ନୂଆଦିଲ୍ଲୀ, ଅଗଷ୍ଟ 30 (ହି.ସ): ଉଜବେକିସ୍ତାନର ରାଷ୍ଟ୍ରପତି ଶବକତ୍ ମିର୍ଜିୟୋୟେଭ୍ ରବିବାର ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଦେଶର ସର୍ବୋଚ୍ଚ ରାଜ୍ୟ ପୁରସ୍କାର 'ଓଲି ଦାରାଜାଲି ଦୋସ୍ତାଲିକ୍' (ସର୍ବୋଚ୍ଚ ବନ୍ଧୁତା ପୁରସ୍କାର) ରେ ସମ୍ମାନିତ କରିଛନ୍ତି।
ଏହି ଅବସରରେ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ଉଜବେକିସ୍ତାନର ସର୍ବୋଚ୍ଚ ସମ୍ମାନ ଗ୍ରହଣ କରିବା ତାଙ୍କ ପାଇଁ ଅତ୍ୟନ୍ତ ଗର୍ବର ମୁହୂର୍ତ୍ତ। ଏହି ସମ୍ମାନ 140 କୋଟି ଭାରତୀୟଙ୍କ ସମ୍ମାନ ଏବଂ ସମସ୍ତ ଭାରତୀୟଙ୍କ ତରଫରୁ ମୁଁ ଉଜବେକିସ୍ତାନର ଜନସାଧାରଣ, ଏଠାକାର ସରକାର ଏବଂ ମୋର ବନ୍ଧୁ ମାନ୍ୟବର ରାଷ୍ଟ୍ରପତିଙ୍କୁ ହୃଦୟରୁ କୃତଜ୍ଞତା ଜଣାଉଛି
ଏହି ସମ୍ମାନକୁ ଏକ ବଡ଼ ଦାୟିତ୍ୱ ବୋଲି ବର୍ଣ୍ଣନା କରି ପ୍ରଧାନମନ୍ତ୍ରୀ କହିଥିଲେ ଯେ ଭାରତ କେବେବି ନିଜର ଦାୟିତ୍ୱରୁ ବିଚ୍ୟୁତ ହେବ ନାହିଁ ଏବଂ ଏହି ବନ୍ଧୁତ୍ୱକୁ ସମ୍ପୂର୍ଣ୍ଣ ଭାବେ ପାଳନ କରିବ। ସେ କହିଥିଲେ ଯେ ମିଳିତ ଭାବେ, ଦୁଇ ଦେଶ ବିଶ୍ୱ ଦକ୍ଷିଣର ମିଳିତ ସ୍ୱର ହେବେ ଏବଂ ଏହାର କଲ୍ୟାଣ ତଥା ସମଗ୍ର ମାନବତାର ସ୍ୱାର୍ଥ ପାଇଁ ଉତ୍ସର୍ଗୀକୃତ ଭାବେ କାର୍ଯ୍ୟ କରିବେ।
ଦୁଇ ଦେଶର ଶତାବ୍ଦୀ ପୁରୁଣା ବନ୍ଧୁତା ଏବଂ ସହଭାଗୀ ଐତିହ୍ୟକୁ ଏହି ସମ୍ମାନ ଉତ୍ସର୍ଗ କରି ପ୍ରଧାନମନ୍ତ୍ରୀ କହିଥିଲେ ଯେ ଉଜବେକିସ୍ତାନ ରାଷ୍ଟ୍ରପତିଙ୍କ ଦୂରଦୃଷ୍ଟିସମ୍ପନ୍ନ ନେତୃତ୍ୱ ଏବଂ ଭାରତ ପ୍ରତି ତାଙ୍କର ବନ୍ଧୁତା ଦ୍ୱାରା ଦ୍ୱିପାକ୍ଷିକ ସମ୍ପର୍କ ନିରନ୍ତର ଭାବେ ସୁଦୃଢ଼ ହୋଇଛି। ସେ କହିଥିଲେ ଯେ ଏହାର ପରିଣାମ ସ୍ୱରୂପ ଆଜି ଦୁଇ ଦେଶ ମଧ୍ୟରେ ସମ୍ପର୍କ ବ୍ୟାପକ ରଣନୈତିକ ଭାଗିଦାରୀର ଏକ ନୂତନ ସ୍ତରରେ ପହଞ୍ଚିଛି।
ଏହାପୂର୍ବରୁ ଉଜବେକିସ୍ତାନର ରାଷ୍ଟ୍ରପତି ପ୍ରଧାନମନ୍ତ୍ରୀ ମୋଦୀଙ୍କୁ ଖୋଲାଖୋଲି ଏବଂ ଭାଇଚାରାର ଭାବନାରେ ଆୟୋଜିତ ଫଳପ୍ରଦ ଆଲୋଚନା ପାଇଁ ଧନ୍ୟବାଦ ଜଣାଇଥିଲେ। ସେ ଭାରତର ଦ୍ରୁତ ପ୍ରଗତି ଏବଂ ବିଶ୍ୱ ମଞ୍ଚରେ ବୃଦ୍ଧି ପାଉଥିବା ପ୍ରଭାବକୁ ପ୍ରଶଂସା କରି ଏହାକୁ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱ ସହ ଯୋଡ଼ିଥିଲେ। ସେ କହିଥିଲେ ଯେ ଦୁଇ ଦେଶ ମଧ୍ୟରେ ସମ୍ପର୍କ ଐତିହାସିକ ଭାବେ ଏକ ନୂତନ ସ୍ତରରେ ପହଞ୍ଚିଛି। ବାଣିଜ୍ୟ, ନିବେଶ, ପରିବହନ, ପର୍ଯ୍ୟଟନ, ସଂସ୍କୃତି ଏବଂ ପରିବେଶ ସମେତ ବିଭିନ୍ନ କ୍ଷେତ୍ରରେ ସହଯୋଗ ସୁଦୃଢ଼ ହୋଇଛି।
ରାଷ୍ଟ୍ରପତି କହିଥିଲେ ଯେ ଉଭୟ ଦେଶରେ ଅପାର ସମ୍ଭାବନା ରହିଛି ଏବଂ ବର୍ତ୍ତମାନର ଏକ ବିଲିୟନ ଡଲାରର ବାଣିଜ୍ୟ ଲକ୍ଷ୍ୟ କେବଳ ଆରମ୍ଭ ମାତ୍ର। ସେ ଭବିଷ୍ୟତରେ ବାଣିଜ୍ୟକୁ ପାଞ୍ଚ ବିଲିୟନ ଡଲାର ଏବଂ ଆହୁରି ଦଶ ବିଲିୟନ ଡଲାରକୁ ନେବାକୁ ଆଗ୍ରହ ପ୍ରକାଶ କରିଛନ୍ତି।
--------
ହିନ୍ଦୁସ୍ଥାନ ସମାଚାର / ସ୍ୱାଗତିକା
30 Aug 2026