ନୂଆଦିଲ୍ଲୀ, ୨୬ ଅଗଷ୍ଟ (ହି.ସ.)- କେନ୍ଦ୍ରୀୟ ପରିବେଶ, ବନ ଏବଂ ଜଳବାୟୁ ପରିବର୍ତନ ମନ୍ତ୍ରୀ ଭୂପେନ୍ଦ୍ର ଯାଦବ ମଙ୍ଗୋଲିଆର ଉଲାନବାତାରରେ ମିଳିତ ଜାତିସଂଘ ମରୁଭୂମିକରଣ ରୋକଥାମ କନଭେନସନ୍ (ୟୁଏନସିସିଡି)ର ୧୭ତମ ସମ୍ମିଳନୀ (ସିଓପି-୧୭)ରେ ଚରାଗାହ ଅଂଚଳର ପୁନରୁଦ୍ଧାରରେ ସ୍ଥାନୀୟ ସମୁଦାୟର ଅଂଶଗ୍ରହଣକୁ କେନ୍ଦ୍ରୀୟ ଭୂମିକା ଦେବାର ଆବଶ୍ୟକତା ଉପରେ ଜୋର ଦେଇଛନ୍ତି। ସେ କହିଥିଲେ ଯେ ସଫଳ ପୁନରୁଦ୍ଧାରର ଆରମ୍ଭ ଚରାଳିମାନଙ୍କୁ କେବଳ ହିତାଧିକାରୀ ଭାବେ ବିବେଚନା କରିବା ପରିବର୍ତେ ସେମାନଙ୍କୁ ପ୍ରାକୃତିକ ସମ୍ପଦର ସଂରକ୍ଷଣକର୍ତା ଭାବେ ବିବେଚନା କରିବାରୁ ହୁଏ।

କେନ୍ଦ୍ରୀୟ ପରିବେଶ, ବନ ଏବଂ ଜଳବାୟୁ ପରିବର୍ତନ ମନ୍ତ୍ରଣାଳୟ ଅନୁଯାୟୀ, ୟୁଏନସିସିଡି ସିଓପି-୧୭ ସମୟରେ ‘ଚରାଗାହ ଅଂଚଳର ପୁନରୁଦ୍ଧାର ଏବଂ ଚରାଳି ସମୁଦାୟର କଲ୍ୟାଣ’ ବିଷୟ ଉପରେ ଆୟୋଜିତ ମନ୍ତ୍ରୀସ୍ତରୀୟ ସଂଳାପକୁ ସମ୍ବୋଧିତ କରି ଯାଦବ କହିଥିଲେ ଯେ ଭାରତ ବୈଜ୍ଞାନିକ ଯୋଜନା ଏବଂ ସମୁଦାୟର ଅଂଶଗ୍ରହଣ ମାଧ୍ୟମରେ ଘାସଭୂମି ଏବଂ ଚରାଗାହର ସଂରକ୍ଷଣ ଓ ପୁନରୁଦ୍ଧାରର ଅଭିଜ୍ଞତା ବିକଶିତ କରିଛି।

ସେ କହିଥିଲେ ଯେ ଭାରତରେ ଚରାଗାହ ଅଂଚଳ ହିମାଳୟୀ ଚରାଗାହ, ମଧ୍ୟ ଭାରତର ସାଭାନା ଅଂଚଳ, ରାଜସ୍ଥାନର ଶୁଷ୍କ ଥାର ଏବଂ କଚ୍ଛରୁ ଆରମ୍ଭ କରି ଦକ୍ଷିଣ ଭାରତର ଶୋଲା ଅଂଚଳ ପର୍ଯ୍ୟନ୍ତ ବ୍ୟାପିଛି। ଏହି ଅଂଚଳଗୁଡ଼ିକ ଦେଶର ବୃହତ୍ ପଶୁସମ୍ପଦ ସଂଖ୍ୟା ସହିତ ଲକ୍ଷ ଲକ୍ଷ ଲୋକଙ୍କ ଜୀବିକାର ଆଧାର ଅଟନ୍ତି।

ଯାଦବ କହିଥିଲେ ଯେ ପାରମ୍ପରିକ ଜ୍ଞାନକୁ ଆଧୁନିକ ବିଜ୍ଞାନ ସହିତ ଯୋଡ଼ି ଏପରି ପୁନରୁଦ୍ଧାର ସୁନିଶ୍ଚିତ କରାଯାଇପାରେ ଯାହା ପରିବେଶ ଦୃଷ୍ଟିରୁ ସ୍ଥାୟୀ, ଆର୍ôଥକ ଦୃଷ୍ଟିରୁ ବ୍ୟବହାରଯୋଗ୍ୟ ଏବଂ ସାମାଜିକ ଦୃଷ୍ଟିରୁ ସମାବେଶୀ ହୋଇଥିବ। ସେ କହିଥିଲେ ଯେ ଉପଗ୍ରହ ଆଧାରିତ ମରୁଭୂମିକରଣ ଏବଂ ଭୂମି ଅବକ୍ଷୟ ଆଟଲାସ୍ ଘାସଭୂମିର ଚିହ୍ନଟ ଏବଂ ପୁନରୁଦ୍ଧାରର ବୈଜ୍ଞାନିକ ଯୋଜନା ପ୍ରସ୍ତୁତିରେ ସାହାଯ୍ୟ କରୁଛି। ଅନ୍ୟପକ୍ଷରେ, ଚରାଇ ଅଧିକାର ଏବଂ ସମୁଦାୟ ଜଙ୍ଗଲ ସମ୍ପଦ ଅଧିକାରର ସ୍ୱୀକୃତି ସ୍ଥାନୀୟ ସମୁଦାୟର ଭୂମିକାକୁ ସୁଦୃଢ଼ କରୁଛି।

--------------------------

---------------

ହିନ୍ଦୁସ୍ଥାନ ସମାଚାର / ଗଗନ