- ପ୍ରଧାନମନ୍ତ୍ରୀ ୫୧ ହଜାରରୁ ଅଧିକ ଯୁବକଯୁବତୀଙ୍କୁ ହସ୍ତାନ୍ତର କଲେ ନିଯୁକ୍ତି ପତ୍ର

ନୂଆଦିଲ୍ଲୀ, ୧୯ ସେପ୍େଟମ୍ବର (ହି.ସ.)- ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ସରକାରୀ ସେବାରେ ସାମିଲ ହେଉଥିବା ଯୁବକଯୁବତୀମାନଙ୍କୁ ‘ନାଗରିକ ଦେବୋ ଭବ’କୁ ନିଜର ମନ୍ତ୍ର କରିବାକୁ ଆହ୍ୱାନ କରି କହିଛନ୍ତି ଯେ ନାଗରିକଙ୍କ ସେବା ହିଁ ରାଷ୍ଟ୍ରର ସେବା ଏବଂ ସରକାରୀ କର୍ମଚାରୀଙ୍କ ବ୍ୟବହାର, ସମ୍ବେଦନଶୀଳତା, କାର୍ଯ୍ୟଦକ୍ଷତା ତଥା ସଚ୍ଚୋଟତା ଦ୍ୱାରା ହିଁ ଲୋକମାନଙ୍କର ସରକାର ସହିତ ଅନୁଭବ ନିର୍ଦ୍ଧାରିତ ହୁଏ।

ମୋଦୀ ୨୦ତମ ରୋଜଗାର ମେଳାକୁ ଭିଡିଓ କନଫରେନ୍ସ ମାଧ୍ୟମରେ ସମ୍ବୋଧିତ କରି ବିଭିନ୍ନ ସରକାରୀ ବିଭାଗ ଏବଂ ସଂଗଠନରେ ନିଯୁକ୍ତ ୫୧ ହଜାରରୁ ଅଧିକ ଯୁବକଯୁବତୀଙ୍କୁ ନିଯୁକ୍ତି ପତ୍ର ହସ୍ତାନ୍ତର କରିଥିଲେ। ନବନିଯୁକ୍ତ ଯୁବକଯୁବତୀ ଏବଂ ସେମାନଙ୍କ ପରିବାରକୁ ଅଭିନନ୍ଦନ ଜଣାଇ ସେ କହିଛନ୍ତି ଯେ ସେମାନଙ୍କ ସଫଳତାରେ ସେମାନଙ୍କ ପରିଶ୍ରମ ସହିତ ମାତାପିତା ଏବଂ ପରିବାରର ତ୍ୟାଗର ମଧ୍ୟ ବଡ଼ ଭୂମିକା ରହିଛି। ଏହି ରୋଜଗାର ମେଳା ଦେଶବ୍ୟାପୀ ୪୫ଟି ସ୍ଥାନରେ ଆୟୋଜିତ ହୋଇଥିଲା।

ପ୍ରଧାନମନ୍ତ୍ରୀ କହିଛନ୍ତି ଯେ ଆଜି ନିଯୁକ୍ତି ପତ୍ର ପାଉଥିବା ଯୁବକଯୁବତୀମାନେ ଏପରି ସମୟରେ ସରକାରୀ ସେବାରେ ପ୍ରବେଶ କରୁଛନ୍ତି, ଯେତେବେଳେ ଭାରତ ୨୦୪୭ ସୁଦ୍ଧା ବିକଶିତ ରାଷ୍ଟ୍ର ହେବାର ଲକ୍ଷ୍ୟ ଦିଗରେ ଆଗକୁ ବଢ଼ୁଛି। ସେ ଯୁବକଯୁବତୀମାନଙ୍କୁ କହିଛନ୍ତି ଯେ ସେମାନଙ୍କ ପ୍ରତ୍ୟେକ ନିଷ୍ପତି ଏବଂ ପ୍ରୟାସରେ ବିକଶିତ ଭାରତ ଏବଂ ଆତ୍ମନିର୍ଭର ଭାରତର ସଂକଳ୍ପ ମଜବୁତ ହେବା ଉଚିତ।

