ନୂଆଦିଲ୍ଲୀ, ସେପ୍ଟେମ୍ବର 13 (ହି.ସ): ମରୁଡ଼ି ପ୍ରବଣ ଏବଂ ସ୍ୱଳ୍ପ ବର୍ଷା ହେଉଥିବା ଅଞ୍ଚଳରେ କୃଷିକୁ ସ୍ଥାୟୀ କରିବା ପାଇଁ ବିଜ୍ଞାନ, ଉନ୍ନତ ନବସୃଜନ ଏବଂ ସୁଦୃଢ଼ ତଥ୍ୟ ପ୍ରଣାଳୀର ସହଭାଗୀ ଏଜେଣ୍ଡା ଉପରେ ଆଧାରିତ ଶୁଷ୍କ ଭୂମି ଉପରେ ଦିଲ୍ଲୀ ଘୋଷଣାନାମା ସର୍ବସମ୍ମତିକ୍ରମେ ଗୃହୀତ ହୋଇଛି। ଏହି ସମ୍ମିଳନୀ ସମୟରେ କୃଷିକୁ ସୁଦୃଢ଼ କରିବା ପାଇଁ ଗ୍ଲୋବାଲ କ୍ରପ ଡାଇଭର୍ସିଟି ଟ୍ରଷ୍ଟ ଏବଂ ୱିପ୍ରୋ ସମେତ ଅନେକ ଅନୁଷ୍ଠାନ ମଧ୍ୟରେ ଗୁରୁତ୍ୱପୂର୍ଣ୍ଣ ରାଜିନାମା ସ୍ୱାକ୍ଷରିତ ହୋଇଥିଲା। ଏହାବ୍ୟତୀତ, 34ଟି ଦେଶରୁ 170ଟି ନାମାଙ୍କନରୁ ମନୋନୀତ ଅନୁଷ୍ଠାନ ଏବଂ ବୈଜ୍ଞାନିକମାନଙ୍କୁ 'ଆଇ. ଏସ୍. ଏସ୍. ସି. ଏ. ଗ୍ଲୋବାଲ୍ ଆୱାର୍ଡସ୍ 2026' ପ୍ରଦାନ କରାଯାଇଥିଲା ଏବଂ 16 ଜଣ ଗବେଷକଙ୍କୁ ଶ୍ରେଷ୍ଠ ପୋଷ୍ଟର୍ ପୁରସ୍କାର ପ୍ରଦାନ କରାଯାଇଥିଲା।

'ଦକ୍ଷିଣ-ଦକ୍ଷିଣ ସହଯୋଗ ସହିତ ଶୁଷ୍କଭୂମି କୃଷିରେ ପରିବର୍ତ୍ତନ' ବିଷୟବସ୍ତୁ ଉପରେ ଆୟୋଜିତ ତିନି ଦିନିଆ 'ଶୁଷ୍କଭୂମି କଂଗ୍ରେସ 2026' ରବିବାର ଦିନ ଆନୁଷ୍ଠାନିକ ଭାବେ ସମାପ୍ତ ହୋଇଛି ବୋଲି କେନ୍ଦ୍ର କୃଷି ଏବଂ କୃଷକ କଲ୍ୟାଣ ମନ୍ତ୍ରଣାଳୟ କହିଛି। ଶୁଷ୍କଭୂମି କଂଗ୍ରେସ ମୁଖ୍ୟତଃ ଜଳ ଅଭାବ ଏବଂ ମରୁଡ଼ି ପ୍ରବଣ କୃଷି କ୍ଷେତ୍ରଗୁଡ଼ିକ ପାଇଁ ଏକ ଆନ୍ତର୍ଜାତୀୟ ମଞ୍ଚ, ଯେଉଁଠାରେ ସାରା ବିଶ୍ୱର ବୈଜ୍ଞାନିକ, ନୀତି ନିର୍ଦ୍ଧାରକ ଏବଂ ଅନୁଷ୍ଠାନମାନେ ଏକାଠି ବସି କମ୍ ପାଣିରେ ଉନ୍ନତ ଉତ୍ପାଦନ, ଜଳବାୟୁ ପରିବର୍ତ୍ତନର ମୁକାବିଲା ପାଇଁ କୌଶଳ ଏବଂ କୃଷକଙ୍କ ଜୀବିକା ସୁରକ୍ଷିତ କରିବା ପାଇଁ ଦୃଢ଼ ପଦକ୍ଷେପ ଉପରେ ବିଚାର ବିମର୍ଶ କରନ୍ତି।

