ନୂଆଦିଲ୍ଲୀ, ୨୫ ଅଗଷ୍ଟ (ହି.ସ.)- ଭାରତୀୟ ଜନତା ପାର୍ଟି (ବିଜେପି)ର ସାଂସଦ ତଥା ଦଳର ଜାତୀୟ ମୁଖପାତ୍ର ସମ୍ବିତ ପାତ୍ର କଂଗ୍ରେସକୁ ଟାର୍ଗେଟ୍ କରି କହିଛନ୍ତି ଯେ, ପୂର୍ବତନ କେନ୍ଦ୍ର ମନ୍ତ୍ରୀ ପି. ଚିଦାମ୍ବରମ ଥରେ ୟୁପିଆଇକୁ ପରିହାସ କରିଥିଲେ କିନ୍ତୁ ଆଜି ଏହାର ସଂଖ୍ୟା ସମଗ୍ର ବିଶ୍ୱ ସମ୍ମୁଖରେ ଅଛି । ସେ କହିଥିଲେ ଯେ, ରାହୁଲ ଗାନ୍ଧୀ ହୁଏତ ଏହି ସଫଳତାଗୁଡ଼ିକୁ ବୁଝିପାରିବେ ନାହିଁ ।
ସମ୍ବିତ ପାତ୍ର କହିଛନ୍ତି, ଆଜି ୟୁପିଆଇ ୧୦ ବର୍ଷ ପୂରଣ କରିଛି ଏବଂ ବିଶ୍ୱର ସର୍ବବୃହତ ରିଅଲ୍ ଟାଇମ୍ ପେମେଂଟ ସିଷ୍ଟମରେ ପରିଣତ ହୋଇଛି । ସେ କହିଥିଲେ ଯେ, ୧୦ ବର୍ଷ ପୂର୍ବେ ଯେତେବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୟୁପିଆଇର ପରିକଳ୍ପନା କରିଥିଲେ, ସେତେବେଳେ କଂଗ୍ରେସ ନେତାମାନେ ଏହାକୁ ପରିହାସ କରିଥିଲେ, କିନ୍ତୁ ଆଜି ସେହି ବ୍ୟବସ୍ଥା ଡିଜିଟାଲ ପେମେଂଟ କ୍ଷେତ୍ରରେ ଭାରତର ସବୁଠାରୁ ବଡ଼ ସଫଳତା ହୋଇପାରିଛି ।
ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ସେ କହିଥିଲେ ଯେ, ଅଗଷ୍ଟ ୧୫ ତାରିଖରେ ଲାଲକିଲ୍ଲାର ପ୍ରାଚୀରରୁ ପ୍ରଧାନମନ୍ତ୍ରୀ ସପ୍ତଧାରା' ର ପରିକଳ୍ପନା ରାଷ୍ଟ୍ର ସମ୍ମୁଖରେ ଉପସ୍ଥାପନ କରିଥିଲେ । ଏକ ବିକଶିତ ଭାରତ ଗଠନ ପାଇଁ ଏହା ହେଉଛି ରୋଡମ୍ୟାପ୍ । ଯେକୌଣସି ଦେଶକୁ ଆଗକୁ ନେବା ପାଇଁ ସ୍ପଷ୍ଟ ଲକ୍ଷ୍ୟର ଆବଶ୍ୟକତା ରହିଛି ଏବଂ ଠିକ୍ ସମୟରେ ସଠିକ୍ ନେତୃତ୍ୱ ଦେଶର ଉଜ୍ଜ୍ୱଳ ଭବିଷ୍ୟତ ପାଇଁ ମୂଳଦୁଆ ପକାଇଥାଏ । ସେ କହିଥିଲେ ଯେ, ସପ୍ତଧାରା ଅଧୀନରେ ଉତ୍ପାଦନ ଶକ୍ତି, କୃଷି ଏବଂ ଖାଦ୍ୟ ପ୍ରକ୍ରିୟାକରଣ, ପ୍ରଯୁକ୍ତି ଏବଂ ନବସୃଜନ, ସବୁଜ ଏବଂ ନୀଳ ଅର୍ଥନୀତି, ସଫ୍ଟ ପାୱାର, ଗତି ଶକ୍ତି ଏବଂ ପ୍ରତିରକ୍ଷା ଶକ୍ତି ଭଳି ସାତଟି ପ୍ରମୁଖ କ୍ଷେତ୍ର ଉପରେ ସ୍ୱତନ୍ତ୍ର ଧ୍ୟାନ ଦିଆଯାଉଛି ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
