- ମା’ ବଗଳାମୁଖୀଙ୍କ ଦର୍ଶନ ପାଇଁ ଓଡ଼ିଶାରୁ ଆସିଥିଲେ ୭ ଶ୍ରଦ୍ଧାଳୁ, ଉଜ୍ଜୟିନୀରୁ ଭଡ଼ାରେ ନେଇଥିଲେ କାର

ଆଗର ମାଲୱା, ୧୯ ସେପ୍ଟେମ୍ବର (ହି.ସ.)। ମଧ୍ୟପ୍ରଦେଶର ଆଗର ମାଲୱା ଜିଲ୍ଲାର ନଲଖେଡ଼ାରେ ଶୁକ୍ରବାର ବିଳମ୍ବିତ ରାତିରେ ମା’ ବଗଳାମୁଖୀ ମନ୍ଦିର ନିକଟରେ ଏକ ବଡ଼ ଦୁର୍ଘଟଣା ଘଟିଛି। ମନ୍ଦିର ନିକଟରେ ଓଡ଼ିଶାର ଶ୍ରଦ୍ଧାଳୁମାନଙ୍କୁ ନେଇ ଯାଉଥିବା ଏକ କାର ବର୍ଷାଜଳରେ ଫୁଲି ଉଠିଥିବା ନାଳର ପ୍ରଖର ସ୍ରୋତରେ ଭାସିଯାଇଥିଲା। ଏହି ଦୁର୍ଘଟଣାରେ ୮ ଜଣଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ୩ ଜଣ ଶିଶୁ, ୨ ଜଣ ମହିଳା ଓ ୩ ଜଣ ପୁରୁଷ ଅଛନ୍ତି। ମୃତକଙ୍କ ମଧ୍ୟରୁ ୭ ଜଣ ଓଡ଼ିଶାର ବାସିନ୍ଦା ଥିଲେ।

ପୁଲିସ ଅଧୀକ୍ଷକ ଦିଲୀପ କୁମାର ସୋନି ଶନିବାର ଏହି ଘଟଣାର ପୁଷ୍ଟି କରି କହିଛନ୍ତି ଯେ, ମୃତକଙ୍କ ମଧ୍ୟରୁ ୭ ଜଣ ଓଡ଼ିଶାର ବାସିନ୍ଦା ଥିବାବେଳେ କାର ଚାଳକ ଅରୁଣ ଗୋୟଲ ଆଗର ମାଲୱା ଜିଲ୍ଲାର ବଡ଼ୋଦ ଅଞ୍ଚଳର ବାସିନ୍ଦା ଥିଲେ। ଦୁର୍ଘଟଣା ପରେ ପାଣିର ପ୍ରଖର ସ୍ରୋତରେ କାରଟି ପୋଲ ନିକଟରୁ ପ୍ରାୟ ୧୦୦ ମିଟର ପର୍ଯ୍ୟନ୍ତ ନାଳ ଭିତରକୁ ଭାସିଯାଇଥିଲା। ପାଣିର ତୀବ୍ର ସ୍ରୋତ ଯୋଗୁଁ କାରଟି ଗୁରୁତର ଭାବେ କ୍ଷତିଗ୍ରସ୍ତ ହୋଇଥିଲା। ଉଦ୍ଧାରକାରୀ ଦଳ କାରଟିକୁ ନାଳରୁ ବାହାର କରିବା ସହ ମୃତଦେହଗୁଡ଼ିକୁ ଉଦ୍ଧାର କରିଥିଲା।

ପୁଲିସର ସୂଚନା ଅନୁଯାୟୀ, ଓଡ଼ିଶାର ୭ ଜଣ ବାସିନ୍ଦା ଆଗର ମାଲୱା ଜିଲ୍ଲାର ନଲଖେଡ଼ାସ୍ଥିତ ପ୍ରସିଦ୍ଧ ଶକ୍ତିପୀଠ ମା’ ବଗଳାମୁଖୀ ମନ୍ଦିରରେ ଦର୍ଶନ ପାଇଁ ଆସିଥିଲେ। ସେମାନେ ଉଜ୍ଜୟିନୀରୁ ଏକ କାର ଭଡ଼ାରେ ନେଇଥିଲେ। ଶୁକ୍ରବାର ସମସ୍ତେ ମା’ ବଗଳାମୁଖୀ ମନ୍ଦିର ଦର୍ଶନ ପାଇଁ ନଲଖେଡ଼ାରେ ପହଞ୍ଚିଥିବା ସମୟରେ ଏହି ଦୁର୍ଘଟଣା ଘଟିଥିଲା। ଘଟଣାର ସୂଚନା ମିଳିବା ମାତ୍ରେ ପ୍ରଶାସନ ଓ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଉଦ୍ଧାର ଅଭିଯାନ ସମୟରେ ସ୍ଥାନୀୟ ଲୋକମାନେ ଦଉଡ଼ି ବାନ୍ଧି କାରଟିକୁ ନାଳରୁ ବାହାରକୁ ଟାଣି ଆଣିଥିଲେ। ଏହାପରେ ପୁଲିସ କାର ଭିତରେ ଫସିଥିବା ଲୋକମାନଙ୍କ ମୃତଦେହକୁ ବାହାର କରି ବ୍ୟବଚ୍ଛେଦ ପାଇଁ ପଠାଇଛି। ଘଟଣାସ୍ଥଳରେ ପ୍ରଶାସନ ଓ ପୁଲିସର ଟିମ୍ ଉପସ୍ଥିତ ଅଛନ୍ତି।

