ଡେରାଡୁନ, ୨୦ ଜୁଲାଇ (ହି.ସ.)- ଉତରାଖଣ୍ଡରେ ଲଗାଣ ବର୍ଷା ମଧ୍ୟରେ ଗତ ୨୪ ଘଂଟା ମଧ୍ୟରେ ପ୍ରାକୃତିକ ବିପର୍ଯ୍ୟୟ ଏବଂ ସଡ଼କ ଦୁର୍ଘଟଣା ଜନିତ ଘଟଣାରେ ତିନି ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି । ରାଜ୍ୟର ବିଭିନ୍ନ ସ୍ଥାନରେ ଆବର୍ଜନା, ପଥର ଏବଂ ଜଳମଗ୍ନ ଯୋଗୁଁ ଜନଜୀବନ ପ୍ରଭାବିତ ହୋଇଛି । ଯମୁନୋତ୍ରୀ ଜାତୀୟ ରାଜପଥ (ଏନ୍. ଏଚ୍.-୧୩୪) ପାଲିଗଡ଼ ନିକଟରେ ଭଗ୍ନାବଶେଷ ଆସିବା କାରଣରୁ ଏବେ ବି ବନ୍ଦ ରହିଛି ।

ସୋମବାର ପ୍ରକାଶିତ ରାଜ୍ୟ ଜରୁରୀକାଳୀନ ଅପରେସନ ସେଂଟର (ଏସଇଓସି)ର ୨୪ ଘଂଟାର ଷ୍ଟାଟସ୍ ରିପୋର୍ଟ ଅନୁଯାୟୀ, ପିଥୋରାଗଡ଼ ଜିଲ୍ଲାର ଧାରଚୁଲା ତହସିଲ ଅନ୍ତର୍ଗତ ପୋଶିଲା ଗ୍ରାମରେ ଜଙ୍ଗଲରେ ଛେଳି ଚରାଉଥିବା ୫୨ ବର୍ଷୀୟ ଦିୱାନ ସିଂହ ବଜ୍ରପାତରେ ପ୍ରାଣ ହରାଇଛନ୍ତି ।

ନୈନିତାଲ ଜିଲ୍ଲାର ହଲ୍ଦ୍ୱାନୀ ପରିବହନ ନଗର ଅଂଚଳରେ ଏକ ଅଜଣା ଗାଡ଼ି ଧକ୍କାରେ ଜଣେ ପଥଚାରୀଙ୍କ ମୃତ୍ୟୁ ଘଟିଛି । ପୋଲିସ ଏକ ମାମଲା ରୁଜୁ କରି ଦୁର୍ଘଟଣା ଘଟାଇଥିବା ଗାଡି ଓ ଏହାର ଡ୍ରାଇଭରକୁ ଖୋଜୁଛି ।

ସେହିପରି ତେହ୍ରି ଜିଲ୍ଲାର ପ୍ରତାପନଗର-ଲମ୍ବଗାଓଁ ମୋଟରୱେରେ ଏକ କାର୍ ପ୍ରାୟ ୨୦୦ ମିଟର ଗଭୀର ଗିରିଖାତାକୁ ଖସି ପଡ଼ିଛି । ଏହି ଦୁର୍ଘଟଣାରେ ଡ୍ରାଇଭର, ଖୋଲଗଡ଼ର ବାସିନ୍ଦା ୩୮ ବର୍ଷ ବୟସ୍କ ହୋସିଆର ସିଂ ପାନୱାର ଗୁରୁତର ଆହତ ହୋଇଥିଲେ । ତାଙ୍କୁ ଡାକ୍ତରଖାନା ନିଆଯାଇଥିଲା, ଯେଉଁଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଛନ୍ତି ।

ଅନୁରୂପ ଭାବେ ରୁଦ୍ରପ୍ରୟାଗ ଜିଲ୍ଲାର ସଂକ୍ରାଦି-ଖାକ୍ରା-ପିପ୍ଲି ରାସ୍ତାରେ ଏକ ପିକ୍ଅପ୍ ଗାଡି ନିୟନ୍ତ୍ରଣ ବାହାରକୁ ଯାଇ ଏକ ଗିରିଖାତାକୁ ଖସି ପଡ଼ିଥିଲା । ଏହି ଦୁର୍ଘଟଣାରେ ଦୁଇ ଜଣ ମହିଳାଙ୍କ ସମେତ ତିନି ଜଣ ବ୍ୟକ୍ତି ଆହତ ହୋଇଥିବାବେଳେ ଗାଡ଼ିରେ ଥିବା ଏକ ମଇଁଷିର ମୃତ୍ୟୁ ଘଟିଛି । ଆହତମାନଙ୍କୁ ଶ୍ରୀନଗରର ବେସ୍ ହସ୍ପିଟାଲକୁ ସ୍ଥାନାନ୍ତର କରାଯାଇଛି । ପୌଡ଼ି ଜିଲ୍ଲାର ଋଷିକେଶ-କୀର୍ତିନଗର ମୋଟରୱେରେ ଏକ ଚଳନ୍ତା କାର୍ ଉପରେ ଗଛ ପଡ଼ିବା ଫଳରେ ଜଣେ ବ୍ୟକ୍ତି ଆହତ ହୋଇଛନ୍ତି ଏବଂ ତାଙ୍କୁ ଚିକିତ୍ସା ପାଇଁ ଡାକ୍ତରଖାନାକୁ ପଠାଯାଇଛି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