ରାଂଚି, ୨୮ ଜୁଲାଇ (ହି.ସ.) - ଝାରଖଣ୍ଡ ପୁଲିସକୁ ମାଓବାଦୀମାନଙ୍କ ବିରୋଧରେ ଚାଲିଥିବା ଅଭିଯାନରେ ବଡ଼ ସଫଳତା ମିଳିଛି। ଅପରେସନ୍ 'ନବଜୀବନ-ସେକେଣ୍ଡ ଅଧୀନରେ ନିଷିଦ୍ଧ ଭାକପା (ମାଓବାଦୀ) ସଂଗଠନର ୧୬ ଜଣ ସକ୍ରିୟ ନକ୍ସଲ ମଙ୍ଗଳବାର ଝାରଖଣ୍ଡ ପୁଲିସ ସମ୍ମୁଖରେ ଆତ୍ମସମର୍ପଣ କରିଛନ୍ତି। ଆତ୍ମସମର୍ପଣ କରିଥିବାମାନଙ୍କ ମଧ୍ୟରେ ସଂଗଠନର ବିଭିନ୍ନ ସ୍ତରର କମାଣ୍ଡର ଏବଂ ଦସ୍ତା ସଦସ୍ୟମାନେ ସାମିଲ ଅଛନ୍ତି। ସେମାନେ ପୁଲିସକୁ ୧୧ଟି ଆଧୁନିକ ଅସ୍ତ୍ର, ୩୮ଟି ମ୍ୟାଗାଜିନ୍ ଏବଂ ୧,୫୬୨ଟି ଜୀବନ୍ତ କାର୍ତୁଜ ମଧ୍ୟ ହସ୍ତାନ୍ତର କରିଛନ୍ତି।

ପୁଲିସ ମୁଖ୍ୟାଳୟରେ ଆୟୋଜିତ କାର୍ଯ୍ୟକ୍ରମରେ ରାଜ୍ୟର ପୁଲିସ ମହାନିର୍ଦ୍ଦେଶକ (ଡିଜିପି) ତଦାଶା ମିଶ୍ର କହିଛନ୍ତି ଯେ ଝାରଖଣ୍ଡ ପୁଲିସ, କେନ୍ଦ୍ରୀୟ ରିଜର୍ଭ ପୁଲିସ ବଳ (ସିଆରପିଏଫ୍), କୋବ୍ରା ବାଟାଲିଅନ୍ ଏବଂ ଝାରଖଣ୍ଡ ଜାଗୁଆରଙ୍କ ଦ୍ୱାରା ମିଳିତ ଭାବେ ଚାଲିଥିବା ଅଭିଯାନ ଯୋଗୁଁ ମାଓବାଦୀ ସଂଗଠନ ଉପରେ ଲଗାତାର ଚାପ ବଢ଼ୁଛି। ସେହିପରି ରାଜ୍ୟ ସରକାରଙ୍କ ଆତ୍ମସମର୍ପଣ ଏବଂ ପୁନର୍ବାସ ନୀତିରେ ପ୍ରଭାବିତ ହୋଇ ବହୁ ସଂଖ୍ୟାରେ ନକ୍ସଲମାନେ ହିଂସାର ପଥ ଛାଡ଼ି ମୁଖ୍ୟଧାରାକୁ ଫେରୁଛନ୍ତି।

ଡିଜିପିଙ୍କ ଅନୁସାରେ, ଆତ୍ମସମର୍ପଣ କରିଥିବା ୧୬ ଜଣ ନକ୍ସଲଙ୍କ ମଧ୍ୟରେ ୧୧ ଜଣ ପୁରୁଷ ଏବଂ ପାଂଚ ଜଣ ମହିଳା ସାମିଲ ଅଛନ୍ତି। ସେମାନଙ୍କ ମଧ୍ୟରେ ଜଣେ ରିଜିଓନାଲ୍ କମିଟି ସଦସ୍ୟ (ଆର୍ସିଏମ୍), ତିନିଜଣ ଜୋନାଲ୍ କମିଟି ସଦସ୍ୟ (ଜେଡ୍ସିଏମ୍), ତିନିଜଣ ସବ୍-ଜୋନାଲ୍ କମିଟି ସଦସ୍ୟ (ଏସ୍ଜେଡ୍ସିଏମ୍), ଛଅଜଣ ଏରିଆ କମିଟି ସଦସ୍ୟ (ଏସିଏମ୍) ଏବଂ ତିନିଜଣ ଦସ୍ତା ସଦସ୍ୟ ଅଛନ୍ତି। ସେମାନେ ସମସ୍ତେ କୋଲହାନ ଏବଂ ସାରଣ୍ଡାର ଦୁର୍ଗମ ଜଙ୍ଗଲ-ପାହାଡ଼ିଆ ଅଂଚଳରେ ସକ୍ରିୟ ଥିଲେ ଏବଂ ସଂଗଠନର ଶୀର୍ଷ ନେତା ମିସିର ବେସରା ଓରଫ୍ ସାଗର ଜୀ ଏବଂ ଅସୀମ ମଣ୍ଡଳଙ୍କ ଦସ୍ତା ସହ ଜଡ଼ିତ ବୋଲି କୁହାଯାଉଛି।

ଡିଜିପି କହିଛନ୍ତି ଯେ ଲଗାତାର ସୁରକ୍ଷା ଅଭିଯାନ, ସଂଗଠନ ଭିତରେ ବଢ଼ୁଥିବା ଅସନ୍ତୋଷ ଏବଂ ସରକାରଙ୍କ ପୁନର୍ବାସ ନୀତି କାରଣରୁ ମାଓବାଦୀ ସଂଗଠନ ଲଗାତାର ଦୁର୍ବଳ ହେଉଛି। ବିଶେଷ କରି ପଶ୍ଚିମ ସିଂହଭୂମ (ଚାଇବାସା) ଏବଂ ଆଖପାଖ ଅଂଚଳରେ ନକ୍ସଲ କାର୍ଯ୍ୟକଳାପ ଦ୍ରୁତ ଗତିରେ ସୀମିତ ହେଉଛି। ଡିଜିପି ଅବଶିଷ୍ଟ ସକ୍ରିୟ ନକ୍ସଲମାନଙ୍କୁ ମଧ୍ୟ ଆହ୍ୱାନ କରିଛନ୍ତି ଯେ ସେମାନେ ହିଂସାର ପଥ ଛାଡ଼ି ଆତ୍ମସମର୍ପଣ ଏବଂ ପୁନର୍ବାସ ନୀତିର ଲାଭ ଉଠାନ୍ତୁ ଏବଂ ସମାଜର ମୁଖ୍ୟଧାରା ସହ ଯୋଡ଼ି ହୋଇ ସମ୍ମାନଜନକ ଜୀବନର ଆରମ୍ଭ କରନ୍ତୁ।

-------------------------

---------------

ହିନ୍ଦୁସ୍ଥାନ ସମାଚାର / ଗଗନ