ଦୁର୍ଘଟଣାରେ ମୃତ କାର ଚାଳକଙ୍କ ପରିଚୟ ଅରୁଣ ଗୋୟଲ ଭାବେ ହୋଇଛି। ସେ ଆଗର ମାଲୱା ଜିଲ୍ଲାର ବଡ଼ୋଦ ଅଞ୍ଚଳର ସୁଦବାସ ନିବାସୀ ଥିଲେ। ଦୁର୍ଘଟଣା ପରେ ପ୍ରଶାସନ ତାଙ୍କ ପରିଚୟ ନିଶ୍ଚିତ କରିଛି। ଘଟଣାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଲୋକମାନେ ପ୍ରଶାସନ ବିରୋଧରେ ନାରାବାଜି କରୁଛନ୍ତି। ଅମ୍ବେଡକର ଛକରେ ଚକାଜାମ କରାଯାଇଛି। ଘଟଣାସ୍ଥଳରେ ଜିଲ୍ଲାପାଳ ଶେର ସିଂହ ମୀଣା ଓ ଏସ୍ପି ଦିଲୀପ କୁମାର ସୋନିଙ୍କ ସମେତ ପ୍ରଶାସନିକ ଅଧିକାରୀମାନେ ଉପସ୍ଥିତ ଅଛନ୍ତି। ପୁଲିସ ଅନ୍ୟ ମୃତକମାନଙ୍କ ପରିଚୟ ନିର୍ଦ୍ଧାରଣ ପ୍ରକ୍ରିୟାରେ ଲାଗିଛି।

ପୁଲିସ ଅଧୀକ୍ଷକ ସୋନି କହିଛନ୍ତି ଯେ, ଘଟଣାଟି ରାତି ପ୍ରାୟ ୧ଟା ୩୦ ମିନିଟ୍ ସମୟରେ ଘଟିଥିଲା। ସେହି ସମୟରେ ପ୍ରବଳ ବର୍ଷା ହେଉଥିଲା। ପ୍ରାଥମିକ ଭାବେ ଅନୁମାନ କରାଯାଉଛି ଯେ, ବର୍ଷା ଯୋଗୁଁ ନାଳରେ ପାଣିର ପ୍ରବାହ ବଢ଼ିଯିବାରୁ ଏହି ଦୁର୍ଘଟଣା ଘଟିଥାଇପାରେ। ସେ କହିଛନ୍ତି ଯେ, କାରଟି ଉଜ୍ଜୟିନୀ ନମ୍ବରର ଥିଲା ଏବଂ ଏହା ଉଜ୍ଜୟିନୀର ହିଁ ଥିଲା। କାରଟିର ଏଠାକୁ ଆସିବା-ଯିବା ଓ ଏହା ସହ ଜଡ଼ିତ ଅନ୍ୟାନ୍ୟ ଦିଗ ସମ୍ପର୍କରେ ମଧ୍ୟ ତଥ୍ୟ ସଂଗ୍ରହ କରାଯାଉଛି। ପୁଲିସ ମନ୍ଦିର ଓ ଏହାର ଆଖପାଖରେ ଲାଗିଥିବା ସିସିଟିଭି କ୍ୟାମେରାର ଫୁଟେଜ୍ ଯାଞ୍ଚ କରୁଛି। ଦୁର୍ଘଟଣା ପରେ ଏଠାକାର ବ୍ୟବସ୍ଥାରେ କେଉଁ କେଉଁ ସୁଧାର ଆବଶ୍ୟକ, ସେନେଇ ମଧ୍ୟ ଅନୁଧ୍ୟାନ କରାଯାଉଛି।

_

ହିନ୍ଦୁସ୍ଥାନ ସମାଚାର / ସ୍ୱାଗତିକା