ଭୁବନେଶ୍ୱର, 19 ସେପ୍ଟେମ୍ବର (ହି.ସ.)- ଆଜି ହେଉଛି ଅନ୍ତର୍ଜାତୀୟ

ଉପକୂଳ ସ୍ୱଚ୍ଛତା ଦିବସ । ଏହି ଅବସରରେ ଓଡ଼ିଶା ପାଇଁ ସମୁଦ୍ର କେବଳ ‘ସମୁଦ୍ର’ ନୁହେଁ; ଏହା ଆମ

ସଂସ୍କୃତିର ଏକ ଅବିଚ୍ଛେଦ୍ୟ ଅଂଶ ବୋଲି କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଓଡ଼ିଶାର

ସମୁଦ୍ରତଟକୁ ସ୍ୱଚ୍ଛ, ସମୁଦ୍ରକୁ ସୁସ୍ଥ ଓ ଉପକୂଳବର୍ତ୍ତୀ ସମୁଦାୟକୁ ସୁରକ୍ଷିତ ରଖିବାକୁ

ଆହ୍ୱାନ ଦେଇଛନ୍ତି ମୁଖ୍ୟମନ୍ତ୍ରୀ ।

ସୋସିଆଲ ହ୍ୟାଣ୍ଡେଲରେ ଏକ

ବାର୍ତ୍ତା ଜାରି କରି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି ଯେ, ଆମର ଉପକୂଳ କେବଳ ବାଲି

ଓ ସମୁଦ୍ରର ଏକ ବିସ୍ତୃତ ଅଞ୍ଚଳ ନୁହେଁ। ଏହା ଓଡ଼ିଶାର ପରିଚୟ, ଐତିହ୍ୟ

ଓ ଜୀବନଶୈଳୀର ଏକ ଅବିଚ୍ଛେଦ୍ୟ ଅଙ୍ଗ। ପୁରୀର ପବିତ୍ର ସମୁଦ୍ରତଟରୁ ଗୋପାଳପୁର ପର୍ଯ୍ୟନ୍ତ, ଭିତରକନିକାର

ହେନ୍ତାଳ ଓ ଲୁଣା ଜଙ୍ଗଲରୁ ଆରମ୍ଭ କରି ଅଲିଭ୍ ରିଡ୍ଲେ କଇଁଛଙ୍କ ଅଣ୍ଡାଦାନ ସ୍ଥଳ ପର୍ଯ୍ୟନ୍ତ, ଆମ

ଉପକୂଳ ପିଢ଼ି ପରେ ପିଢ଼ି ଚାଲିଆସୁଥିବା କାହାଣୀ,

ପରମ୍ପରା ଓ ସ୍ମୃତିକୁ ନିଜ ମଧ୍ୟରେ ବହନ କରିଛି।

ଓଡ଼ିଶା ପାଇଁ ସମୁଦ୍ର କେବଳ

‘ସମୁଦ୍ର’ ନୁହେଁ; ଏହା ଆମ ସଂସ୍କୃତିର ଏକ ଅବିଚ୍ଛେଦ୍ୟ ଅଂଶ। ମହୋଦଧି, ଯାହା

ପ୍ରଭୁ ଜଗନ୍ନାଥଙ୍କ ପବିତ୍ର ଭୂମିର ସାକ୍ଷୀ ହୋଇ ରହିଛି, ପ୍ରକୃତି, ଆସ୍ଥା ଓ

ଆମ ଜୀବନଶୈଳୀ ସହିତ ଆମର ଚିରନ୍ତନ ସମ୍ପର୍କକୁ ପ୍ରତିଫଳିତ କରେ।କିନ୍ତୁ ସବୁଠାରୁ ବଡ଼ କଥା

ହେଉଛି, ଓଡ଼ିଶାର

ଉପକୂଳର କାହାଣୀ ହେଉଛି ଏହାର ଲୋକମାନଙ୍କ କାହାଣୀ। ପିଢ଼ି ପରେ ପିଢ଼ି ଆମ ଉପକୂଳବର୍ତ୍ତୀ

ସମୁଦାୟ, ଯେଉଁଥିରେ

ମତ୍ସ୍ୟଜୀବୀ, ନାବିକ, କୃଷକ, ମହିଳା, ଯୁବବର୍ଗ ଓ ଅସଂଖ୍ୟ ପରିବାର ସାମିଲ ଅଛନ୍ତି, ମହୋଦଧି

ସହିତ ଜୀବନଯାପନ କରିଆସିଛନ୍ତି।

ତେଣୁ ଆମ ଉପକୂଳର ସୁରକ୍ଷା

କେବଳ ସମୁଦ୍ରତଟକୁ ସଂରକ୍ଷଣ କରିବା ନୁହେଁ;

