ନୂଆଦିଲ୍ଲୀ, ୧୯ ସେପ୍ଟେମ୍ବର (ହି.ସ) ଭାରତୀୟ ରେଳବାଇ ରେଳ ଭିତ୍ତିଭୂମିକୁ ସୁଦୃଢ଼ କରିବା ଏବଂ ପରିଚାଳନା ଦକ୍ଷତା ବୃଦ୍ଧି ଉଦ୍ଦେଶ୍ୟରେ ପ୍ରାୟ 275 କୋଟି ଟଙ୍କା ମୂଲ୍ୟର ଦକ୍ଷିଣ ଉପକୂଳ ରେଳ ଏବଂ ପଶ୍ଚିମ ରେଳବାଇର ଦୁଇଟି ପ୍ରକଳ୍ପକୁ ମଞ୍ଜୁରି ଦେଇଛି।

ଦକ୍ଷିଣ ଉପକୂଳ ରେଳବାଇର ସାଭାଲାୟାପୁରମ-ଗୁଣ୍ଟୁର ବିଭାଗରେ 1x25 କେଭି ବୈଦ୍ୟୁତିକ ଟ୍ରାକ୍ସନ ସିଷ୍ଟମକୁ 2x25 କେଭିକୁ ଉନ୍ନୀତ କରିବା ପାଇଁ ରେଳବାଇ 142 କୋଟି ମଞ୍ଜୁର କରିଛି। 73 ରୁଟ୍ କିଲୋମିଟର (ଆର୍. କେ. ଏମ୍.) ଏବଂ 146 ଟ୍ରାକ୍ କିଲୋମିଟର (ଟି. କେ. ଏମ୍.) ଅଞ୍ଚଳରେ ଏହି କାର୍ଯ୍ୟ କରାଯିବ। ଏହି ବିଭାଗଟି ଏଚ୍. ୟୁ. ଏନ୍. ରୁଟ-8ର ଅଂଶବିଶେଷ, ଯାହା ଭାସ୍କୋ-ଗଡଗ-ଗୁଣ୍ଟାକାଲ-ନନ୍ଦୟାଲ-ସାଭାଲାୟାପୁରମ୍-ଗୁଣ୍ଟୁର-ବିଜୟୱାଡା ମାର୍ଗକୁ ସଂଯୋଗ କରିଥାଏ।

ରେଳ ମନ୍ତ୍ରଣାଳୟ ଅନୁଯାୟୀ, କର୍ଷଣ ବ୍ୟବସ୍ଥାର ଉନ୍ନତିକରଣ ବିଦ୍ୟୁତ ଯୋଗାଣ ଦକ୍ଷତା ଏବଂ ବିଶ୍ୱସନୀୟତାକୁ ବୃଦ୍ଧି କରିବ ଏବଂ ଏହି ମାର୍ଗରେ ବର୍ଦ୍ଧିତ ରେଳ ଟ୍ରାଫିକକୁ ଅଧିକ ପ୍ରଭାବଶାଳୀ ଭାବରେ ପରିଚାଳନା କରିବାରେ ସାହାଯ୍ୟ କରିବ। ଏହାବ୍ୟତୀତ, ପଶ୍ଚିମ ରେଳବାଇର ଉଧନା-ଉକାଇ ସୋନଗଡ଼ ବିଭାଗରେ ଲେଭଲ୍ କ୍ରସିଂ ନମ୍ବର 53 ସ୍ଥାନରେ 133.2295 କୋଟି ଟଙ୍କା ବ୍ୟୟରେ ଚାରି ଲେନ ବିଶିଷ୍ଟ ସଡ଼କ ଓଭର ବ୍ରିଜ୍ (ଆର୍. ଓ. ବି.) ନିର୍ମାଣକୁ ମଞ୍ଜୁରି ଦିଆଯାଇଛି।

ରେଳବାଇ ଏବଂ ରାଜ୍ୟ ସରକାରଙ୍କ ମଧ୍ୟରେ ବ୍ୟୟ ବଣ୍ଟନ ଆଧାରରେ ଏହି ପ୍ରକଳ୍ପ ସମ୍ପୂର୍ଣ୍ଣ ହେବ। ରେଳବାଇ ଏବଂ ରାଜ୍ୟ ସରକାରଙ୍କ ଭାଗ ଯଥାକ୍ରମେ 66.6147 କୋଟି ଏବଂ 66.6148 କୋଟି ଟଙ୍କା ହେବ। ପ୍ରସ୍ତାବିତ ଆର. ଓ. ବି. ର ରେଳ ସେତୁ ଢାଞ୍ଚା ଓପନ ୱେବ ଗର୍ଡରର ହେବ, ଯାହାର ଆନୁମାନିକ ମୂଲ୍ୟ 91.60 କୋଟି ଟଙ୍କା ହେବ। ଏହି ଭାୟାଡାକ୍ଟର ଲମ୍ବ ହେବ 311.58 ମିଟର ଏବଂ ରେଳପଥର ଦୈର୍ଘ୍ୟ ହେବ 524.32 ମିଟର।

ରେଳ ମନ୍ତ୍ରଣାଳୟ ଅନୁଯାୟୀ, ସମ୍ପୃକ୍ତ ଲେଭଲ୍ କ୍ରସିଂରେ 62 ପ୍ରତିଶତ ତିର୍ଯକ କାରଣରୁ ଏହାର ଡିଜାଇନ୍ ଏବଂ ନିର୍ମାଣରେ ବୈଷୟିକ ଜଟିଳତା ରହିଛି। ଆର. ଓ. ବି. ନିର୍ମାଣ ଦ୍ୱାରା ସଡ଼କ ଯାତାୟାତ ସହଜ ହେବ ଏବଂ ରେଳ ସେବାଗୁଡ଼ିକର ସୁରକ୍ଷା ଏବଂ ଦକ୍ଷତା ବୃଦ୍ଧି ପାଇବ ଏବଂ ରେଳ ପରିଚାଳନାରେ ବ୍ୟାଘାତ ହ୍ରାସ ପାଇବ।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା