ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଅଷ୍ଟାଦଶ ବ୍ରିକ୍ସ୍ ଶିଖର ସମ୍ମିଳନୀର ଉଦଯାପନୀ ଅଧିବେଶନରେ ସମସ୍ତ ଦେଶର ସକ୍ରିୟ ଅଂଶଗ୍ରହଣ ଏବଂ ଗୁରୁତ୍ୱପୂର୍ଣ୍ଣ ଯୋଗଦାନ ପାଇଁ କୃତଜ୍ଞତା ବ୍ୟକ୍ତ କରିଛନ୍ତି। ସେ କହିଥିଲେ ଯେ ଗତ ଦୁଇ ଦିନ ଧରି ହୋଇଥିବା ଆଲୋଚନା ଏହି ବିଶ୍ୱାସକୁ ସୁଦୃଢ଼ କରିଛି ଯେ ବ୍ରିକ୍ସ୍ କେବଳ ଦେଶଗୁଡ଼ିକର ଏକ ଗୋଷ୍ଠୀ ନୁହେଁ, ବରଂ ସମାଧାନର ଏକ ପରିସଂସ୍ଥା।

ପ୍ରଧାନମନ୍ତ୍ରୀ କହିଥିଲେ ଯେ ଏହି ସମ୍ମିଳନୀରେ ଗୃହୀତ 'ନୂଆଦିଲ୍ଲୀ ଘୋଷଣା' ସହଭାଗୀ ଦୃଷ୍ଟିକୋଣ ଏବଂ ଭବିଷ୍ୟତର ସହଯୋଗକୁ ଏକ ସ୍ପଷ୍ଟ ଦିଗ ପ୍ରଦାନ କରିବ। ସେ କହିଥିଲେ ଯେ ବ୍ରିକ୍ସର ଆଲୋଚନା ଏବଂ ଫଳାଫଳକୁ ସମୟବଦ୍ଧ କାର୍ଯ୍ୟାନୁଷ୍ଠାନ ଏବଂ ଶେଷ ମାଇଲ ପର୍ଯ୍ୟନ୍ତ ପ୍ରଭାବ ସହିତ ଯୋଡ଼ିବା ଆବଶ୍ୟକ।

ବ୍ରିକ୍ସ୍ ଏହାର ତୃତୀୟ ଦଶନ୍ଧିରେ ପ୍ରବେଶ କରିବାକୁ ଯାଉଛି। ବିଶ୍ୱ ଏବେ ଆମଠାରୁ କେବଳ ବିଚାର ଏବଂ ପ୍ରତିବଦ୍ଧତା ନୁହେଁ, ବରଂ ଦୃଢ଼ ଫଳାଫଳ ମଧ୍ୟ ଆଶା କରୁଛି। ମୋର ବିଶ୍ୱାସ ଯେ ଆମର ମିଳିତ ପ୍ରୟାସ ଦ୍ୱାରା, ଆମେ ନିଶ୍ଚିତ ଭାବରେ ଏହି ଆଶାକୁ ପୂରଣ କରିବୁ। ବ୍ରିକ୍ସର ପରବର୍ତ୍ତୀ ଆୟୋଜକ ଭାବେ ସେ ଚୀନକୁ ଶୁଭେଚ୍ଛା ଜଣାଇଥିଲେ।

ସେ କହିଥିଲେ ଯେ ବ୍ରିକ୍ସର ଢାଞ୍ଚା କେବଳ ଫାଇଲ ମଧ୍ୟରେ ସୀମିତ ରହିବା ଉଚିତ ନୁହେଁ, ବରଂ ବାସ୍ତବ ପରିବର୍ତ୍ତନ ଏବଂ ବାସ୍ତବ କ୍ଷେତ୍ରରେ ଏହାର ପ୍ରଭାବ ପ୍ରତିଫଳିତ ହେବା ଉଚିତ। ପ୍ରଧାନମନ୍ତ୍ରୀ କହିଥିଲେ ଯେ ଏହି ଲକ୍ଷ୍ୟଗୁଡ଼ିକୁ ହାସଲ କରିବା ଲାଗି ସମସ୍ତ ଦେଶ ମିଳିତ ଭାବେ କାର୍ଯ୍ୟ କରିବେ। ସେ କହିଥିଲେ ଯେ ସମସ୍ତ ଅଂଶଗ୍ରହଣକାରୀଙ୍କ ବିଚାର ଏବଂ ପରାମର୍ଶ ସହଯୋଗକୁ ବ୍ୟାପକ ଏବଂ ଗଭୀର କରିବାରେ ସହାୟକ ହୋଇଛି। ସେମାନଙ୍କର ଉପସ୍ଥିତି ବ୍ରିକ୍ସର କ୍ରମବର୍ଦ୍ଧିଷ୍ଣୁ ପ୍ରାସଙ୍ଗିକତା, ଉନ୍ମୁକ୍ତତା ଏବଂ ସମାବେଶୀତାକୁ ପ୍ରତିଫଳିତ କରୁଛି।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା