ନୂଆଦିଲ୍ଲୀ, ୧୩ ଅଗଷ୍ଟ (ହି.ସ.) - ରାଜ୍ୟସଭା ଗୁରୁବାର ଖଣି ଏବଂ ଖଣିଜ (ବିକାଶ ଏବଂ ନିୟମନ) ସଂଶୋଧନ ବିଧେୟକ, ୨୦୨୬ ପାରିତ କରିବା ପରେ ୨୭୧ତମ ଅଧିବେଶନକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ କରିଦେଇଛି। ଅଧିବେଶନର ସମାପନ ସମୟରେ ସଭାପତି ସି.ପି. ରାଧାକୃଷ୍ଣନ ସଦନରେ ଲଗାତାର ବାଧା ଏବଂ ହଙ୍ଗାମା ଉପରେ ଗଭୀର ଚିନ୍ତା ପ୍ରକାଶ କରି କହିଛନ୍ତି ଯେ ଏହା ଗୁରୁତ୍ୱପୂର୍ଣ୍ଣ ଜାତୀୟ ପ୍ରସଙ୍ଗଗୁଡ଼ିକ ଉପରେ ସାର୍ଥକ ଆଲୋଚନା ଏବଂ ବିତର୍କ ପାଇଁ ଉପଲବ୍ଧ ମୂଲ୍ୟବାନ ସମୟର କ୍ଷତି କରିଛି।

ସଭାପତି ନିଜ ସମାପନ ଅଭିଭାଷଣରେ କହିଛନ୍ତି ଯେ ଅଧିବେଶନ ସମୟରେ ଲଗାତାର ଅବ୍ୟବସ୍ଥା ଏବଂ ବାରମ୍ବାର ବାଧା କାରଣରୁ ସଦନର କାର୍ଯ୍ୟ ପ୍ରଭାବିତ ହୋଇଛି। ଏହା ସତ୍ୱେ ରାଜ୍ୟସଭା ନିଜର ମୁଖ୍ୟ ବିଧାନଗତ ଦାୟିତ୍ୱ ପୂରଣ କରି ୧୨ଟି ବିଧେୟକ ଉପରେ ବିଚାର କରିଛି ଏବଂ ସେଗୁଡ଼ିକୁ ପାରିତ କିମ୍ବା ଫେରାଇଛି। ସେ କହିଛନ୍ତି ଯେ ଯଦି ସମସ୍ତ ସଦସ୍ୟ ସାମୂହିକ ଭାବେ ଅଂଶଗ୍ରହଣ କରିଥାନ୍ତେ, ନିଜର ଗୁରୁତ୍ୱପୂର୍ଣ୍ଣ ପ୍ରସ୍ତାବ ଦେଇଥାନ୍ତେ ଏବଂ ସାର୍ଥକ ବିଚାରବିମର୍ଶ କରିଥାନ୍ତେ ତେବେ ପରିସ୍ଥିତି ନିଶ୍ଚିତ ଭାବେ ଭିନ୍ନ ହୋଇଥାନ୍ତା।

ରାଧାକୃଷ୍ଣନ କହିଛନ୍ତି ଯେ ଅଧିବେଶନ ସମୟରେ ରାଜ୍ୟସଭା କେବଳ ୩୭ ଘଂଟା ୪୯ ମିନିଟ କାମ କରିଛି ଏବଂ ସଦନର ଉତ୍ପାଦକତା ୩୯.୧୭ ପ୍ରତିଶତ ରହିଛି। ସଦସ୍ୟମାନଙ୍କ ପାଇଁ ୨୮୫ଟି ତାରକା ଚିହ୍ନିତ ପ୍ରଶ୍ନ, ୩୮୦ଟି ଶୂନ୍ୟକାଳ ମାମଲା ଏବଂ ୩୮୦ଟି ବିଶେଷ ଉଲ୍ଲେଖ ଉଠାଇବାର ସୁଯୋଗ ଥିଲା, କିନ୍ତୁ ଦୁଃଖର କଥା ଯେ ଏଥିରୁ କେବଳ ୧୬ଟି ପ୍ରଶ୍ନ, ୫୨ଟି ଶୂନ୍ୟକାଳ ମାମଲା ଏବଂ ୯୩ଟି ବିଶେଷ ଉଲ୍ଲେଖ ହିଁ ସଦନରେ ନିଆଯାଇପାରିଲା।

