ଝାରସୁଗୁଡ଼ା, ୧୧ ସେପ୍ଟେମ୍ବର (ହି.ସ.)- ପରିବେଶ ସୁରକ୍ଷା ଓ ସ୍ଥାୟୀ ବିକାଶ କ୍ଷେତ୍ରରେ ଉଲ୍ଲେଖନୀୟ ପଦକ୍ଷେପ ପାଇଁ ଟିଆରଏଲ୍ କ୍ରୋସାକି ୨୦୨୬ ବର୍ଷର ଗ୍ରୀନଟେକ୍ ପରିବେଶ ଓ ସ୍ଥାୟୀତ୍ୱ ପୁରସ୍କାର ହାସଲ କରିଛି। ପରିବେଶ ସୁରକ୍ଷା ବର୍ଗରେ କମ୍ପାନୀକୁ ଏହି ସମ୍ମାନ ମିଳିଛି।ସେପ୍ଟେମ୍ବର ୧୦ ତାରିଖ ଦିନ ରାଜସ୍ଥାନର ଯୋଧପୁର ସ୍ଥିତ ଇଣ୍ଡାନା ପ୍ୟାଲେସଠାରେ ଗ୍ରୀନଟେକ ଫାଉଣ୍ଡେସନ ପକ୍ଷରୁ ଆୟୋଜିତ ପରିବେଶ ଓ ସ୍ଥାୟୀତ୍ୱ ସମ୍ମିଳନୀ ୨୦୨୬ରେ ଏହି ପୁରସ୍କାର ପ୍ରଦାନ କରାଯାଇଥିଲା। ଗ୍ରୀନଟେକ ଫାଉଣ୍ଡେସନର ଅଧ୍ୟକ୍ଷ ତଥା ମୁଖ୍ୟ କାର୍ଯ୍ୟନିର୍ବାହୀ କମଲେଶ୍ୱର ଶରଣଙ୍କଠାରୁ ଟିଆରଏଲ କ୍ରୋସାକିର କର୍ପୋରେଟ୍ ସେବା ଓ ସ୍ଥାୟୀତ୍ୱ ବିଭାଗର ଉପସଭାପତି ସୁଶାନ୍ତ କୁମାର ଦାସ ପୁରସ୍କାର ଗ୍ରହଣ କରିଥିଲେ। ତାଙ୍କ ସହକର୍ମୀ ଅଭିରୂପ ମଣ୍ଡଳ ମଧ୍ୟ ଉପସ୍ଥିତ ଥିଲେ।ପୁରସ୍କାର ପ୍ରଦାନ ସମାରୋହରେ ତୈଳ ଓ ପ୍ରାକୃତିକ ଗ୍ୟାସ ନିଗମର ପୂର୍ବତନ ନିର୍ଦ୍ଦେଶକ ବେଦ ପ୍ରକାଶ ମହାୟାର ଏବଂ ଅଏଲ୍ ଇଣ୍ଡିଆର କାର୍ଯ୍ୟନିର୍ବାହୀ ନିର୍ଦ୍ଦେଶକ ସଞ୍ଜୟ ପରାଶରଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ମଞ୍ଚରେ ଉପସ୍ଥିତ ଥିଲେ।

ଏହି ସମ୍ମାନ ପାଇଁ ଦେଶର ପ୍ରାୟ ୨୦୦ ପ୍ରମୁଖ ସଂସ୍ଥା ଅଂଶଗ୍ରହଣ କରିଥିଲେ। ଏଥିରେ ହାଲ୍ଦିଆ ଏନର୍ଜି, ଆର୍ସେଲର୍ ମିତ୍ତଲ ନିପ୍ପନ୍ ଷ୍ଟିଲ୍ ଇଣ୍ଡିଆ, ବିକ୍ରମ ସୋଲାର, ହିନ୍ଦୁସ୍ତାନ ୟୁନିଲିଭର୍, ଗୋଦାବରୀ ପାୱାର ଆଣ୍ଡ ଇସ୍ପାତ, ଟାଟା ମୋଟର୍ସ, ଏମ୍ସିଏଲ୍, ଇଫ୍କୋ, ବିର୍ଲା କପର୍, ଟାଟା ଅଟୋକମ୍ପୁ ଓ ବେଦାନ୍ତ ଭଳି ପ୍ରମୁଖ ଶିଳ୍ପ ସଂସ୍ଥା ସାମିଲ ଥିଲେ।

ପରିବେଶ ପରିଚାଳନା କ୍ଷେତ୍ରରେ ଟିଆରଏଲ୍ କ୍ରୋସାକି ଦୀର୍ଘଦିନ ଧରି ବିଭିନ୍ନ ପଦକ୍ଷେପ ନେଇଆସୁଛି। ବାୟୁ ଓ ଜଳ ପ୍ରଦୂଷଣ ନିୟନ୍ତ୍ରଣ, ବିପଜ୍ଜନକ ବର୍ଜ୍ୟ ପରିଚାଳନା, ଚିକିତ୍ସାଜନିତ ବର୍ଜ୍ୟ ପରିଚାଳନା, ବୈଦ୍ୟୁତିକ ବର୍ଜ୍ୟ ପରିଚାଳନା, ସବୁଜ ବଳୟ ବୃଦ୍ଧି, ଜୈବ ବିବିଧତା ସୁରକ୍ଷା, ଅଙ୍ଗାରକାମ୍ଳ ନିର୍ଗମନ ହ୍ରାସ, ବର୍ଜ୍ୟ ହ୍ରାସ ଏବଂ କଞ୍ଚାମାଲର ପୁନଃଚକ୍ରଣ ଓ ପୁନଃବ୍ୟବହାର ଭଳି କ୍ଷେତ୍ରରେ କମ୍ପାନୀ ଗୁରୁତ୍ୱ ଦେଇଆସୁଛି।

କମ୍ପାନୀର ପରିବେଶ ସୁରକ୍ଷା ଅଭିଯାନର ଏକ ପ୍ରମୁଖ ପଦକ୍ଷେପ ହେଉଛି କୋଇଲା ଓ ଭଟ୍ଟି ତେଲର ସମ୍ପୂର୍ଣ୍ଣ ବଦଳରେ ପାଇପ୍ ଯୋଗେ ପ୍ରାକୃତିକ ଗ୍ୟାସ୍ ବ୍ୟବହାର। ଏହାଦ୍ୱାରା ଶକ୍ତି ବ୍ୟବହାର ହ୍ରାସ ପାଇବା ସହିତ ବାୟୁମଣ୍ଡଳକୁ ନିର୍ଗତ ଉଷ୍ମଜନିତ ଗ୍ୟାସ୍ ର ପରିମାଣ ମଧ୍ୟ କମାଇବାରେ ସହାୟତା ମିଳିଛି। ପରିବେଶ, ସାମାଜିକ ଦାୟିତ୍ୱ ଓ ସୁଶାସନକୁ ନିଜର ପ୍ରମୁଖ କାର୍ଯ୍ୟସୂଚୀ ଭାବେ ଗ୍ରହଣ କରିଛି ଟିଆରଏଲ୍ କ୍ରୋସାକି।

ହିନ୍ଦୁସ୍ଥାନ ସମାଚାର / ସଞ୍ଜୟ