ନୂଆଦିଲ୍ଲୀ, ୨୯ ଜୁଲାଇ (ହି.ସ.)- ଜାତୀୟ ରାଜପଥରେ ସଡ଼କ ସୁରକ୍ଷା ପୁନଃସ୍ଥାପନ କରିବା ଏବଂ ସୁଗମ ଯାତାୟାତ ସୁନିଶ୍ଚିତ କରିବା ପାଇଁ ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ ଏବଂ ଭାରତୀୟ ଜାତୀୟ ରାଜପଥ ପ୍ରାଧିକରଣ (ଏନଏଚଏଆଇ) ଦେଶବ୍ୟାପୀ ଅତିକ୍ରମଣ ହଟାଇବା ଅଭିଯାନ ଆରମ୍ଭ କରିଛି। ସର୍ବୋଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶ ଅନୁସାରେ ଚାଲୁଥିବା ଏହି ଅଭିଯାନର ଉଦ୍ଦେଶ୍ୟ ହେଉଛି ରାଜପଥରୁ ବେଆଇନ ନିର୍ମାଣ, ବାଣିଜ୍ୟିକ ପ୍ରତିଷ୍ଠାନ ଏବଂ ଅନଧିକୃତ ପ୍ରବେଶ ପଥକୁ ହଟାଇ ସୁରକ୍ଷିତ ଯାତାୟାତ ସୁନିଶ୍ଚିତ କରିବା।

କେନ୍ଦ୍ରୀୟ ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ ସୂଚନା ଦେଇଛି ଯେ, ଏନଏଚଏଆଇର ପିଆଇୟୁ ରାଜକୋଟ ସମ୍ପ୍ରତି ବୃହତ୍ ପରିମାଣରେ ଅତିକ୍ରମଣ ବିରୋଧୀ ଅଭିଯାନ ଚଳାଇଥିଲା। ଏହି ସମୟରେ ୬୯୩ କିଲୋମିଟର ରାଜପଥର ସର୍ବେକ୍ଷଣ କରାଯାଇ ୧,୪୦୩ଟି ନୋଟିସ ଜାରି କରାଯାଇଥିଲା। ଏଥିରେ ବେଆଇନ ସଂରଚନା, ଅନଧିକୃତ ବାଣିଜ୍ୟିକ ପ୍ରବେଶ ପଥ ଏବଂ ବିନା ଅନୁମତିରେ ନିର୍ମିତ ମିଡିଆନ୍ କଟ୍ ସାମିଲ ଥିଲା। କାର୍ଯ୍ୟାନୁଷ୍ଠାନ ଅନୁସାରେ ୩୬୧ଟି ବେଆଇନ ପ୍ରବେଶ ପଥ ଏବଂ ଅତିକ୍ରମଣ ହଟାଯାଇଥିଲା ଓ ୧୫୦ଟି ଅନଧିକୃତ ମିଡିଆନ୍ ଗ୍ୟାପ୍ ସ୍ଥାୟୀ ଭାବେ ବନ୍ଦ କରାଯାଇଥିଲା। ଏହି ଅଭିଯାନ ଜିଲ୍ଲା ମାଜିଷ୍ଟ୍ରେଟ ଏବଂ ପୋଲିସ ଅଧୀକ୍ଷକମାନଙ୍କ ସହଯୋଗରେ ପରିଚାଳିତ ହୋଇଥିଲା।

ସମ୍ପ୍ରତି ସୋମନାଥ–ଦ୍ୱାରକା ରାଜପଥରେ ବିଶେଷ ଅଭିଯାନ ଚଳାଇ ବାରଡିଆ ଏବଂ ‘ଅନେଷ୍ଟ ହୋଟେଲରୁ ହାତୀ ଚୌକ’ ପର୍ଯ୍ୟନ୍ତ ଅଂଚଳରୁ ଶତାଧିକ ଅତିକ୍ରମଣ ହଟାଯାଇଥିଲା। ମନ୍ତ୍ରଣାଳୟ କହିଛି ଯେ, ଏହା କେବଳ ଆଇନ ପ୍ରୟୋଗର କାର୍ଯ୍ୟାନୁଷ୍ଠାନ ନୁହେଁ, ବରଂ ସଡ଼କ ସୁରକ୍ଷାର ଏକ ପଦକ୍ଷେପ। ଅତିକ୍ରମଣ ହଟିବା ଫଳରେ ଦୃଶ୍ୟମାନତା ପୁନଃସ୍ଥାପିତ ହୁଏ, ଯାତାୟାତ ପ୍ରବାହ ସୁଧୁରେ, ଜରୁରୀକାଳୀନ ସେବା ପାଇଁ ସ୍ଥାନ ମିଳେ ଏବଂ ଦୁର୍ଘଟଣାର ଆଶଙ୍କା କମିଯାଏ।

-----------------

---------------

ହିନ୍ଦୁସ୍ଥାନ ସମାଚାର / ଗଗନ