ହାଇଦ୍ରାବାଦ (ତେଲେଙ୍ଗାନା), ଅଗଷ୍ଟ 26 (ହି.ସ) ବୁଧବାର ଭୋର ପ୍ରାୟ 4ଟା 30 ମିନିଟରେ ସୂର୍ଯ୍ୟପେଟ୍ ଜିଲ୍ଲାରେ ଏକ ଘରୋଇ ବସ୍ ଲୁହା ରଡ ଭର୍ତ୍ତି କଣ୍ଟେନରକୁ ଧକ୍କା ଦେବାରୁ ପାଞ୍ଚ ଜଣଙ୍କର ମୃତ୍ୟୁ ଘଟିଥିବା ବେଳେ ପ୍ରାୟ 20 ଜଣ ଗୁରୁତର ଆହତ ହୋଇଛନ୍ତି।

ହାଇଦ୍ରାବାଦ-ବିଜୟୱାଡା ଜାତୀୟ ରାଜପଥରେ ଏହି ଦୁର୍ଘଟଣା ଘଟିଛି। 42 ଜଣ ଯାତ୍ରୀଙ୍କୁ ନେଇ ଘରୋଇ ବସ୍ ହାଇଦ୍ରାବାଦରୁ ଆନ୍ଧ୍ରପ୍ରଦେଶର ଏଲୁରୁ ଅଭିମୁଖେ ଯାଉଥିଲା। ପୋଲିସର କହିବା ଅନୁଯାୟୀ, ବସ୍ ଆଗକୁ ଯାଉଥିବା କଣ୍ଟେନରର ପଛପଟକୁ ଧକ୍କା ଦେଇଥିଲା। କଣ୍ଟେନରଟି ଲୁହା ରଡରେ ଭର୍ତ୍ତି ହୋଇଥିଲା। ଧକ୍କା ହେବା ପରେ ବସ୍ ଭିତରେ ଗଣ୍ଡଗୋଳ ହୋଇଥିଲା।

ପୋଲିସ କହିଛି ଯେ ଆହତ ଏବଂ ଫସି ରହିଥିବା ଯାତ୍ରୀମାନଙ୍କୁ ବସରୁ ବାହାର କରିବାକୁ ଏକ ଘଣ୍ଟାରୁ ଅଧିକ ସମୟ ଲାଗିଥିଲା। ଆହତମାନଙ୍କୁ ଚିକିତ୍ସା ପାଇଁ ନିକଟସ୍ଥ ଡାକ୍ତରଖାନାକୁ ନିଆଯାଇଥିଲା। ଏହି ଦୁର୍ଘଟଣା ଯୋଗୁଁ ହାଇଦ୍ରାବାଦ-ବିଜୟୱାଡା ଜାତୀୟ ରାଜପଥରେ ବ୍ୟାପକ ଟ୍ରାଫିକ୍ ଜାମ୍ ହୋଇଥିଲା।

ତେଲେଙ୍ଗାନା ମୁଖ୍ୟମନ୍ତ୍ରୀ ଏ. ରେଭନ୍ଥ ରେଡ୍ଡୀ ଏହି ଦୁର୍ଘଟଣାରେ ଦୁଃଖ ପ୍ରକାଶ କରିବା ସହ ଶୋକସନ୍ତପ୍ତ ପରିବାରବର୍ଗଙ୍କୁ ସମବେଦନା ଜଣାଇଛନ୍ତି। ଆହତମାନଙ୍କ ଚିକିତ୍ସାରେ ଅବହେଳା ନକରିବାକୁ ସେ ମୁଖ୍ୟ ସଚିବଙ୍କୁ ନିର୍ଦ୍ଦେଶ ଦେଇଛନ୍ତି।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା