ଭୁବନେଶ୍ୱର, 11 ଅଗଷ୍ଟ (ହି.ସ.)କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ବିରୋଧରେ ରାହୁଲ ଗାନ୍ଧୀ ଓ କଂଗ୍ରେସ ପକ୍ଷରୁ କରାଯାଉଥିବା ଅଭିଯୋଗକୁ ନେଇ ପୂର୍ବତନ କେନ୍ଦ୍ରମନ୍ତ୍ରୀ ତଥା ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି।
ନିଜ ସୋସିଆଲ ମିଡିଆ ପୋଷ୍ଟରେ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ଗୃହମନ୍ତ୍ରୀ ଅମିତ ଶାହଙ୍କ ବିରୋଧରେ ବିନା ତଥ୍ୟ ଓ ପ୍ରମାଣରେ ଅଭିଯୋଗ ଆଣିବା ରାହୁଲ ଗାନ୍ଧୀ ଓ କଂଗ୍ରେସର ରାଜନୈତିକ ହତାଶାକୁ ପ୍ରତିଫଳିତ କରୁଛି। ସରକାର ପ୍ରତ୍ୟେକ ପ୍ରସଙ୍ଗରେ ସଂସଦରେ ଆଲୋଚନା ପାଇଁ ପ୍ରସ୍ତୁତ ଥିବା ସେ କହିଛନ୍ତି। କଂଗ୍ରେସ ସଂସଦର କାର୍ଯ୍ୟରେ ବାଧା ସୃଷ୍ଟି କରି ଦେଶ ଓ ଯୁବପିଢ଼ିଙ୍କ ସ୍ୱାର୍ଥକୁ କ୍ଷତି ପହଞ୍ଚାଉଛି ବୋଲି ପ୍ରଧାନ ଅଭିଯୋଗ କରିଛନ୍ତି। ସଦନରେ ଆଲୋଚନା ହେଲେ କଂଗ୍ରେସ ନେତାମାନେ ଉତ୍ତର ଶୁଣିବା ପରିବର୍ତ୍ତେ ବାହାରେ ହଙ୍ଗାମା କରୁଥିବା ସେ ଦାବି କରିଛନ୍ତି।
କଂଗ୍ରେସର ‘ସିଲେକ୍ଟିଭ୍ ଡେମୋକ୍ରାସି’କୁ ନେଇ ମଧ୍ୟ ଧର୍ମେନ୍ଦ୍ର ପ୍ରଧାନ ପ୍ରଶ୍ନ ଉଠାଇଛନ୍ତି। ଝାଡ଼ଖଣ୍ଡରେ ଛାତ୍ରମାନଙ୍କ ସହ ଘଟିଥିବା ଘଟଣାକୁ ନେଇ ରାହୁଲ ଗାନ୍ଧୀଙ୍କ ନିରବତା ଉପରେ ସେ ପ୍ରଶ୍ନ କରିଛନ୍ତି। ପ୍ରତ୍ୟେକ ପ୍ରସଙ୍ଗରେ ସାମ୍ବାଦିକ ସମ୍ମିଳନୀ କରୁଥିବା ରାହୁଲ ଗାନ୍ଧୀ ଏହି ମାମଲାରେ କାହିଁକି ଚୁପ୍ ଅଛନ୍ତି ବୋଲି ସେ ପଚାରିଛନ୍ତି।
ଦେଶର ଯୁବପିଢ଼ି କଂଗ୍ରେସର ଏହି ଦୋହରା ମାନଦଣ୍ଡକୁ ବୁଝିସାରିଛି ବୋଲି ଧର୍ମେନ୍ଦ୍ର ପ୍ରଧାନ କହିଛନ୍ତି। ଗଣତନ୍ତ୍ରରେ ତାନାଶାହୀ ପାଇଁ କୌଣସି ସ୍ଥାନ ନାହିଁ ଏବଂ ରାହୁଲ ଗାନ୍ଧୀ ଓ କଂଗ୍ରେସ ଏହା ବୁଝିବା ଆବଶ୍ୟକ ବୋଲି ସେ ମତ ଦେଇଛନ୍ତି।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