ସମାପନ ଅଧିବେଶନରେ କୃଷି ଗବେଷଣା ଏବଂ ଶିକ୍ଷା ବିଭାଗ (ଡିଏଆରଇ) ର ସଚିବ ତଥା ଭାରତୀୟ କୃଷି ଗବେଷଣା ପରିଷଦ (ଆଇସିଏଆର) ର ମହାନିର୍ଦ୍ଦେଶକ ଡକ୍ଟର ଏମ୍. ଏଲ୍. ଜାଟ୍ କହିଥିଲେ ଯେ ମରୁଡ଼ି ପ୍ରବଣ ଅଞ୍ଚଳର କୃଷି ନୀତିରେ ଭବିଷ୍ୟତର ଆବଶ୍ୟକତାକୁ ସାମିଲ କରାଯିବା ଉଚିତ। ଏଥିପାଇଁ ଏକ ସୁଦୃଢ଼ ସଂସ୍ଥାଗତ ବ୍ୟବସ୍ଥାର ଆବଶ୍ୟକତା ରହିଛି ଏବଂ ଆଇସିଏଆରର ଜାତୀୟ କୃଷି ଅର୍ଥନୀତି ଏବଂ ନୀତି ଗବେଷଣା ପ୍ରତିଷ୍ଠାନକୁ ଏହି କ୍ଷେତ୍ରରେ ଭବିଷ୍ୟତର କୃଷି କାର୍ଯ୍ୟ ଯୋଜନା ପ୍ରସ୍ତୁତ କରିବାର ଦାୟିତ୍ୱ ଦିଆଯିବ। ଗବେଷଣା, କୃଷି ପଦ୍ଧତି ଏବଂ ନୀତିକୁ ଯୋଡ଼ିବା ଭଳି ପରୀକ୍ଷାଗାର ବିକଶିତ କରିବା ଉପରେ ମଧ୍ୟ ସେ ଗୁରୁତ୍ୱାରୋପ କରିଥିଲେ।

ଇଣ୍ଟରନ୍ୟାସନାଲ ସେମି-ଏରିଡ୍ ଟ୍ରପିକାଲ୍ କ୍ରପ୍ ରିସର୍ଚ୍ଚ ଇନଷ୍ଟିଚ୍ୟୁଟ୍ ର ମହାନିର୍ଦ୍ଦେଶକ ଡକ୍ଟର ହିମାଂଶୁ ପାଠକ କହିଛନ୍ତି ଯେ ବିଶ୍ୱ ଖାଦ୍ୟ ସୁରକ୍ଷା ଦୃଷ୍ଟିରୁ ମରୁଡ଼ି ପ୍ରବଣ ଅଞ୍ଚଳଗୁଡ଼ିକ ରଣନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ। ସମ୍ମିଳନୀର ବିଚାର-ବିମର୍ଶର ମୂଳଦୁଆ ପକାଇବା ଲାଗି ସେ ଆହ୍ୱାନ କରିଥିଲେ ଏବଂ କହିଥିଲେ ଯେ ଧାରଣାଗୁଡ଼ିକୁ ବାସ୍ତବ ରୂପ ଦେବା ଲାଗି ବିଶେଷଜ୍ଞ, ବୈଜ୍ଞାନିକ ଜ୍ଞାନ ଏବଂ ପାରସ୍ପରିକ ଭାଗିଦାରୀକୁ ଗୋଟିଏ ମଞ୍ଚରେ ଏକତ୍ର କରିବା ନିହାତି ଆବଶ୍ୟକ।

