ହରିଦ୍ଵାର, ୭ ଜୁନ୍ (ହି.ସ.)- ଉତରାଖଣ୍ଡ ସରକାର ରାଜ୍ୟରେ ବେଆଇନ ନିର୍ମାଣ ଉପରେ ନିରନ୍ତର କାର୍ଯ୍ୟାନୁଷ୍ଠାନ ଗ୍ରହଣ କରିଆସୁଛନ୍ତି । ତୀର୍ଥନଗରୀ ହରିଦ୍ୱାର ଜିଲ୍ଲାର ସୁଲତାନପୁର ନଗର ପଂଚାୟତ ଅଂଚଳରେ ନିର୍ମାଣାଧୀନ ମସଜିଦର ଅନଧିକୃତ ଏବଂ ବେଆଇନ ଉଚ୍ଚ ମିନାରଗୁଡ଼ିକୁ ହଟାଇବା କାର୍ଯ୍ୟ ଆରମ୍ଭ ହୋଇଛି ।
ସୂଚନା ଅନୁଯାୟୀ, ୨୦୨୦ ମସିହାରେ ପୁରୁଣା ଜାମା ମସଜିଦ ସ୍ଥାନରେ ଏକ ନୂଆ ଏବଂ ବଡ ମସଜିଦ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା । ୨୦୨୫ ମସିହାରେ, ମସଜିଦର ମିନାରର ଉଚ୍ଚତା ବିଷୟରେ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା, ଯାହା ନିର୍ଦ୍ଧାରିତ ସୀମାଠାରୁ ଅଧିକ ବୋଲି ଦାବି କରିଥିଲା । ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି ଘଟଣାର ତଦନ୍ତ ନିର୍ଦ୍ଦେଶ ଦେଇଥିଲେ । ଅନୁସନ୍ଧାନରୁ ଜଣାପଡିଛି ଯେ, ମସଜିଦ ଏବଂ ଉଚ୍ଚ ମିନାରଗୁଡିକ ମାନକ ଅନୁଯାୟୀ ନୁହେଁ ଏବଂ ଏହାର ନିର୍ମାଣ ପାଇଁ ଜିଲ୍ଲା ପ୍ରଶାସନ କିମ୍ବା କର୍ତୃପକ୍ଷଙ୍କ ଠାରୁ କୌଣସି ଅନୁମତି ନିଆଯାଇନଥିଲା । ସେତେବେଳେ ହରିଦ୍ୱାରର ଡିଏମ ଏହାର ନିର୍ମାଣ ଉପରେ ପ୍ରତିବନ୍ଧକ ଲଗାଇ ଏକ ବିଜ୍ଞପ୍ତି ଜାରି କରିଥିଲେ, ଯାହା ପରେ ଉକ୍ତ ମସଜିଦର ନିର୍ମାଣ କାର୍ଯ୍ୟ ବନ୍ଦ ହୋଇଯାଇଥିଲା ।
ସୂଚନା ଅନୁଯାୟୀ, ସୁଲତାନପୁରରେ ଏହି ମସଜିଦ ନିର୍ମାଣ ପୂର୍ବରୁ ଏହାର ମାନଚିତ୍ର ପାରିତ ହୋଇନଥିଲା ଏବଂ ଅଗ୍ନି ନିରାପତା ଏବଂ ସାଧାରଣ ନିର୍ମାଣ ସମେତ ଅନ୍ୟ କୌଣସି ବିଭାଗରୁ ଅନାପତି ପ୍ରମାଣପତ୍ର ନିଆଯାଇନଥିଲା । ଏହା ସତ୍ୱେ, ମସଜିଦରେ ୨୫୦ ଫୁଟ ଉଚ୍ଚ ମିନାର ନିର୍ମାଣ କରାଯାଇଥିଲା ।
ଏହି ମସଜିଦକୁ ରାଜ୍ୟର ସର୍ବବୃହତ୍ ମସଜିଦ ଭାବେ ଘୋଷଣା କରି ପାଣ୍ଠି ସଂଗ୍ରହ କରାଯାଇଥିବା ସୂଚନା ମିଳିଥିଲା । ଏହା ଉଲ୍ଲେଖ କରାଯାଇପାରେ ଯେ, ସୁପ୍ରିମକୋର୍ଟଙ୍କ ୨୦୦୯ ଏବଂ ୨୦୧୬ ନିର୍ଦ୍ଦେଶରେ କୁହାଯାଇଛି ଯେ, ଜିଲ୍ଲା ଅଧିକାରୀଙ୍କ ଅନୁମତି ବିନା କୌଣସି ଧାର୍ମିକ କୋଠା କିମ୍ବା ସଂରଚନା ନିର୍ମାଣ କରାଯାଇପାରିବ ନାହିଁ । ଏହା ପଛରେ କାରଣ ଥିଲା ଯେ ସରକାରୀ ଜମିରେ ଏକ ଧାର୍ମିକ ଢାଂଚା ନିର୍ମାଣ କରାଯିବା ଉଚିତ୍ ନୁହେଁ ଏବଂ ଏହାର ନିର୍ମାଣରେ ସୁରକ୍ଷାର ପ୍ରତ୍ୟେକ ଦିଗ ପ୍ରତି ଧ୍ୟାନ ଦିଆଯିବା ଉଚିତ୍ ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