ନୂଆଦିଲ୍ଲୀ, ୮ ଜୁନ (ହି.ସ.) ତୃଣମୂଳ କଂଗ୍ରେସ (ଟିଏମସି) ଏବଂ ରାଜ୍ୟସଭା ସଦସ୍ୟତାରୁ ଇସ୍ତଫା ଦେଇଥିବା ସୁଖେନ୍ଦୁ ଶେଖର ରାୟ ଅଭିଯୋଗ କରିଛନ୍ତି ଯେ କ୍ଷମତାରେ ତାଙ୍କର ଦୀର୍ଘ ସମୟ ଯୋଗୁଁ ଦଳୀୟ ନେତୃତ୍ୱ ଲୋକଙ୍କଠାରୁ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଯାଇଛି ଏବଂ ଉତ୍ସର୍ଗୀକୃତ ପୁରୁଣା କର୍ମୀଙ୍କ ପରିବର୍ତେ ଦୁର୍ନୀତିଗ୍ରସ୍ତ ଏବଂ ଅପରାଧୀ ମନୋଭାବ ଥିବା ବ୍ୟକ୍ତିମାନଙ୍କୁ ସଂଗଠନରେ ପ୍ରୋତ୍ସାହିତ କରାଯାଇଛି।

ସୋମବାର ତାଙ୍କ ଇସ୍ତଫା ପତ୍ରରେ, ରାୟ ପଶ୍ଚିମବଙ୍ଗରେ ଟିଏମସିର ୧୫ ବର୍ଷର ଶାସନକୁ ସମାଲୋଚନା କରି କହିଛନ୍ତି ଯେ ସଦ୍ୟ ସମାପ୍ତ ବିଧାନସଭା ନିର୍ବାଚନରେ ଜନସାଧାରଣ ଅଭୂତପୂର୍ବ ଭାବରେ ଭୋଟ ଦେଇଛନ୍ତି, କିନ୍ତୁ ଦଳୀୟ ନେତୃତ୍ୱ ନିର୍ବାଚନୀ ପରାଜୟର କାରଣଗୁଡ଼ିକୁ ଗମ୍ଭୀରତାର ସହିତ ବିଶ୍ଳେଷଣ କରିନାହାଁନ୍ତି।

ସେ କହିଛନ୍ତି ଯେ ଦୀର୍ଘ ସମୟ ଧରି କ୍ଷମତାରେ ରହିବା ଦଳୀୟ ନେତାମାନଙ୍କୁ ସାଧାରଣ ଲୋକଙ୍କଠାରୁ ଦୂରେଇ ରଖିଛି। ପଂଚାୟତ ପ୍ରତିନିଧିଙ୍କଠାରୁ ମନ୍ତ୍ରୀ ଏବଂ ପ୍ରଶାସନିକ ଅଧିକାରୀଙ୍କ ପର୍ଯ୍ୟନ୍ତ ସମସ୍ତଙ୍କ ପାଖରେ ପହଂଚିବା ସାଧାରଣ ନାଗରିକଙ୍କ ପାଇଁ କଷ୍ଟକର ହୋଇପଡ଼ିଛି। ସେ ଅଭିଯୋଗ କରିଛନ୍ତି ଯେ ବର୍ଷ ବର୍ଷ ଧରି ସଂଘର୍ଷ କରି ସଂଗଠନକୁ ମଜବୁତ କରିଥିବା କର୍ମୀମାନଙ୍କୁ ପାର୍ଶ୍ୱାନ୍ତରିତ କରାଯାଇଛି ଏବଂ ସେମାନଙ୍କ ସ୍ଥାନରେ ମଧ୍ୟସ୍ଥି, ଦୁର୍ନୀତିଗ୍ରସ୍ତ ଉପାଦାନ ଏବଂ ଅପରାଧିକ ପୃଷ୍ଠଭୂମି ଥିବା ଲୋକଙ୍କୁ ଗୁରୁତ୍ୱ ଦିଆଯାଇଛି।

ସାମ୍ବାଦିକମାନଙ୍କ ସହ କଥାବାର୍ତା ସମୟରେ ରାୟ ପଂଚାୟତ ସ୍ତରରେ ଦୁର୍ନୀତିର ମଧ୍ୟ ଉଲ୍ଲେଖ କରିଥିଲେ। ସେ ଦାବି କରିଥିଲେ ଯେ ଗ୍ରାମାଂଚଳରେ ବ୍ୟାପକ ଅନିୟମିତତା ଏବଂ ଜନପ୍ରତିନିଧିଙ୍କ ସମ୍ପତିରେ ଅସ୍ୱାଭାବିକ ବୃଦ୍ଧି ଘଟିଛି। ଏହାକୁ ନେଇ ଜନସାଧାରଣଙ୍କ ମଧ୍ୟରେ ବ୍ୟାପକ ଅସନ୍ତୋଷ ପ୍ରକାଶ ପାଇଛି।

-----------------------------

---------------

ହିନ୍ଦୁସ୍ଥାନ ସମାଚାର / ଗଗନ