ଏହି ସମ୍ମିଳନୀରେ ଆଇସିଆରଆଇଏସଏଟି ଆଭିୟର ଲାଇଫ୍ ସାଇନ୍ସେସ୍, ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଫୁଡ୍ ଟେକ୍ନୋଲୋଜି ଏଣ୍ଟରପ୍ରେନିଓରସିପ୍ ଆଣ୍ଡ ମ୍ୟାନେଜମେଣ୍ଟ (ଏନଆଇଏଫଟିଇଏମ), ୱିପ୍ରୋ ଲିମିଟେଡ୍ ଏବଂ ଓଡ଼ିଶାର ଆଙ୍ଗୁଲ ଏବଂ ରାୟଗଡ଼ାର ଜିଲ୍ଲା ପ୍ରଶାସନ ସହିତ ଏମଓୟୁ ସ୍ୱାକ୍ଷର କରିଛି। କଂଗ୍ରେସର ସହ-ଅଧ୍ୟକ୍ଷ ଡକ୍ଟର ଡି. କେ. ଯାଦବ ଏବଂ ଡକ୍ଟର ଷ୍ଟାନଫୋର୍ଡ ବ୍ଲେଡ୍ ତିନି ଦିନିଆ ଅଧିବେଶନର ପ୍ରମୁଖ ସୁପାରିଶ ଉପସ୍ଥାପନ କରିଥିଲେ।

ଏହା ପୂର୍ବରୁ ମିଳିତ ଜାତିସଂଘର ଦକ୍ଷିଣ-ଦକ୍ଷିଣ ସହଯୋଗ ଦିବସ ଅବସରରେ ଏକ ସ୍ୱତନ୍ତ୍ର ଅଧିବେଶନ ଅନୁଷ୍ଠିତ ହୋଇଥିଲା, ଯେଉଁଥିରେ ମିଳିତ ଜାତିସଂଘର ମହାସଚିବ, ଖାଦ୍ୟ ଏବଂ କୃଷି ସଂଗଠନ (ଏଫ୍. ଏ. ଓ.) ର ମହାନିର୍ଦ୍ଦେଶକ ଏବଂ ୟୁ. ଏନ୍. ଓ. ଏସ୍. ଏସ୍. ସି. ର ମହାନିର୍ଦ୍ଦେଶକ ଦିମା ଅଲ୍-ଖାତିବଙ୍କ ବାର୍ତ୍ତା ପାଠ କରାଯାଇଥିଲା। ଏହି ଅଧିବେଶନରେ ଇଥିଓପିଆ, ସେନେଗାଲ, ବ୍ରାଜିଲ, ଚୀନ୍ ଏବଂ ଭାରତର ପ୍ରତିନିଧିମାନେ ସଫଳ କୃଷି ମଡେଲର ସମ୍ପ୍ରସାରଣ ଉପରେ ସେମାନଙ୍କର ଅଭିଜ୍ଞତା ବାଣ୍ଟିଥିଲେ। ଲେବାନନର ଆଇ. ସି. ଏ. ଆର୍. ଡି. ଏ., ମେକ୍ସିକୋର ସି. ଆଇ. ଏମ୍. ଏମ୍. ୱାଇ. ଟି. ଏବଂ ଓଡ଼ିଶା ସରକାରଙ୍କ 'ଓଡ଼ିଶା ଜୀବିକା ମିଶନ କୁ ବୈଶ୍ୱିକ ପୁରସ୍କାରର ରୂପାନ୍ତରଣ ଉତ୍କର୍ଷ ବର୍ଗରେ ସମ୍ମାନିତ କରାଯାଇଥିଲା।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା