ମାଲକାନଗିରି, ୨୧ ସେପ୍ଟେମ୍ବର (ହି.ସ.)- ମାଲକାନଗିରି ଜିଲ୍ଲା କୁଡୁମୁଲୁଗୁମା ଅଞ୍ଚଳରେ ବିଦ୍ୟୁତ୍ ସରବରାହରେ ଅନିୟମିତତା ଯୋଗୁଁ ଅଞ୍ଚଳବାସୀ ଅସୁବିଧାର ସମ୍ମୁଖୀନ ହେଉଛନ୍ତି। ଅଞ୍ଚଳବାସୀଙ୍କ କହିବା ଅନୁଯାୟୀ, ସେପ୍ଟେମ୍ବର ୧୮ ତାରିଖ ସନ୍ଧ୍ୟାରୁ ବିଦ୍ୟୁତ୍ ସରବରାହ ବନ୍ଦ ହୋଇ ୧୯ ତାରିଖ ରାତି ପ୍ରାୟ ୧୧ଟା ସମୟରେ ବିଦ୍ୟୁତ୍ ଆସିଥିଲା। ଏହାପରେ ୨୦ ତାରିଖରୁ ବାରମ୍ବାର ବିଦ୍ୟୁତ୍ ବିଚ୍ଛିନ୍ନ ହେଉଥିବାରୁ ସାଧାରଣ ଜନଜୀବନ ପ୍ରଭାବିତ ହେଉଛି। ପୂର୍ବ ସୂଚନା ବିନା ବିଦ୍ୟୁତ୍ ବିଚ୍ଛିନ୍ନ ହେଉଥିବାରୁ ବିଦ୍ୟାଳୟର ପାଠପଢ଼ା, ଡାକ୍ତରଖାନାର ଚିକିତ୍ସା ସେବା, ସରକାରୀ କାର୍ଯ୍ୟାଳୟରେ ସାଧାରଣ ଲୋକଙ୍କ କାମ ଏବଂ କୋର୍ଟ ସମ୍ପର୍କିତ କାର୍ଯ୍ୟ ପ୍ରଭାବିତ ହେଉଥିବା ଅଭିଯୋଗ ହୋଇଛି।
ସ୍ଥାନୀୟ ସୂଚନା ଅନୁଯାୟୀ, କୁଡୁମୁଲୁଗୁମା ସହର ଠାରୁ ପ୍ରାୟ ୧ କିଲୋମିଟର ଏବଂ ବିଦ୍ୟୁତ୍ ଗ୍ରିଡ୍ ରୁ ପ୍ରାୟ ୨୦୦ ମିଟର ଦୂରରେ ଏକ ସିମେଣ୍ଟ ବିଦ୍ୟୁତ୍ ଖୁଣ୍ଟ ଭାଙ୍ଗିଯାଇଛି। ଏହି ଖୁଣ୍ଟ ପରିବର୍ତ୍ତନ କରି ନୂତନ ଖୁଣ୍ଟ ପୋତି ବିଦ୍ୟୁତ୍ ସଂଯୋଗ ସ୍ୱାଭାବିକ କରିବାକୁ ପ୍ରାୟ ଏକ ସପ୍ତାହ ସମୟ ଲାଗିପାରେ ବୋଲି ଟାଟା ପାୱାରର କନିଷ୍ଠ ଯନ୍ତ୍ରୀଙ୍କ ପକ୍ଷରୁ କୁହାଯାଇଛି। ବର୍ତ୍ତମାନ ସାମୟିକ ଭାବେ ପ୍ରାୟ ୭ କିଲୋମିଟର ଦୂରର ଅନ୍ୟ ଏକ ଲାଇନ୍ ରୁ ବିଦ୍ୟୁତ୍ ସଂଯୋଗ କରାଯାଇଥିବାରୁ ସେହି ବ୍ୟବସ୍ଥାରେ ବାରମ୍ବାର ବିଦ୍ୟୁତ୍ ବ୍ୟାଘାତ ଘଟୁଥିବା କୁହାଯାଉଛି।