ସେ କହିଛନ୍ତି ଯେ ସଦନରେ ନିଜ କଥା ରଖିବାର ସୁଯୋଗ ଥିଲା, କିନ୍ତୁ ଯେଉଁମାନଙ୍କୁ ଆମେ ପ୍ରତିନିଧିତ୍ୱ କରୁଛୁ, ସେମାନଙ୍କ ସ୍ୱର ଉଠାଇବା ପାଇଁ ମିଳିଥିବା ସୁଯୋଗଗୁଡ଼ିକର ଆମେ ପୂରା ବ୍ୟବହାର କରିନାହୁଁ।

ସଭାପତି କହିଛନ୍ତି ଯେ ଉଚ୍ଚ ସଦନ ଭାବେ ରାଜ୍ୟସଭାର ଏହି ବିଶିଷ୍ଟ ଦାୟିତ୍ୱ ଅଛି ଯେ ସେ ତର୍କପୂର୍ଣ୍ଣ ବିତର୍କ, ମର୍ଯ୍ୟାଦାପୂର୍ଣ୍ଣ ଅସହମତି ଏବଂ ବିଚାରପୂର୍ବକ ଆଇନ ନିର୍ମାଣର ପରମ୍ପରାକୁ ବଜାୟ ରଖିବ। ବାରମ୍ବାର ହେଉଥିବା ବାଧା ଶେଷରେ ଜନତାଙ୍କ ବିଶ୍ୱାସ ଏବଂ ସେମାନଙ୍କ ଆକାଂକ୍ଷାକୁ ପ୍ରଭାବିତ କରେ। ସେ ସଦସ୍ୟମାନଙ୍କୁ ସର୍ବୋଚ୍ଚ ସଂସଦୀୟ ଆଚରଣର ମାନଦଣ୍ଡ ବଜାୟ ରଖିବା ଏବଂ ସଦନର ମର୍ଯ୍ୟାଦା ତଥା ପବିତ୍ରତାର ସୁରକ୍ଷା କରିବାକୁ ଆହ୍ୱାନ କରିଛନ୍ତି।

ରାଧାକୃଷ୍ଣନ ଅଧିବେଶନର ଉଲ୍ଲେଖନୀୟ ଉପଲବ୍ଧିଗୁଡ଼ିକ ମଧ୍ୟରେ ନୂତନ ନିର୍ବାଚିତ ଏବଂ ମନୋନୀତ ସଦସ୍ୟମାନଙ୍କ ପାଇଁ ଆୟୋଜିତ ଦୁଇ ଦିନିଆ ଓରିଏଂଟେସନ କାର୍ଯ୍ୟକ୍ରମର ମଧ୍ୟ ଉଲ୍ଲେଖ କରିଛନ୍ତି। ସେ କହିଛନ୍ତି ଯେ ଏହି କାର୍ଯ୍ୟକ୍ରମରେ ସଂସଦୀୟ କାର୍ଯ୍ୟପ୍ରଣାଳୀ, ପ୍ରକ୍ରିୟା ଏବଂ ସଦସ୍ୟମାନଙ୍କଠାରୁ ଆଶା କରାଯାଉଥିବା ଆଚରଣର ମାନଦଣ୍ଡ ସମ୍ପର୍କରେ ଉପଯୋଗୀ ସୂଚନା ଦିଆଯାଇଥିଲା। ମୋଟ ୩୫ ଜଣ ସଦସ୍ୟ ଏହି କାର୍ଯ୍ୟକ୍ରମରେ ଅଂଶ ନେଇଥିଲେ। ସେ କାର୍ଯ୍ୟକ୍ରମରେ ନିଜର ସଂସଦୀୟ ଅଭିଜ୍ଞତା ଏବଂ ବ୍ୟବହାରିକ ସୂଚନା ବାଂଟିଥିବା ହରିବଂଶ, କେନ୍ଦ୍ରୀୟ ମନ୍ତ୍ରୀ ଭୂପେନ୍ଦ୍ର ଯାଦବ ତଥା ସାଂସଦ ଘନଶ୍ୟାମ ତିୱାରୀ, ପ୍ରମୋଦ ତିୱାରୀ, ଅରୁଣ ସିଂହ, ଡ. ସସ୍ମିତ ପାତ୍ର, ସୁଜିତ କୁମାର ଏବଂ ଡ. ଜନ ବ୍ରିଟାସଙ୍କର ମଧ୍ୟ ଉଲ୍ଲେଖ କରିଛନ୍ତି।

