ଯୋଗ ମାଧ୍ୟମରେ ସୁସ୍ଥ ଶରୀର, ଶାନ୍ତ ମନ ଓ ଶୃଙ୍ଖଳିତ ଜୀବନର ବାର୍ତ୍ତା
ଘରେ ଘରେ ଯୋଗ, ସୁସ୍ଥ ଜୀବନର ସଂକଳ୍ପ
ଭୁବନେଶ୍ୱର, 13 ସେପ୍ଟେମ୍ବର (ହି.ସ.): ଭାରତୀୟ ଯୋଗ ସଂସ୍ଥାନ, ଓଡ଼ିଶା ପ୍ରାନ୍ତର ନୟାପଲ୍ଲୀ ଯୋଗ ଜିଲ୍ଲା ପକ୍ଷରୁ ସ୍ଥାନୀୟ ଏନ୍-୨ ବିଡିଏ ପାର୍କ ପରିସରରେ ଏକ ଭବ୍ୟ ଯୋଗ ଉତ୍ସବ ଆୟୋଜିତ ହୋଇଯାଇଛି। ଯୋଗର ମହତ୍ତ୍ୱ ଓ ଉପକାରିତା ସମ୍ପର୍କରେ ସାଧାରଣ ଲୋକଙ୍କୁ ସଚେତନ କରିବା ସହ ଦୈନନ୍ଦିନ ଜୀବନରେ ଯୋଗକୁ ସାମିଲ କରିବା ନେଇ ଜନସଚେତନତା ସୃଷ୍ଟି କରିବା ଏହି ଆୟୋଜନର ମୁଖ୍ୟ ଉଦ୍ଦେଶ୍ୟ ଥିଲା।
ଭାରତୀୟ ଯୋଗ ସଂସ୍ଥାନ ୧୯୬୭ ମସିହାରେ ଶ୍ରଦ୍ଧେୟ ପ୍ରକାଶ ଲାଲଜୀଙ୍କ ପ୍ରଚେଷ୍ଟାରେ ନୂଆଦିଲ୍ଲୀରେ ଏକ ଛୋଟ କେନ୍ଦ୍ରରୁ ଆରମ୍ଭ ହୋଇଥିଲା। ବର୍ତ୍ତମାନ ଏହି ସଂସ୍ଥାନ ସାରା ଦେଶରେ ୪,୫୦୦ରୁ ଊର୍ଦ୍ଧ୍ୱ ଏବଂ ଦେଶ ବାହାରେ ପ୍ରାୟ ୬୦ଟି ନିଶୁଳ୍କ କେନ୍ଦ୍ର ମାଧ୍ୟମରେ ଲୋକଙ୍କୁ ନିଃଶୁଳ୍କ ଯୋଗ ଶିକ୍ଷା ଓ ସେବା ପ୍ରଦାନ କରିଆସୁଛି। ଯୋଗ ମାଧ୍ୟମରେ ସୁସ୍ଥ, ଶୃଙ୍ଖଳିତ ଓ ସୁସଂସ୍କୃତ ଜୀବନଧାରାର ବିକାଶ କରିବା ସଂସ୍ଥାନର ମୂଳ ଲକ୍ଷ୍ୟ।
ଯୋଗ କେବଳ ଏକ ବ୍ୟାୟାମ ନୁହେଁ; ଏହା ଏକ ଅନୁଶାସନ ଏବଂ ଶୃଙ୍ଖଳିତ ଜୀବନର ଏକ ପଦ୍ଧତି। ଯୋଗ ଭାରତୀୟ ଐତିହ୍ୟ, ସଂସ୍କୃତି ଓ ଆଧ୍ୟାତ୍ମିକ ପରମ୍ପରାର ଏକ ଅନନ୍ୟ ପରିଚୟ। ‘ବସୁଧୈବ କୁଟୁମ୍ବକମ୍’, ‘ସର୍ବେ ଭବନ୍ତୁ ସୁଖିନଃ’ ଏବଂ ‘ଜିଓ ଔର ଜୀବନ ଦୋ’ ଭଳି ମାନବିକତାର ବାର୍ତ୍ତାକୁ ଆଧାର କରି ଭାରତୀୟ ଯୋଗ ସଂସ୍ଥାନ ନିଜର ସେବା କାର୍ଯ୍ୟକୁ ଆଗେଇ ନେଇଆସୁଛି। ଏହି ମହତ୍ ଉଦ୍ଦେଶ୍ୟକୁ ସାକାର କରିବାରେ ଓଡ଼ିଶା ପ୍ରାନ୍ତ ଓ ନୟାପଲ୍ଲୀ ଯୋଗ ଜିଲ୍ଲା ସର୍ବଦା ତତ୍ପର ରହିଛି।
ଯୋଗ ଉତ୍ସବର ମୁଖ୍ୟ ଲକ୍ଷ୍ୟ ହେଉଛି ଯୋଗକୁ ଘରେ ଘରେ ପହଞ୍ଚାଇବା, ସମସ୍ତ ନାଗରିକଙ୍କୁ ଯୋଗ ପ୍ରତି ସଚେତନ କରିବା ଏବଂ ନୂତନ ପିଢ଼ିକୁ ଏହି ପ୍ରାଚୀନ ଭାରତୀୟ ଜ୍ଞାନ ପରମ୍ପରା ସହିତ ଯୋଡ଼ିବା। ଏହି ଉଦ୍ଦେଶ୍ୟରେ ନୟାପଲ୍ଲୀ ଯୋଗ ଜିଲ୍ଲା ପକ୍ଷରୁ ବରିଷ୍ଠ ଗୁରୁମାନଙ୍କ ତତ୍ତ୍ୱାବଧାନରେ ଦୁଇଦିନିଆ କାର୍ଯ୍ୟକ୍ରମ ଆୟୋଜନ କରାଯାଇଥିଲା।
ଯୋଗ ମାଧ୍ୟମରେ ସୁସ୍ଥ ଶରୀର, ଶାନ୍ତ ମନ ଓ ଶୃଙ୍ଖଳିତ ଜୀବନର ବାର୍ତ୍ତାକୁ ସମାଜର ପ୍ରତ୍ୟେକ ବର୍ଗଙ୍କ ନିକଟରେ ପହଞ୍ଚାଇବା ସହ ନିୟମିତ ଯୋଗାଭ୍ୟାସ ପାଇଁ ଲୋକଙ୍କୁ ପ୍ରେରିତ କରିବା ଉପରେ ଉତ୍ସବରେ ଗୁରୁତ୍ୱ ଦିଆଯାଇଥିଲା।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
13 Sep 2026
