ନୂଆଦିଲ୍ଲୀ, ୧୦ ଅଗଷ୍ଟ (ହି.ସ.)- କଂଗ୍ରେସ ଦାବି କରିଛି ଯେ ଲୋକସଭା ବାଚସ୍ପତି ଓମ୍ ବିର୍ଲା ଗୃହମନ୍ତ୍ରୀ ଅମିତ ଶାହାଙ୍କୁ ଗୃହକୁ ଡକାଇ ଦିଲ୍ଲୀରେ ବିକ୍ଷୋଭକାରୀ ଛାତ୍ରଙ୍କ ବିରୋଧରେ ପୋଲିସ ବର୍ବରତା ଉପରେ ବିସ୍ତୃତ ବିବୃତି ଦେବାକୁ ନିର୍ଦ୍ଦେଶ ଦିଅନ୍ତୁ । କଂଗ୍ରେସ ସାଧାରଣ ସମ୍ପାଦକ ତଥା ଲୋକସଭା ସାଂସଦ କେ. ସି. ଭେନୁଗୋପାଳ ଏହି ପ୍ରସଙ୍ଗରେ ଲୋକସଭା ବାଚସ୍ପତିଙ୍କୁ ଚିଠି ଲେଖି ମାମଲାର ତୁରନ୍ତ ସଂସଦୀୟ ତଦନ୍ତ ଏବଂ ଗୃହମନ୍ତ୍ରୀଙ୍କ ଉତରଦାୟିତ୍ୱ ସୁନିଶ୍ଚିତ କରିବାକୁ ନିବେଦନ କରିଛନ୍ତି ।
ପବ୍ଲିକ୍ ଆକାଉଂଟସ୍ କମିଟିର ଅଧ୍ୟକ୍ଷ ଭାବରେ ଲିଖିତ ଚିଠିରେ ଭେନୁଗୋପାଳ କହିଛନ୍ତି ଯେ, ଦିଲ୍ଲୀରେ ସେମାନଙ୍କର ଗଣତାନ୍ତ୍ରିକ ଅଧିକାର ପ୍ରୟୋଗ କରୁଥିବା ଛାତ୍ରମାନଙ୍କ ବିରୋଧରେ ପୋଲିସ ଦ୍ୱାରା ଅତ୍ୟଧିକ ବଳ ପ୍ରୟୋଗ, ଯେଉଁଥିରେ ପେଲେଟ ବନ୍ଧୁକ ଗୁଳି ଚାଳନା ରିପୋର୍ଟ ମଧ୍ୟ ସାମିଲ୍ ରହିଛି, ଯାହାକି ଏକ ଗୁରୁତର ଜାତୀୟ ଚିନ୍ତାର ବିଷୟ । ଏହି ମାମଲାରେ ତତ୍କାଳ ସଂସଦର ତଦାରଖ ଏବଂ ଯାଂଚ୍ ର ଜରୁରୀ ଆବଶ୍ୟକତା ରହିଛି ।
ଚିଠିରେ ଭେନୁଗୋପାଳ କହିଛନ୍ତି ଯେ, ଯେହେତୁ ଦିଲ୍ଲୀ ପୋଲିସ ସିଧାସଳଖ କେନ୍ଦ୍ର ଗୃହ ମନ୍ତ୍ରଣାଳୟ ଅଧୀନରେ କାର୍ଯ୍ୟ କରେ, ତେଣୁ ପୋଲିସ କାର୍ଯ୍ୟାନୁଷ୍ଠାନର ଚୂଡ଼ାନ୍ତ ଦାୟିତ୍ୱ ଗୃହମନ୍ତ୍ରୀ ଅମିତ ଶାହାଙ୍କ ଉପରେ ରହିଛି । ସେ ଭାରତ ସରକାରଙ୍କ କାର୍ଯ୍ୟ ଆବଂଟନ ନିୟମର ଏବଂ ସମ୍ବିଧାନର ଧାରା ୭୭କୁ ଉଲ୍ଲେଖ କରି କହିଥିଲେ ଯେ, ଗୃହ ମନ୍ତ୍ରୀ ତାଙ୍କ ମନ୍ତ୍ରଣାଳୟର ଅଧିକାର କ୍ଷେତ୍ର ସହ ଜଡ଼ିତ ସମସ୍ତ ବିଷୟ ପାଇଁ ଉତରଦାୟୀ । ସମ୍ବିଧାନର ଧାରା ୭୫ (୩) ଅନୁଯାୟୀ ଲୋକସଭାରେ ମନ୍ତ୍ରୀ ପରିଷଦର ସାମୂହିକ ଦାୟିତ୍ୱ ବିଷୟରେ ଉଲ୍ଲେଖ କରି ସେ କହିଥିଲେ ଯେ, କାର୍ଯ୍ୟପାଳିକା ଏହା ଅଧୀନରେ କରାଯାଇଥିବା ପ୍ରତ୍ୟେକ କାର୍ଯ୍ୟ ପାଇଁ ସଂସଦ ନିକଟରେ ଉତରଦାୟୀ ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
