ନୂଆଦିଲ୍ଲୀ, ୨୪ ଜୁଲାଇ (ହି.ସ.)- ଦିଲ୍ଲୀର ରାଉଜ୍ ଆଭେନ୍ୟୁ ସେସନ୍ସ କୋର୍ଟ ୨୦୨୦ ମସିହାର ଉତର-ପୂର୍ବ ଦିଲ୍ଲୀ ହିଂସା ସମୟରେ ରାଷ୍ଟ୍ରଗୀତ ଗାଇବାକୁ ବାଧ୍ୟ କରିବା ପାଇଁ ପୋଲିସ ଦ୍ୱାରା ପାଂଚ ଜଣ ମୁସଲିମ ଯୁବକଙ୍କୁ ମାଡ଼ ମାରିବା ମାମଲାରେ ଦୁଇ ଜଣ ଅଭିଯୁକ୍ତ ପୋଲିସ କର୍ମଚାରୀଙ୍କ ବିରୋଧରେ ରୁଜୁ ହୋଇଥିବା ମାମଲାର ଶୁଣାଣିକୁ ସ୍ଥଗିତ କରିଛନ୍ତି। ସ୍ପେଶାଲ୍ ଜଜ୍ ଗୌରବ ରାଓ ଅଭିଯୁକ୍ତମାନଙ୍କ ବିରୋଧରେ ଦାଖଲ ହୋଇଥିବା ଚାର୍ଜଶିଟ୍ର ଦଲିଲଗୁଡ଼ିକର ଯାଂଚ ପାଇଁ ୧୭ ଅଗଷ୍ଟରେ ଶୁଣାଣି କରିବାକୁ ଆଦେଶ ଦେଇଛନ୍ତି।
ଏହି ମାମଲାକୁ ମାଜିଷ୍ଟ୍ରେଟ୍ କୋର୍ଟ ୧୪ ମାର୍ଚ୍ଚରେ ସେସନ୍ସ କୋର୍ଟକୁ ସ୍ଥାନାନ୍ତର କରିଥିଲା। ମାଜିଷ୍ଟ୍ରେଟ୍ କୋର୍ଟ ଉଭୟ ଅଭିଯୁକ୍ତ ପୋଲିସ କର୍ମଚାରୀଙ୍କୁ ୫୦-୫୦ ହଜାର ଟଙ୍କାର ବେଲ୍ ବଣ୍ଡରେ ଜାମିନ ଦେଇଥିଲା। ମାଜିଷ୍ଟ୍ରେଟ୍ କୋର୍ଟ କହିଥିଲା ଯେ, ଏହି ମାମଲାରେ ଲାଗିଥିବା ଧାରାଗୁଡ଼ିକ ଉପରେ ଶୁଣାଣି କରିବାର କ୍ଷେତ୍ରାଧିକାର ସେସନ୍ସ କୋର୍ଟର ରହିଛି, ଯାହା ପରେ ମାମଲାକୁ ସେସନ୍ସ କୋର୍ଟକୁ ସ୍ଥାନାନ୍ତର କରିବାକୁ ଆଦେଶ ଦିଆଯାଇଥିଲା। କୋର୍ଟ ଉଭୟ ଅଭିଯୁକ୍ତ ଏବଂ ପୀଡ଼ିତଙ୍କ ଓକିଲଙ୍କୁ ଚାର୍ଜଶିଟ୍ର ପ୍ରତି ଉପଲବ୍ଧ କରାଇବାକୁ ଆଦେଶ ଦେଇଥିଲା।
କୋର୍ଟ ୪ ଫେବୃଆରୀରେ ସିବିଆଇ ପକ୍ଷରୁ ଦାଖଲ ହୋଇଥିବା ଚାର୍ଜଶିଟ୍କୁ ଗ୍ରହଣ କରି ହେଡ୍ କନଷ୍ଟେବଲ୍ ରବୀନ୍ଦ୍ର କୁମାର ଏବଂ କନଷ୍ଟେବଲ୍ ପବନ ଯାଦବଙ୍କୁ ସମନ ଜାରି କରିଥିଲେ। ସିବିଆଇ ଉଭୟ ଅଭିଯୁକ୍ତ ପୋଲିସ କର୍ମଚାରୀଙ୍କ ବିରୋଧରେ ଭାରତୀୟ ଦଣ୍ଡ ସଂହିତାର ଧାରା ୩୨୩, ୩୨୫, ୩୦୪(୨) ଏବଂ ୩୪ ଅନୁଯାୟୀ ଚାର୍ଜଶିଟ୍ ଦାଖଲ କରିଛି। ଏହି ମାମଲାରେ ଫୈଜାନ ନାମକ ଜଣେ ଯୁବକଙ୍କ ମୃତ୍ୟୁ ହୋଇଥିଲା, କିନ୍ତୁ ଚାର୍ଜଶିଟ୍ରେ ହତ୍ୟା ସମ୍ବନ୍ଧୀୟ କୌଣସି ଧାରା ଲଗାଯାଇନାହିଁ।
----------------------
---------------
ହିନ୍ଦୁସ୍ଥାନ ସମାଚାର / ଗଗନ
