ଲକ୍ଷ୍ନୌ, ଅଗଷ୍ଟ ୨୬

(ହି.ସ.):ହିଜାବ ବିବାଦକୁ ନେଇ ବହୁଜନ ସମାଜ ପାର୍ଟି (ବିଏସ୍ପି) ଅଧ୍ୟକ୍ଷା ମାୟାବତୀ ପ୍ରତିକ୍ରିୟା

ପ୍ରକାଶ କରିଛନ୍ତି। ଏଭଳି ମାମଲାକୁ ଅଧିକ ବଡ଼ କରି ଆଇନଗତ ବିବାଦର ରୂପ ଦେବା ପରିବର୍ତ୍ତେ

ସ୍କୁଲ ପରିଚାଳନା ଏବଂ ସରକାରୀ ପ୍ରଶାସନର ସହଯୋଗରେ ଆପୋସ ବୁଝାମଣା ମାଧ୍ୟମରେ ସମାଧାନ କରିବା

ଉଚିତ ବୋଲି ସେ କହିଛନ୍ତି। ହିଜାବକୁ ଆଳ କରି ‘ସଂକୀର୍ଣ୍ଣ

ରାଜନୀତି’ କରାଯିବା

ଉଚିତ ନୁହେଁ ବୋଲି ମାୟାବତୀ କହିଛନ୍ତି।

ବୁଧବାର ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ଦୀର୍ଘ

ପୋଷ୍ଟରେ ମାୟାବତୀ କହିଛନ୍ତି ଯେ ଡ. ଭୀମରାଓ ଆମ୍ବେଦକର ସମସ୍ତ ଜାତି ଓ ଧର୍ମର ଲୋକଙ୍କୁ ସମାନ

ଅଧିକାର ପ୍ରଦାନ କରୁଥିବା ସମ୍ବିଧାନ ଦେଇ ଦେଶକୁ ଏକତାର ସୂତ୍ରରେ ବାନ୍ଧିବା ସହ ଏକ ସଶକ୍ତ

ଭାରତ ଗଠନର ଭିତ୍ତି ସୁଦୃଢ଼ କରିଥିଲେ।

ସେ କହିଛନ୍ତି ଯେ ସମସ୍ତ ଧର୍ମର ଲୋକଙ୍କୁ ନିଜ ଧର୍ମଗ୍ରନ୍ଥ, ଧାର୍ମିକ

ରୀତିନୀତି ଓ ପରମ୍ପରା ଅନୁସାରେ ଶାନ୍ତିପୂର୍ଣ୍ଣ ଜୀବନଯାପନ କରିବାର ଅଧିକାର ରହିଛି। ତେଣୁ

ଏହାକୁ ଅଣଦେଖା କିମ୍ବା ଅନାବଶ୍ୟକ ହସ୍ତକ୍ଷେପ କରିବା ପରିବର୍ତ୍ତେ ସମସ୍ତଙ୍କୁ ଧାର୍ମିକ ଭାବନା

ଓ ପରମ୍ପରାର ପବିତ୍ରତାକୁ ସମ୍ମାନ କରିବା ଉଚିତ ବୋଲି ସେ କହିଛନ୍ତି।

ମହିଳାଙ୍କ ମର୍ଯ୍ୟାଦା,

ସମ୍ମାନ ଏବଂ ପରଦା ଭଳି ସମ୍ବେଦନଶୀଳ ବିଷୟକୁ ସତର୍କତା ଓ ସମ୍ବେଦନଶୀଳତାର ସହ ଦେଖିବା

ଆବଶ୍ୟକ ବୋଲି ମାୟାବତୀ କହିଛନ୍ତି। ସ୍କୁଲ ୟୁନିଫର୍ମ, ଚାଦର କିମ୍ବା ହିଜାବ ଭଳି ବିଷୟକୁ ବଡ଼ କରି କୋର୍ଟ-କଚେରୀରେ ଆଇନଗତ

ବିବାଦର ରୂପ ଦେବା ପରିବର୍ତ୍ତେ ସ୍କୁଲ ପରିଚାଳନା ଓ ପ୍ରଶାସନର ଆପୋସ ବୁଝାମଣା ଏବଂ

ବିବେକପୂର୍ଣ୍ଣ ପଦକ୍ଷେପ ମାଧ୍ୟମରେ ସମାଧାନ କରିବା ଉଚିତ ବୋଲି ସେ ମତ ଦେଇଛନ୍ତି।

ଏଭଳି ସମ୍ବେଦନଶୀଳ ପ୍ରସଙ୍ଗକୁ ଆଳ କରି କାହାକୁ ମଧ୍ୟ ସଂକୀର୍ଣ୍ଣ

ରାଜନୀତି କରିବାର ସୁଯୋଗ ମିଳିବା ଉଚିତ ନୁହେଁ ବୋଲି ସେ କହିଛନ୍ତି।

ମାୟାବତୀ କହିଛନ୍ତି ଯେ ବିଏସ୍ପି ସମାଜର ପ୍ରତ୍ୟେକ ବର୍ଗର ସୁରକ୍ଷା

ଓ ସମ୍ମାନର ଗ୍ୟାରେଣ୍ଟି ଦେଉଥିବା ଆମ୍ବେଦକରବାଦୀ ଦଳ। ଧର୍ମ, ଧର୍ମଗ୍ରନ୍ଥ, ଧାର୍ମିକ ପରମ୍ପରା

ଓ ବିଶ୍ୱାସ ସହ ଜଡ଼ିତ ସମ୍ବେଦନଶୀଳ ବିଷୟରେ ସମସ୍ତେ ଟିପ୍ପଣୀ କରିବାରୁ ବିରତ ରହିଲେ ଏହା ଦେଶ

ଓ ଜନସାଧାରଣଙ୍କ ହିତରେ ହେବ।

ଏଥିସହ ବଦାୟୁଁରେ ଡ. ଭୀମରାଓ ଆମ୍ବେଦକରଙ୍କ ପ୍ରତିମୂର୍ତ୍ତିକୁ ନେଇ ଚାଲିଥିବା ବିବାଦର

ମଧ୍ୟ ଶୀଘ୍ର ସମାଧାନ କରିବାକୁ ମାୟାବତୀ ଦାବି କରିଛନ୍ତି।

ହିନ୍ଦୁସ୍ଥାନ ସମାଚାର / ସମନ୍ୱୟ