ସେ କହିଛନ୍ତି ଯେ ଭାରତୀୟ ଯୁବକଯୁବତୀଙ୍କ ଦକ୍ଷତା, ପ୍ରତିଭା ଏବଂ ନବସୃଜନ ଉପରେ ବିଶ୍ୱର ଭରସା ବଢ଼ୁଛି। ଭାରତର ଯୁବକଯୁବତୀମାନେ ବିଶ୍ୱର ବିଭିନ୍ନ କ୍ଷେତ୍ରରେ ନିଜର ପରିଚୟ ସୃଷ୍ଟି କରୁଛନ୍ତି ଏବଂ ଏବେ ଏହି ଶକ୍ତି ତଥା କ୍ଷମତା ସାର୍ବଜନୀନ ସେବାରେ ମଧ୍ୟ ଦେଖାଯିବା ଉଚିତ। ମୋଦୀ କହିଛନ୍ତି ଯେ ଯୁବକଯୁବତୀମାନଙ୍କୁ ନିରନ୍ତର ଶିଖି ଚାଲିବାକୁ ହେବ ଏବଂ ନୂତନ ପ୍ରଯୁକ୍ତି, ନୂତନ ବ୍ୟବସ୍ଥା ତଥା ବଦଳୁଥିବା ଆବଶ୍ୟକତା ଅନୁଯାୟୀ ନିଜକୁ ପ୍ରସ୍ତୁତ କରିବାକୁ ହେବ।

ପ୍ରଧାନମନ୍ତ୍ରୀ ସମ୍ପ୍ରତି ଅନୁଷ୍ଠିତ ବ୍ରିକ୍ସ ଶିଖର ସମ୍ମିଳନୀର ଉଲ୍ଲେଖ କରି କହିଛନ୍ତି ଯେ ଭାରତ ଚାହୁଁଛି ଯେ ବ୍ରିକ୍ସର ସହଯୋଗ କେବଳ ସରକାରଗୁଡ଼ିକ ମଧ୍ୟରେ ସୀମିତ ନ ରହୁ, ବରଂ ଉଦ୍ୟୋଗୀ, କୃଷକ, ମହିଳା ଏବଂ ଯୁବକଯୁବତୀମାନଙ୍କୁ ମଧ୍ୟ ଏହାର ସକ୍ରିୟ ଭାଗୀଦାର କରାଯାଉ। ସେ ବ୍ରିକ୍ସ କନେକ୍ଟ ଏବଂ ବ୍ରିକ୍ସ ଏମଏସଏମଇ ସହଯୋଗ ପୋର୍ଟାଲର ମଧ୍ୟ ଉଲ୍ଲେଖ କରିଛନ୍ତି।

ମୋଦୀ କହିଛନ୍ତି ଯେ ଭାରତ ସମ୍ପ୍ରତି ବର୍ଷଗୁଡ଼ିକରେ ପ୍ରାୟ ୪୦ଟି ଦେଶ ସହିତ ମୁକ୍ତ ବାଣିଜ୍ୟ ଚୁକ୍ତି କରିଛି, ଯାହା ଫଳରେ ଭାରତୀୟ ଯୁବକଯୁବତୀଙ୍କ ପାଇଁ ନୂତନ ବଜାର, ଭାଗୀଦାରି ଏବଂ ରୋଜଗାରର ସୁଯୋଗ ଖୋଲୁଛି। ସରକାର ଯୁବକଯୁବତୀମାନଙ୍କୁ ଭବିଷ୍ୟତର ଆବଶ୍ୟକତା ପାଇଁ ପ୍ରସ୍ତୁତ କରିବା ଉପରେ ବିଶେଷ ଜୋର ଦେଉଛି। ଜାତୀୟ ଶିକ୍ଷା ନୀତି, ସ୍କିଲ ଇଣ୍ଡିଆ ମିଶନ, ପ୍ରଧାନମନ୍ତ୍ରୀ କୌଶଳ ବିକାଶ ଯୋଜନା ଏବଂ ଶିକ୍ଷାନବିଶ କାର୍ଯ୍ୟକ୍ରମ ଏହି ଦିଗରେ କରାଯାଇଥିବା ପ୍ରୟାସ।

--------------------------

---------------

ହିନ୍ଦୁସ୍ଥାନ ସମାଚାର / ଗଗନ