ମାଲକାନଗିରି,୧୨ ଅଗଷ୍ଟ (ହି.ସ.) - ମାଲକାନଗିରି ବନଖଣ୍ଡ ଅଧୀନ ବାଲିମେଳା ରେଞ୍ଜର ଏମ୍ ଭି-୧୦୪ ଗ୍ରାମର ଏକ ବ୍ୟକ୍ତିଗତ ପୋଖରୀରୁ ପ୍ରାୟ ୪ ଫୁଟ ଲମ୍ବର ଏକ ମଗର କୁମ୍ଭୀରକୁ ବନ ବିଭାଗର ରାପିଡ୍ ରେସ୍ପନ୍ସ ଟିମ୍ ସଫଳତାର ସହ ଆଜି ଉଦ୍ଧାର କରିଛି। ବାରମ୍ବାର ପ୍ରୟାସ ଓ ନିରନ୍ତର ନିରୀକ୍ଷଣ ପରେ ଏହି ଉଦ୍ଧାର ଅଭିଯାନ ସଫଳ ହୋଇଛି।
ସୂଚନା ଅନୁଯାୟୀ, ୧୦ ଅଗଷ୍ଟ ୨୦୨୬ରେ ଏମ୍ଭି-୧୦୪ ଗ୍ରାମର ଏକ ବ୍ୟକ୍ତିଗତ ପୋଖରୀରେ କୁମ୍ଭୀର ଦେଖାଯାଇଥିବା ନେଇ ବନ ବିଭାଗକୁ ଖବର ମିଳିଥିଲା। ଖବର ପାଇବା ପରେ ବାଲିମେଳା ରେଞ୍ଜର କ୍ଷେତ୍ର କର୍ମଚାରୀଙ୍କ ସହ ରାପିଡ୍ ରେସ୍ପନ୍ସ ଟିମ୍ ତୁରନ୍ତ ଘଟଣାସ୍ଥଳରେ ମୁତୟନ କରାଯାଇଥିଲା। କୁମ୍ଭୀରଟିର ଗତିବିଧି ଉପରେ ଟିମ୍ ପକ୍ଷରୁ ନିରନ୍ତର ନଜର ରଖାଯାଇଥିଲା। ଏହାକୁ ସୁରକ୍ଷିତ ଭାବେ ଧରିବା ପାଇଁ ଏକାଧିକ ଥର ପ୍ରୟାସ କରାଯାଇଥିଲେ ମଧ୍ୟ ପ୍ରାରମ୍ଭିକ ଭାବେ ସଫଳତା ମିଳିନଥିଲା। ତେବେ ମାଲକାନଗିରି ଡ଼ିଏଫଓ ସାଇ କିରଣ ଓ ଏସିଏଫ ମାନଙ୍କ ନିରନ୍ତର ନିରୀକ୍ଷଣ ଏବଂ ମାର୍ଗଦର୍ଶନରେ ଶେଷରେ କୁମ୍ଭୀରଟିକୁ ସୁରକ୍ଷିତ ଭାବେ ଧରିବାରେ ସଫଳ ହୋଇଥିଲା। ଉଦ୍ଧାର ପରେ କୁମ୍ଭୀରଟିକୁ ବର୍ତ୍ତମାନ ଚିକିତ୍ସା ନିରୀକ୍ଷଣରେ ରଖାଯାଇଛି। ଆବଶ୍ୟକ ସ୍ୱାସ୍ଥ୍ୟ ପରୀକ୍ଷା ଓ ବିଶେଷଜ୍ଞ ମୂଲ୍ୟାଙ୍କନ ପରେ ଏହାକୁ ଉପଯୁକ୍ତ ପ୍ରାକୃତିକ ଆବାସରେ ଛାଡ଼ିବା ପାଇଁ ବନ ବିଭାଗ ପକ୍ଷରୁ ପଦକ୍ଷେପ ନିଆଯିବ। ବନ ବିଭାଗ ପକ୍ଷରୁ ସ୍ଥାନୀୟ ଲୋକଙ୍କୁ ବନ୍ୟଜନ୍ତୁଙ୍କ ପ୍ରତି ସଚେତନ ଓ ସତର୍କ ରହିବାକୁ ଆହ୍ୱାନ କରାଯାଇଛି। ପୋଖରୀ, ନଦୀ କିମ୍ବା ଅନ୍ୟ ଜଳାଶୟରେ କୁମ୍ଭୀର ଦେଖାଗଲେ ତାହାକୁ ନିଜେ ଧରିବା, ଘଉଡ଼ାଇବା କିମ୍ବା ଭିଡ଼ କରି ଉତ୍ତେଜିତ କରିବାରୁ ବିରତ ରହିବାକୁ କୁହାଯାଇଛି। ବିଶେଷକରି ଶିଶୁ ଓ ଗୃହପାଳିତ ପଶୁଙ୍କୁ ଜଳାଶୟ ନିକଟକୁ ନେବାରୁ ଦୂରେଇ ରହିବା ସହ କୌଣସି ବନ୍ୟଜନ୍ତୁ ଦେଖାଗଲେ ତୁରନ୍ତ ବନ ବିଭାଗକୁ ଖବର ଦେବାକୁ ପରାମର୍ଶ ଦିଆଯାଇଛି। ବନ୍ୟଜନ୍ତୁ ସୁରକ୍ଷା ଆଇନର ଉଦ୍ଦେଶ୍ୟ କେବଳ ବନ୍ୟଜନ୍ତୁଙ୍କୁ ସୁରକ୍ଷା ଦେବା ନୁହେଁ, ବରଂ ମଣିଷ ଓ ବନ୍ୟଜନ୍ତୁଙ୍କ ମଧ୍ୟରେ ସୁରକ୍ଷିତ ସହାବସ୍ଥାନ ସୁନିଶ୍ଚିତ କରିବା। ତେଣୁ ଏପରି ଘଟଣାରେ ଲୋକେ ଆଇନକୁ ହାତକୁ ନନେଇ ବନ ବିଭାଗକୁ ସହଯୋଗ କରିବା ଆବଶ୍ୟକ। ମଣିଷର ସୁରକ୍ଷା ସହ ବନ୍ୟଜନ୍ତୁର ସୁରକ୍ଷା—ଉଭୟକୁ ସମାନ ଗୁରୁତ୍ୱ ଦେଇ ମାଲକାନଗିରି ବନଖଣ୍ଡ ପକ୍ଷରୁ ଏହି ଉଦ୍ଧାର ଅଭିଯାନ କରାଯାଇଥିବା ବେଳେ ଏହା ସ୍ଥାନୀୟ ଅଞ୍ଚଳରେ ସଚେତନତାର ଏକ ଉଦାହରଣ ସୃଷ୍ଟି କରିଛି।
---------------
ହିନ୍ଦୁସ୍ଥାନ ସମାଚାର / ଶିବବ୍ରତ