ସଭାପତି ସଦନରେ ପ୍ରଯୁକ୍ତିର ବଢ଼ୁଥିବା ବ୍ୟବହାରକୁ ମଧ୍ୟ ଅଧିବେଶନର ଗୁରୁତ୍ୱପୂର୍ଣ୍ଣ ବିଶେଷତା ବୋଲି କହିଛନ୍ତି। ସେ କହିଛନ୍ତି ଯେ ‘ବାଣୀ ସେତୁ’ ମାଧ୍ୟମରେ ପ୍ରଥମ ଥର ପାଇଁ ଏଆଇ ଆଧାରିତ ଭାଷା ଅନୁବାଦର ସୁବିଧା ଆରମ୍ଭ କରାଯାଇଛି, ଯାହା ଫଳରେ ସଦସ୍ୟମାନେ ଆଂଚଳିକ ଭାଷାରେ ଦିଆଯାଇଥିବା ଭାଷଣକୁ ନିଜ ପସନ୍ଦର ଭାଷାରେ ଶୁଣିପାରିବେ।

ଅଧିବେଶନର ସମାପନ ସମୟରେ ସଭାପତି ଉପସଭାପତି ଏବଂ ପୀଠାସୀନ ଉପାଧ୍ୟକ୍ଷମାନଙ୍କ ପ୍ୟାନେଲ, ମହାସଚିବ ଏବଂ ସଚିବାଳୟର ଅଧିକାରୀ-କର୍ମଚାରୀମାନଙ୍କ ପ୍ରତି କୃତଜ୍ଞତା ପ୍ରକାଶ କରିଛନ୍ତି। ସେ ସମସ୍ତ ସଦସ୍ୟଙ୍କୁ ସ୍ୱାଧୀନତା ଦିବସର ଶୁଭେଚ୍ଛା ଜଣାଇ ଆଶା ପ୍ରକାଶ କରିଛନ୍ତି ଯେ ପରବର୍ତୀ ଅଧିବେଶନରେ ସମସ୍ତ ସଦସ୍ୟ ସଦନର ମର୍ଯ୍ୟାଦା ବଜାୟ ରଖିବା ଏବଂ ସଂସଦୀୟ ଦାୟିତ୍ୱଗୁଡ଼ିକୁ ଗଣତନ୍ତ୍ରର ସର୍ବୋଚ୍ଚ ପରମ୍ପରା ଅନୁରୂପ ପାଳନ କରିବାର ନୂତନ ସଂକଳ୍ପ ସହିତ ଫେରିବେ। ସମାପନ ପରେ ସଦନରେ ସମ୍ପୂର୍ଣ୍ଣ ‘ବନ୍ଦେ ମାତରମ୍’ର ଗାନ କରାଯାଇଥିଲା ଏବଂ ରାଜ୍ୟସଭାକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ କରିଦିଆଯାଇଥିଲା।

------------------------

---------------

ହିନ୍ଦୁସ୍ଥାନ ସମାଚାର / ଗଗନ