ସମ୍ବଲପୁର, ୧୨, ଅଗଷ୍ଟ (ହି.ସ.) ସମ୍ବଲପୁର ସହରର ଦୁର୍ଗାପାଲି ଠାରେ ଥିବା ଚର୍ଚ୍ଚିତ ଭିକ୍ଷୁକ ଥଇଥାନ କେନ୍ଦ୍ର ଜୀବନ ପଥ ପାଇଁ ସହାୟତାର ହାତ ବଢ଼ାଇଛନ୍ତି ସହରର କିଛି ବିଶିଷ୍ଟ ଯୁବ ସମାଜସେବୀ । 'ଓଁ ଵାବା ସେବା ସଙ୍ଗଠନ'ର ଯୁବ ସମାଜସେବୀ ମାନେ ଜୀବନ ପଥରେ ରହୁଥିବା ଅନ୍ତୋବାସୀଙ୍କ ସମସ୍ୟାକୁ ଦୀର୍ଘ ଦିନ ଧରି ଅନୁଧ୍ୟାନ କରିବା ପରେ ଆଜି ଏକ ନିଆରା ଢଙ୍ଗରେ ସହାୟତାର ହାତ ବଢ଼ାଇଛନ୍ତି । ସୂଚନାନୁଯାୟୀ ସଙ୍ଗଠନର ମୁଖ୍ୟ ଅରବିନ୍ଦ ମେହର ଭିକ୍ଷୁକ ଥଇଥାନ କେନ୍ଦ୍ର ଜୀବନ ପଥ ପରିସରକୁ ବୁଲିବାକୁ ଯାଇ ସମସ୍ତ ଅନ୍ତେବାସୀଙ୍କ ସହ ମିଶି ସେମାନଙ୍କର ସୁବିଧା ଅସୁବିଧା ପଚାରି ବୁଝିଥିଲେ । ଏଥିରେ ସେ ଜାଣିବାକୁ ପାଇଥିଲେ ଯେ 'ଜୀବନ ପଥ'ରେ ରହୁଥିବା ଅନ୍ତେବାସୀ ମାନଙ୍କ ମଧ୍ୟରେ ସର୍ବାଧିକ ସଂଖ୍ୟାରେ ରହିଛନ୍ତି ବୃଦ୍ଧବୃଦ୍ଧା ଓ ଶାରୀରିକ ଅକ୍ଷମ ବ୍ୟକ୍ତି ବିଶେଷ । ଯେଉଁ ମାନେ ସେମାନଙ୍କ ନିତ୍ୟ ବ୍ୟବହାର୍ଯ୍ୟ ଲୁଗାପଟା ଧୋଇବା ପାଇଁ ଅକ୍ଷମ । ସେହିଠାରୁ ଅରବିନ୍ଦ ଅନ୍ତୋବାସୀଙ୍କ ସୁବିଧା ପାଇଁ ତାଙ୍କର ସ୍ୱେଚ୍ଛାସେବୀ ସଙ୍ଗଠନର ସଦସ୍ୟଙ୍କ ସହ ବିଚାର ବିମର୍ଷ କରି ଶେଷରେ 'ଓଁ ବାବା ସେବା ସଂଗଠନ' ପକ୍ଷରୁ ଏକ ୱାସିଙ୍ଗ ମେସିନ ପ୍ରଦାନ କରିବାର ନିଷ୍ପତ୍ତି ନେଇଥିଲେ । ଆଜି ଅନୁଷ୍ଠାନର ସମସ୍ତ ଯୁବ ସମାଜସେବୀ ମାନେ ମିଳିତ ଭାବେ ଏକ ନୂତନ ୱାସିଙ୍ଗ ମେସିନ ନେଇ ଭିକ୍ଷୁକ ଥଇଥାନ କେନ୍ଦ୍ର ଜୀବନ ପଥ କୁ ଯାଇ ଅନ୍ତୋବାସୀଙ୍କୁ ହସ୍ତାନ୍ତର କରିଥିଲେ । ଏହି ଅବସରର ସମସ୍ତ ଅନ୍ତୋବାସୀ ମାନଙ୍କ ପାଇଁ ମଧ୍ୟାହ୍ନ ଭୋଜନର ବ୍ୟବସ୍ଥା ମଧ୍ୟ କରାଯାଇଥିଲା । ଏଥି ସହିତ ସମସ୍ତ ଅନ୍ତୋବାସୀଙ୍କ ନିତ୍ୟ ବ୍ୟବହାର ପାଇଁ ସେ ଗାମୁଛା ମଧ୍ୟ ପ୍ରଦାନ କରିଥିଲେ ।
ଆଜିର କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ବିଜେପି ରାଜ୍ୟ ପ୍ରବକ୍ତା ମାନସ ରଞ୍ଜନ ବକ୍ସି ଯୋଗ ଦେଇଥିଲେ । 'ମାନବ ସେବା ହିଁ ଈଶ୍ୱର ସେବା', ଅନ୍ୟର ସୁଖ, ଶାନ୍ତି ଓ ସେମାନଙ୍କ ମୁହଁରେ ହସ ଫୁଟାଇବା ପାଇଁ ନିଜକୁ ସମର୍ପିତ କରି ନିସ୍ୱାର୍ଥପର ସେବା କରିବା ନିଶ୍ଚିତ ଭାବରେ ଏକ ପ୍ରଶଂସନୀୟ କାର୍ଯ୍ୟ । ଆଜିର ସ୍ୱାର୍ଥପର ଦୁନିଆଁରେ ଅରବିନ୍ଦ ଓ ତାଙ୍କ ସାଥିଗଣ ସମସ୍ତ ଯୁବକ ସମାଜ ପାଇଁ ଏକ ପ୍ରେରଣାର ଉତ୍ସ ବୋଲି ଶ୍ରୀ ବକ୍ସି କହିଥିଲେ । ଏହି କାର୍ଯ୍ୟକ୍ରମରେ ସଙ୍ଗଠନର ସଦସ୍ୟ ତୃପ୍ତି ରଞ୍ଜନ ପଣ୍ଡା, ସନ୍ୟାସୀ ପ୍ରଧାନ, ରାଜେଶ ସିଂ, ରାହୁଲ ସାହୁ, ଅମିତ୍ ଦୋରା, ଲୋକେଶ କୁମାର, ଶିବରାମ କୁମ୍ଭାର, ପ୍ରେମ ସାହାଣୀ ପ୍ରମୁଖ ଉପସ୍ଥିତ ରହି ସମସ୍ତ ସେବା କାର୍ଯ୍ୟ ତୁଲାଇଥିଲେ । ଭିକ୍ଷୁକ ଥଇଥାନ କେନ୍ଦ୍ର ଜୀବନ ପଥର ପରିଚାଳକ ରାଜେଶ ସାହୁ, ପ୍ରିୟଙ୍କା ଦାସ, ପ୍ରମିଳା ମିଞ୍ଜ ପ୍ରମୁଖ ଏହି କାର୍ଯ୍ୟରେ ସହାୟତା କରିଥିଲେ ।
---------------
ହିନ୍ଦୁସ୍ଥାନ ସମାଚାର / ଶୈଳେଶ