ଏହା ଜୀବିକା,

ସାମୁଦ୍ରିକ ପରିବେଶ ଓ ଆମ ନୀଳ ଅର୍ଥନୀତିର ଭବିଷ୍ୟତକୁ ସୁରକ୍ଷିତ

ରଖିବା ସହିତ ଜଡ଼ିତ।

ପ୍ରଧାନମନ୍ତ୍ରୀ ଶ୍ରୀ

ନରେନ୍ଦ୍ର ମୋଦୀ ଜୀଙ୍କ ଜନଭାଗିଦାରୀ ମାଧ୍ୟମରେ ଏକ ସ୍ୱଚ୍ଛ ଓ ଅଧିକ ସ୍ଥାୟୀ ଭାରତ ଗଠନର

ଦୃଷ୍ଟିକୋଣ ପରିବେଶ ସୁରକ୍ଷା ପାଇଁ ସାମୂହିକ ପ୍ରୟାସକୁ ନୂଆ ଗତି ପ୍ରଦାନ କରିଛି।

କେନ୍ଦ୍ରମନ୍ତ୍ରୀ ଶ୍ରୀ ଡ.

ଜିତେନ୍ଦ୍ର ସିଂହ ଜୀ ଏବଂ ପୃଥିବୀ ବିଜ୍ଞାନ ମନ୍ତ୍ରଣାଳୟର ନେତୃତ୍ୱରେ ‘ସ୍ୱଚ୍ଛ ସାଗର, ସୁରକ୍ଷିତ

ସାଗର’ ଅଭିଯାନ ନାଗରିକ, ଯୁବବର୍ଗ ଓ ଉପକୂଳବର୍ତ୍ତୀ ସମୁଦାୟକୁ ଏକାଠି କରି ଆମ ସମୁଦ୍ରତଟର

ସୁରକ୍ଷା ଓ ସମୁଦ୍ରର ସଂରକ୍ଷଣ ଦିଗରେ ଏହି ଦୃଷ୍ଟିକୋଣକୁ ଆଗେଇ ନେଉଛି।

ଅନ୍ତର୍ଜାତୀୟ ଉପକୂଳ

ସ୍ୱଚ୍ଛତା ଦିବସ ଅବସରରେ, ଆସନ୍ତୁ ସମୁଦ୍ର ସହିତ ଆମର ଗଭୀର ସମ୍ପର୍କକୁ ଏକ ସାମୂହିକ

ଦାୟିତ୍ୱରେ ପରିଣତ କରିବା। ଆମ ସମୁଦ୍ରତଟରୁ ଆବର୍ଜନା ହଟାଉଥିବା ପ୍ରତ୍ୟେକ ହାତ ଯେପରି କାହାର

ଜୀବିକାର ସୁରକ୍ଷା କରୁଥିବା ହାତରେ ପରିଣତ ହେଉ,

ଏବଂ ପ୍ରତ୍ୟେକ ସ୍ୱଚ୍ଛ ସମୁଦ୍ରତଟ ଆମ ପିଲାମାନଙ୍କ ପାଇଁ ଏକ

ପ୍ରତିଶ୍ରୁତି ହେଉ।

ଆସନ୍ତୁ, ଓଡ଼ିଶାର

ସମୁଦ୍ରତଟକୁ ସ୍ୱଚ୍ଛ, ସମୁଦ୍ରକୁ ସୁସ୍ଥ ଓ ଉପକୂଳବର୍ତ୍ତୀ ସମୁଦାୟକୁ ସୁରକ୍ଷିତ ରଖିବା

ସହିତ ଏକ ସମୃଦ୍ଧ ନୀଳ ଅର୍ଥନୀତି ଗଠନ କରିବା। ଯାହା ମାଧ୍ୟମରେ ସମୁଦ୍ର ସହିତ ଆମର ଚିରନ୍ତନ

ସମ୍ପର୍କ ଏକ ନୂତନ ଭବିଷ୍ୟତ ଆଡ଼କୁ ଆଗେଇ ବଢ଼ିବ ବୋଲି ମୁଖ୍ୟମନ୍ତ୍ରୀ କହିଛନ୍ତି।

---------------

ହିନ୍ଦୁସ୍ଥାନ ସମାଚାର / ସ୍ୱାଗତିକା