କନିଷ୍ଠ ଯନ୍ତ୍ରୀଙ୍କ କହିବା ଅନୁଯାୟୀ, ସେପ୍ଟେମ୍ବର ୨୩ ତାରିଖ ସୁଦ୍ଧା ବିଦ୍ୟୁତ୍ ବ୍ୟବସ୍ଥା ସ୍ୱାଭାବିକ ହୋଇଯିବାର ଆଶା ରହିଛି। ନୂତନ ବିଦ୍ୟୁତ୍ ଖୁଣ୍ଟ ପହଞ୍ଚିବା ପରେ ଗାତ ଖୋଳିବା, ଖୁଣ୍ଟ ପୋତିବା ଏବଂ ବିଦ୍ୟୁତ୍ ତାର ସଂଯୋଗ କରିବା ପ୍ରକ୍ରିୟା ସମ୍ପନ୍ନ କରାଯିବ ବୋଲି ସେ କହିଛନ୍ତି।
ତେବେ ଗ୍ରାଉଣ୍ଡ ଜିରୋରେ ଯାଇ ଦେଖିବା ସମୟରେ ଗ୍ରିଡ୍ ପରିସରରେ ଅନେକ ସିମେଣ୍ଟ ବିଦ୍ୟୁତ୍ ଖୁଣ୍ଟ ପଡ଼ିରହିଥିବା ଦେଖାଯାଇଥିଲା। ଏପରି ସ୍ଥିତିରେ ଭାଙ୍ଗିଥିବା ଖୁଣ୍ଟ ପରିବର୍ତ୍ତନ ପାଇଁ ଆବଶ୍ୟକ ପ୍ରକ୍ରିୟାରେ ବିଳମ୍ବ କାହିଁକି ହେଉଛି—ତାହାକୁ ନେଇ ଅଞ୍ଚଳବାସୀ ପ୍ରଶ୍ନ ଉଠାଇଛନ୍ତି।
ବିଦ୍ୟୁତ୍ ସେବାରେ ଦୀର୍ଘ ସମୟର ବିଚ୍ଛିନ୍ନତା, ପୁନଃପୁନଃ ବିଦ୍ୟୁତ୍ କାଟ ଏବଂ ମରାମତିରେ ବିଳମ୍ବ ସମ୍ପର୍କରେ ଉପଭୋକ୍ତାମାନେ ସମ୍ପୃକ୍ତ ବିଦ୍ୟୁତ୍ ବିତରଣ କମ୍ପାନୀର ଅଭିଯୋଗ ନିରାକରଣ ବ୍ୟବସ୍ଥାରେ ଅଭିଯୋଗ ଦାଖଲ କରିପାରିବେ। ଆବଶ୍ୟକ ହେଲେ ନିର୍ଦ୍ଧାରିତ ନିୟମ ଅନୁଯାୟୀ ଉଚ୍ଚତର ଅଭିଯୋଗ ନିରାକରଣ ମଞ୍ଚର ମଧ୍ୟ ଆଶ୍ରୟ ନିଆଯାଇପାରେ।
ଏହି ପରିପ୍ରେକ୍ଷୀରେ ୨୩ ତାରିଖ ସୁଦ୍ଧା ବିଦ୍ୟୁତ୍ ବ୍ୟବସ୍ଥା ସ୍ୱାଭାବିକ କରିବା ସହ ଭବିଷ୍ୟତରେ ଏଭଳି ବାରମ୍ବାର ବିଦ୍ୟୁତ୍ ବିଭ୍ରାଟ ନହେବା ପାଇଁ ସ୍ଥାୟୀ ପଦକ୍ଷେପ ନେବାକୁ ଅଞ୍ଚଳବାସୀ ବିଦ୍ୟୁତ୍ ବିଭାଗ ଓ ଟାଟା ପାୱାର କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଛନ୍ତି।
ହିନ୍ଦୁସ୍ଥାନ ସମାଚାର / ଶିବବ୍ରତ
