ନୂଆଦିଲ୍ଲୀ, ଅଗଷ୍ଟ 30 (ହି.ସ) ନେପାଳର ଭୋଟକୋଶି ଅଞ୍ଚଳରେ ଅଗଷ୍ଟ 26ରେ ଭୟଙ୍କର ବନ୍ୟା ପରିସ୍ଥିତି ସୃଷ୍ଟି ହେବା ପରେ ଭାରତ ବ୍ୟାପକ ରିଲିଫ ଓ ଉଦ୍ଧାର କାର୍ଯ୍ୟ ତ୍ୱରାନ୍ୱିତ କରିଛି। ଏପର୍ଯ୍ୟନ୍ତ 108 ଜଣ ଭାରତୀୟ ନାଗରିକଙ୍କୁ ଉଦ୍ଧାର କରାଯାଇଥିବା ବେଳେ ପୂର୍ବରୁ ଯୋଗାଯୋଗରେ ନଥିବା ପ୍ରାୟ 50 ଜଣ ଅନ୍ୟ ଭାରତୀୟଙ୍କ ସହ ସମ୍ପର୍କ ପୁନଃସ୍ଥାପିତ ହୋଇଛି।

ବିପର୍ଯ୍ୟୟ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନେପାଳର ପ୍ରଧାନମନ୍ତ୍ରୀଙ୍କ ସହ କଥା ହୋଇଥିଲେ ଏବଂ ଗଭୀର ସମବେଦନା ଜଣାଇବା ସହ ସମସ୍ତ ସମ୍ଭାବ୍ୟ ମାନବିକ ସହାୟତା ପାଇଁ ଆଶ୍ୱାସନା ଦେଇଥିଲେ। ଏହା ପରେ ବୈଦେଶିକ ବ୍ୟାପାର ମନ୍ତ୍ରୀ ଡକ୍ଟର ଏସ୍. ଜୟଶଙ୍କର ମଧ୍ୟ ତାଙ୍କ ନେପାଳୀ ପ୍ରତିପକ୍ଷଙ୍କ ସହ ଆଲୋଚନା କରିଥିଲେ।

ବୈଦେଶିକ ବ୍ୟାପାର ମନ୍ତ୍ରଣାଳୟ ଅନୁଯାୟୀ, ଗତ ଦୁଇ ଦିନ ମଧ୍ୟରେ 598 ଜଣ ଭାରତୀୟ ନାଗରିକ ଚୀନରୁ ନେପାଳକୁ ସୁରକ୍ଷିତ ଭାବେ ପହଞ୍ଚିଛନ୍ତି। ପ୍ରାୟ 900 ଭାରତୀୟ ସୁରକ୍ଷିତ ଅଛନ୍ତି ଏବଂ ଚୀନ୍ ପାର୍ଶ୍ୱରେ ଯୋଗାଯୋଗରେ ଅଛନ୍ତି। ତେବେ 275ରୁ ଅଧିକ ଭାରତୀୟ ନାଗରିକ ଏବଂ 128 ଜଣ ଭାରତୀୟ ବଂଶୋଦ୍ଭବ ଲୋକ ଏବେବି ନିଖୋଜ ଅଛନ୍ତି।

ମନ୍ତ୍ରଣାଳୟ ଅନୁଯାୟୀ, ନେପାଳକୁ ସହାୟତା କରିବା ପାଇଁ ଭାରତ ଏପର୍ଯ୍ୟନ୍ତ ଭାରତୀୟ ବାୟୁସେନାର ତିନୋଟି ବିମାନରୁ ପାଖାପାଖି ୫୭.୫ ଟନ୍ ରିଲିଫ ସାମଗ୍ରୀ ବିମାନ ଯୋଗେ ପଠାଇଛି। ଏଥିରେ ଅସ୍ଥାୟୀ ଆଶ୍ରୟସ୍ଥଳ, ତମ୍ବୁ, କମ୍ବଳ, ଔଷଧ, ଖାଦ୍ୟ, ସ୍ୱଚ୍ଛତା କିଟ୍, ସୌର ଲ୍ୟାମ୍ପ, ଜଳ ପମ୍ପ ଏବଂ ବିଦ୍ୟୁତ୍ ଉପକରଣ ଅନ୍ତର୍ଭୁକ୍ତ |

ପ୍ରଭାବିତ ଅଞ୍ଚଳରେ ଭାରତୀୟ ସେନାର ସୁଡ଼ଙ୍ଗ ଉଦ୍ଧାର ଏବଂ ଡାକ୍ତରୀ ଦଳ ମଧ୍ୟ ନିୟୋଜିତ ହୋଇଛନ୍ତି। ସ୍ୱତନ୍ତ୍ର ସୁଡ଼ଙ୍ଗ ଉଦ୍ଧାରକାରୀ ଦଳ, ଫରେନସିକ୍ ବିଶେଷଜ୍ଞ ଏବଂ ରିଲିଫ ସାମଗ୍ରୀ ସହିତ ଅନ୍ୟ ଏକ ବିମାନ କାଠମାଣ୍ଡୁକୁ ପଠାଯାଉଛି। ଆବଶ୍ୟକ ପଡ଼ିଲେ ଏନ. ଡି. ଆର. ଏଫ୍. ସହାୟତା, ବେଲି ବ୍ରିଜ୍ ଏବଂ ବୈଷୟିକ ଦଳ ଯୋଗାଇ ଦେବାକୁ ମଧ୍ୟ ଭାରତ ପ୍ରସ୍ତାବ ଦେଇଛି।

ଭାରତ କହିଛି ଯେ ଏହି କଠିନ ସମୟରେ ଏହା ନେପାଳ ସହିତ ଦୃଢ ଭାବରେ ଛିଡା ହୋଇଛି ଏବଂ ଆବଶ୍ୟକ ଅନୁଯାୟୀ ସମସ୍ତ ସମ୍ଭାବ୍ୟ ସହାୟତା ଜାରି ରଖିବ।

---------

ହିନ୍ଦୁସ୍ଥାନ ସମାଚାର / ସମନ୍ୱୟ