ହାଇଦ୍ରାବାଦ, ୨୮ ଜୁଲାଇ (ହି.ସ.)- ପ୍ରବର୍ତନ ନିର୍ଦ୍ଦେଶାଳୟ (ଇଡି) ଏକ ନକଲି କଲ୍ ସେଂଟର ମାଧ୍ୟମରେ ଆମେରିକୀୟ ନାଗରିକଙ୍କୁ ସାଇବର ଠକେଇ ଏବଂ ମନି ଲଣ୍ଡରିଂ ମାମଲାରେ ମୁଖ୍ୟ ଅଭିଯୁକ୍ତ ବିକାଶ କୁମାର ନିମାର୍ ଓରଫ୍ ମିସ୍ଟିଙ୍କୁ ଗିରଫ କରିଛି । ତଦନ୍ତ ଏଜେନ୍ସି ଅଭିଯୋଗ କରିଛି ଯେ, ନିମାର୍ ଦେଶର ବିଭିନ୍ନ ସହରରୁ ପରିଚାଳିତ ଏକ ସଂଗଠିତ ସାଇବର ଠକେଇ ନେଟୱାର୍କର ମାଷ୍ଟରମାଇଣ୍ଡ ଥିଲା, ଯିଏକି ବୈଷୟିକ ସହାୟତା (ଟେକ୍ନିକାଲ ସପୋର୍ଟ)କର୍ମଚାରୀ ଭାବରେ ନିଜର ପରିଚୟ ଦେଇ ଆମେରିକୀୟ ନାଗରିକମାନଙ୍କୁ ଫାନ୍ଦରେ ପକାଇଥିଲା ।
ଇଡି ଅନୁଯାୟୀ, ସୋମବାର ଦିନ ଅଭିଯୁକ୍ତକୁ ଗିରଫ କରାଯାଇଥିଲା । ମଙ୍ଗଳବାର ଦିନ ତାକୁ କୋର୍ଟରେ ହାଜର କରାଯାଇଥିଲା, ସେଠାରୁ କୋର୍ଟ ଅଭିଯୁକ୍ତକୁ ନ୍ୟାୟିକ ହେପାଜତକୁ ପଠାଇଥିଲେ । ଏଜେନ୍ସି ବର୍ତମାନ ଏହି ମାମଲାରେ ଜଡ଼ିତ ଅନ୍ୟ ଅଭିଯୁକ୍ତ, ଆର୍ôଥକ କାରବାର ଏବଂ ଆନ୍ତର୍ଜାତୀୟ ନେଟୱାର୍କର ମଧ୍ୟ ତଦନ୍ତ କରୁଛି ।
ଅନୁସନ୍ଧାନ ଏଜେନ୍ସି ଅନୁଯାୟୀ, ବିକାଶ କୁମାର ନିମାର ହାଇଦ୍ରାବାଦରେ ଏକ ନକଲି କଲ୍ ସେଂଟର ସ୍ଥାପନ କରିଥିଲା । ଏଠାରୁ, ତାଲିମପ୍ରାପ୍ତ କର୍ମଚାରୀଙ୍କ ମାଧ୍ୟମରେ ଆମେରିକୀୟ ନାଗରିକମାନଙ୍କୁ କଲ୍ କରାଯାଉଥିଲା ଏବଂ ପ୍ରତିଷ୍ଠିତ ବୈଷୟିକ କମ୍ପାନୀର କର୍ମଚାରୀ ଭାବରେ ପରିଚୟ ଦେଇ ସେମାନଙ୍କୁ ଯୋଗାଯୋଗ କରାଯାଉଥିଲା । ଏହା ପରେ କମ୍ପ୍ୟୁଟର କିମ୍ବା ଅନ୍ୟାନ୍ୟ ଡିଜିଟାଲ୍ ଡିଭାଇସରେ ବୈଷୟିକ ତ୍ରୁଟି, ଭାଇରସ୍ ସଂକ୍ରମଣ କିମ୍ବା ସୁରକ୍ଷା ସମସ୍ୟାର ବାହାନା କରି ଲୋକଙ୍କ ସହ ଯୋଗାଯୋଗ ସ୍ଥାପନ କରାଯାଉଥିଲା । ଅନୁସନ୍ଧାନରୁ ଏହା ମଧ୍ୟ ଜଣାପଡ଼ିଛି ଯେ, ପୀଡ଼ିତମାନଙ୍କୁ ଧମକ ଦେଇ କିମ୍ବା ବିଭ୍ରାନ୍ତ କରି ସେମାନଙ୍କଠାରୁ ବିପୁଳ ପରିମାଣର ଅର୍ଥ ଆଦାୟ କରାଯାଉଥିଲା ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
28 Jul 2026