିସହ ସମ୍ପୃକ୍ତ ପ୍ରମୁଖ ବ୍ୟକ୍ତିତ୍ୱମାନଙ୍କର ଅବଦାନକୁ ବିସ୍ତୃତ ଭାବେ ସଂଗ୍ରହ କରାଯାଇଛି।

ଏହି ପ୍ରକାଶନ କେବଳ ଐତିହାସିକ ଦଳିଲ ନୁହେଁ, ବରଂ ଗଣତାନ୍ତ୍ରିକ ସଚେତନତାର ଏକ ଗୁରୁତ୍ୱପୂର୍ଣ୍ଣ ସନ୍ଦର୍ଭ ଗ୍ରନ୍ଥ। ସେ କହିଛନ୍ତି ଯେ ନୂତନ ପିଢ଼ିକୁ ଆପାତକାଳର ଅନୁଭବ ଏବଂ ଗଣତନ୍ତ୍ର ସୁରକ୍ଷା ପାଇଁ ହୋଇଥିବା ସଂଘର୍ଷ ସହ ପରିଚିତ କରାଇବାରେ ଏହି ପତ୍ରିକା ଗୁରୁତ୍ୱପୂର୍ଣ୍ଣ ଭୂମିକା ନିଭାଇବ।

---------------

ହିନ୍ଦୁସ୍ଥାନ ସମାଚାର / ସମନ୍ୱୟ