ନୂଆଦିଲ୍ଲୀ, ୨୬ ଜୁନ(ହି.ସ) ଭେନେଜୁଏଲାର ରାଜଧାନୀ କାରାକାସରେ ନିକଟରେ ଘଟିଥିବା ଭୟଙ୍କର ଭୂକମ୍ପ ପରେ ଭାରତ ଏହି ସଙ୍କଟ ସମୟରେ ମାନବିକ ସହାୟତା ପାଇଁ ହାତ ବଢ଼ାଇଛି। ଭାରତୀୟ ବାୟୁସେନାର ଦୁଇଟି ବିମାନ ଶୁକ୍ରବାର ଦିନ 'ଅପରେସନ ଆମିସ୍ତାଦ ର ଅଂଶବିଶେଷ ଭାବେ ଅତ୍ୟାବଶ୍ୟକ ରିଲିଫ ସାମଗ୍ରୀ ଏବଂ ଚିକିତ୍ସା ଉପକରଣ ନେଇ ଭେନେଜୁଏଲା ଅଭିମୁଖେ ଯାତ୍ରା କରିଛି।

ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ' ରେ ଏହି ସୂଚନା ଦେଇ ବୈଦେଶିକ ବ୍ୟାପାର ମନ୍ତ୍ରୀ ଡକ୍ଟର ଏସ୍. ଜୟଶଙ୍କର କହିଛନ୍ତି ଯେ ଏହି ମାନବିକ ସହାୟତା ଅଭିଯାନ ଅଧୀନରେ ଭାରତରୁ ବ୍ୟାପକ ସ୍ତରରେ ଚିକିତ୍ସା ଏବଂ ବିପର୍ଯ୍ୟୟ ପରିଚାଳନା ସମ୍ବନ୍ଧୀୟ ଉପକରଣ ପଠାଯାଉଛି। ରିଲିଫ୍ ସାମଗ୍ରୀ ମଧ୍ୟରେ ଏକ ଫିଲ୍ଡ ହସ୍ପିଟାଲ୍ ୟୁନିଟ୍, 35 ଟନ୍ରୁ ଅଧିକ ରିଲିଫ ସାମଗ୍ରୀ ଏବଂ ଦୁଇଟି 'ଭୀଷ୍ମ କ୍ୟୁବ୍' ଅନ୍ତର୍ଭୁକ୍ତ, ଯାହା ବିପର୍ଯ୍ୟୟ ପ୍ରଭାବିତ ଅଞ୍ଚଳରେ ତୁରନ୍ତ ଚିକିତ୍ସା ସହାୟତା ଏବଂ ରିଲିଫ କାର୍ଯ୍ୟ ପାଇଁ ବ୍ୟବହୃତ ହେବ ବୋଲି ସେ କହିଛନ୍ତି।

ଡକ୍ଟର ଜୟଶଙ୍କର କହିଛନ୍ତି ଯେ ଏହି କଠିନ ସମୟରେ ଭାରତ ଭେନେଜୁଏଲାର ସରକାର ଏବଂ ଲୋକଙ୍କ ସହିତ ଦୃଢ ଭାବରେ ଛିଡା ହୋଇଛି। ସେ କହିଛନ୍ତି ଯେ ଭାରତ ସମସ୍ତ ସମ୍ଭାବ୍ୟ ସହାୟତା ପ୍ରଦାନ କରିବାକୁ ପ୍ରତିଶ୍ରୁତିବଦ୍ଧ ଏବଂ ଆବଶ୍ୟକ ହେଲେ ଏହା ଜାରି ରଖିବ।

ଏହା ଉଲ୍ଲେଖନୀୟ ଯେ କାରାକାସ୍ ଏବଂ ଏହାର ଆଖପାଖ ଅଞ୍ଚଳରେ ନିକଟରେ 7.5 ଏବଂ 7.2 ତୀବ୍ରତାର ଦୁଇଟି ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି, ଯାହା ବ୍ୟାପକ ବିନାଶ ଘଟାଇଛି। ପ୍ରାରମ୍ଭିକ ସୂଚନା ଅନୁଯାୟୀ, ଭୂକମ୍ପରେ ବ୍ୟାପକ ଜୀବନହାନି ଘଟିଛି ଏବଂ ଏପର୍ଯ୍ୟନ୍ତ 200 ରୁ ଅଧିକ ଲୋକ ପ୍ରାଣ ହରାଇଥିବା ସୂଚନା ମିଳିଛି। ବହୁ ସଂଖ୍ୟକ କୋଠାଘର ମଧ୍ୟ କ୍ଷତିଗ୍ରସ୍ତ ହୋଇଥିବା ବେଳେ ଯୁଦ୍ଧକାଳୀନ ଭିତ୍ତିରେ ରିଲିଫ ଓ ଉଦ୍ଧାର କାର୍ଯ୍ୟ ଜାରି ରହିଛି।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା