ଗୁରୁ ପୂର୍ଣ୍ଣିମା – ଜୀବନକୁ ସମର୍ପଣ, ସେବା ଏବଂ ପୂର୍ଣ୍ଣତା ସହ ଯୋଡ଼ିବାର ସୁଯୋଗ : ସ୍ୱାମୀ ଚିଦାନନ୍ଦ ସରସ୍ୱତୀ

ଋଷିକେଶ, ୨୯ ଜୁଲାଇ (ହି.ସ.)- ଗୁରୁ ପୂର୍ଣ୍ଣିମା ଅବସରରେ ପରମାର୍ଥ ନିକେତନରେ ବୁଧବାର ଗୁରୁ ପୂଜନ ଏବଂ ପାଦୁକା ପୂଜନ ସମାରୋହ ଶ୍ରଦ୍ଧା ଓ ଆଧ୍ୟାତ୍ମିକ ଉଲ୍ଲାସ ସହିତ ଆୟୋଜିତ ହୋଇଥିଲା। ଏହି ଅବସରରେ ପରମାର୍ଥ ପୀଠାଧୀଶ୍ୱର ସ୍ୱାମୀ ଚିଦାନନ୍ଦ ସରସ୍ୱତୀ ଦେଶବାସୀ ଏବଂ ବିଶ୍ୱର ବିଭିନ୍ନ ସ୍ଥାନର ଶ୍ରଦ୍ଧାଳୁମାନଙ୍କୁ ଗୁରୁ ପୂର୍ଣ୍ଣିମାର ଶୁଭେଚ୍ଛା ଜଣାଇ ପରମ୍ପରାର ସଂରକ୍ଷଣ ସହ ପରିବେଶ ବଂଚାଇବାକୁ ଆହ୍ୱାନ କରିଥିଲେ।

ଗୁରୁ ପୂର୍ଣ୍ଣିମା : ଜୀବନକୁ ସମର୍ପଣ, ସେବା ଏବଂ ପୂର୍ଣ୍ଣତା ସହ ଯୋଡ଼ିବାର ସୁଯୋଗ : ସ୍ୱାମୀ ଚିଦାନନ୍ଦ ସରସ୍ୱତୀ

ସ୍ୱାମୀ ଚିଦାନନ୍ଦ ସରସ୍ୱତୀ କହିଥିଲେ ଯେ, ଗୁରୁ ପୂର୍ଣ୍ଣିମା କେବଳ ଗୁରୁଙ୍କ ପ୍ରତି ଶ୍ରଦ୍ଧା ଏବଂ କୃତଜ୍ଞତା ପ୍ରକାଶ କରିବାର ପର୍ବ ନୁହେଁ, ବରଂ ଜୀବନକୁ ସମର୍ପଣ, ସେବା ଏବଂ ପୂର୍ଣ୍ଣତା ସହ ଯୋଡ଼ିବାର ଏକ ସୁଯୋଗ। ସେ କହିଥିଲେ ଯେ ଭାରତୀୟ ଗୁରୁ ପରମ୍ପରା ମନୁଷ୍ୟକୁ ଜ୍ଞାନ ସହ ପ୍ରକୃତି, ସଂସ୍କୃତି ଏବଂ ସମଗ୍ର ସୃଷ୍ଟି ସହ ସନ୍ତୁଳିତ ଜୀବନ ବିତାଇବାକୁ ପ୍ରେରଣା ଦେଇଥାଏ।

ଗୁରୁ ପୂର୍ଣ୍ଣିମା ଜୀବନରେ ଆଲୋକ, ଆତ୍ମବୋଧ ଏବଂ ଜାଗରଣର ପର୍ବ

ସେ ଆଦି ଗୁରୁ ଶଙ୍କରାଚାର୍ଯ୍ୟ, ମହର୍ଷି ବେଦବ୍ୟାସ ଏବଂ ସମ୍ପୂର୍ଣ୍ଣ ଗୁରୁ ପରମ୍ପରାକୁ ପ୍ରଣାମ ଜଣାଇ କହିଥିଲେ ଯେ, ଗୁରୁ ପୂର୍ଣ୍ଣିମା ହେଉଛି ଜୀବନରେ ଆଲୋକ, ଆତ୍ମବୋଧ ଏବଂ ଜାଗରଣର ପର୍ବ। ସେ କହିଥିଲେ ଯେ, ଗୁରୁ ବ୍ୟକ୍ତିଙ୍କୁ ଅଜ୍ଞାନ, ଚାପ ଏବଂ ଭ୍ରମରୁ ମୁକ୍ତ କରି ସଠିକ୍ ପଥରେ ଆଗକୁ ବଢ଼ିବାକୁ ପ୍ରେରଣା ଦିଅନ୍ତି।

ଗୁରୁ ପୂର୍ଣ୍ଣିମା ସମାରୋହରେ ଭାରତ ସମେତ ବିଶ୍ୱର ବିଭିନ୍ନ ଦେଶରୁ ଆସିଥିବା ଶ୍ରଦ୍ଧାଳୁମାନେ ସ୍ୱାମୀ ଚିଦାନନ୍ଦ ସରସ୍ୱତୀଙ୍କ ଶ୍ରୀଚରଣରେ ଭଜନ, କୀର୍ତନ ଏବଂ ଶ୍ରଦ୍ଧାଭାବ ସହ ନିଜ ଭାବନା ପ୍ରକାଶ କରିଥିଲେ। ପରମାର୍ଥ ଗୁରୁକୁଳର ଋଷିକୁମାରମାନେ ମଧ୍ୟ ଗୁରୁ-ଶିଷ୍ୟ ପରମ୍ପରାର ଦିବ୍ୟତାକୁ ପ୍ରଦର୍ଶନ କରି କାର୍ଯ୍ୟକ୍ରମରେ ଭାଗ ନେଇଥିଲେ।

ପରମ୍ପରାର ସଂରକ୍ଷଣ ସହ ପରିବେଶର ସୁରକ୍ଷା ମଧ୍ୟ ଆବଶ୍ୟକ

ସ୍ୱାମୀ ଚିଦାନନ୍ଦ ସରସ୍ୱତୀ କହିଥିଲେ ଯେ, ବର୍ତମାନ ସମୟରେ ପରମ୍ପରାର ସଂରକ୍ଷଣ ସହ ପରିବେଶର ସୁରକ୍ଷା ମଧ୍ୟ ଆବଶ୍ୟକ। ସେ କହିଥିଲେ ଯେ, ଯଦି ଆଗାମୀ ପିଢ଼ିକୁ ସୁରକ୍ଷିତ ରଖିବାକୁ ହେବ, ତେବେ ପ୍ରକୃତି ଏବଂ ସଂସ୍କୃତି ଉଭୟଙ୍କୁ ବଂଚାଇବାକୁ ପଡ଼ିବ। ସେ ଶ୍ରଦ୍ଧାଳୁମାନଙ୍କୁ ଗୁରୁ ପୂର୍ଣ୍ଣିମା ଅବସରରେ ଗୋଟିଏ ଚାରା ଲଗାଇ ତାହାର ଯତ୍ନ ନେବାକୁ ସଙ୍କଳ୍ପ କରିବା ପାଇଁ ଆହ୍ୱାନ କରିଥିଲେ।

ସେ କହିଥିଲେ ଯେ, ବୃକ୍ଷରୋପଣ କେବଳ ପରିବେଶ ସଂରକ୍ଷଣର କାର୍ଯ୍ୟ ନୁହେଁ, ବରଂ ପୃଥିବୀ, ଆଗାମୀ ପିଢ଼ି ଏବଂ ମାନବତା ପ୍ରତି ଦାୟିତ୍ୱ ପାଳନ କରିବାର ଏକ ମାଧ୍ୟମ। ଗୋଟିଏ ବୃକ୍ଷ ଗୁରୁଙ୍କ ବାର୍ତାକୁ ଜୀବନରେ ପ୍ରତିଫଳିତ କରିବାର ଜୀବନ୍ତ ପ୍ରତୀକ ହୋଇପାରେ।

ଏହି ଅବସରରେ ସ୍ୱାମୀ ଚିଦାନନ୍ଦ ସରସ୍ୱତୀ ଅନଲାଇନ୍ ମାଧ୍ୟମରେ ବିଶ୍ୱସ୍ତରୀୟ ପରମାର୍ଥ ପରିବାରର ଶ୍ରଦ୍ଧାଳୁମାନଙ୍କୁ ଆଶୀର୍ବଚନ ପ୍ରଦାନ କରିଥିଲେ ଏବଂ ସମସ୍ତଙ୍କୁ ନିଜ ସମୟ, ପ୍ରତିଭା, ସଙ୍କଳ୍ପ ଏବଂ ପ୍ରଯୁକ୍ତିକୁ ମାନବତାର ସେବାରେ ବ୍ୟବହାର କରିବାକୁ ଆହ୍ୱାନ କରିଥିଲେ।

------------------

---------------

ହିନ୍ଦୁସ୍ଥାନ ସମାଚାର / ଗଗନ