ଆଇଚି-ନାଗୋୟା, ସେପ୍ଟେମ୍ବର 22 (ହି.ସ)ଭାରତୀୟ ମହିଳା ବ୍ୟାଡମିଣ୍ଟନ ଦଳ ଏସିଆଇ କ୍ରୀଡ଼ା ୨୦୨୬ର କ୍ୱାର୍ଟର ଫାଇନାଲରେ ଜାପାନଠାରୁ ୧-୩ରେ ପରାସ୍ତ ହୋଇଛି। ଏହା ସହିତ ଏସିଆଇ କ୍ରୀଡ଼ାରେ ଭାରତୀୟ ଦଳର ଅଭିଯାନ ଶେଷ ହୋଇଛି। ମଙ୍ଗଳବାର ଖେଳାଯାଇଥିବା ଏହି ମୁକାବିଲାରେ ପିଭି ସିନ୍ଧୁ ଏବଂ ତନିଶା ଶର୍ମା-ତରୁଣଙ୍କ ପ୍ରଦର୍ଶନରେ କିଛି ଭଲ ମୁହୂର୍ତ୍ତ ଦେଖିବାକୁ ମିଳିଥିଲା, କିନ୍ତୁ ଭାରତ ଜାପାନର ଚ୍ୟାଲେଞ୍ଜକୁ ଅତିକ୍ରମ କରିପାରିଲା ନାହିଁ।
କ୍ୱାର୍ଟର ଫାଇନାଲର ପ୍ରଥମ ମୁକାବିଲାରେ ଦୁଇଥର ଅଲିମ୍ପିକ୍ ପଦକ ବିଜେତା ପିଭି ସିନ୍ଧୁଙ୍କ ସାମ୍ନା ଜାପାନର ଆକାନେ ୟାମାଗୁଚିଙ୍କ ସହ ହୋଇଥିଲା। ପ୍ରଥମ ଗେମ୍ରେ ଉଭୟ ଖେଳାଳିଙ୍କ ମଧ୍ୟରେ କଡ଼ା ପ୍ରତିଦ୍ୱନ୍ଦ୍ୱିତା ଦେଖାଯାଇଥିଲା। ସିନ୍ଧୁ ୫-୫ରେ ସ୍କୋର ସମାନ କରିଥିଲେ, କିନ୍ତୁ ବ୍ରେକ୍ ସମୟରେ ୟାମାଗୁଚି ୧୧-୯ରେ ଆଗୁଆ ଥିଲେ। ସିନ୍ଧୁ ୧୨-୧୨ରେ ସ୍କୋର ସମାନ କରିବା ପରେ ୧୭-୧୮ ଏବଂ ପରେ ୧୮-୧୮ରେ ପୁଣି ସମତା ହାସଲ କରିଥିଲେ।
ଏହା ପରେ ମଧ୍ୟ ଉଭୟଙ୍କ ମଧ୍ୟରେ କଡ଼ା ସଂଘର୍ଷ ଜାରି ରହିଥିଲା ଏବଂ ସିନ୍ଧୁ ପ୍ରଥମ ଗେମ୍କୁ ୨୩-୨୧ରେ ଜିତିଥିଲେ। ଦ୍ୱିତୀୟ ଗେମ୍ରେ ମଧ୍ୟ ଉଭୟଙ୍କ ମଧ୍ୟରେ କଡ଼ା ମୁକାବିଲା ହୋଇଥିଲା। ବ୍ରେକ୍ ସମୟରେ ୟାମାଗୁଚି ୧୧-୯ରେ ଆଗୁଆ ଥିଲେ ଏବଂ ପରେ ନିଜର ଅଗ୍ରଣୀକୁ ୧୭-୧୨ରେ ପହଞ୍ଚାଇଥିଲେ। ସିନ୍ଧୁ ଚମତ୍କାର ପ୍ରତ୍ୟାବର୍ତ୍ତନ କରି ବ୍ୟବଧାନକୁ ୧୬-୧୮ କରିଥିଲେ, କିନ୍ତୁ ୟାମାଗୁଚି ପୁଣି ନିଜର ଅଗ୍ରଣୀକୁ ମଜବୁତ କରି ଦ୍ୱିତୀୟ ଗେମ୍କୁ ୨୧-୧୮ରେ ଜିତିଥିଲେ। ନିର୍ଣ୍ଣାୟକ ଗେମ୍ରେ ୟାମାଗୁଚି ଆରମ୍ଭରୁ ପ୍ରଭାବ ବିସ୍ତାର କରି ବ୍ରେକ୍ ସମୟରେ ୧୧-୪ରେ ଆଗୁଆ ରହିଥିଲେ। ସିନ୍ଧୁ ମ୍ୟାଚ୍କୁ ଫେରିପାରିନଥିଲେ ଏବଂ ୟାମାଗୁଚି ନିର୍ଣ୍ଣାୟକ ଗେମ୍କୁ ୨୧-୧୧ରେ ଜିତି ଜାପାନକୁ ୧-୦ରେ ଅଗ୍ରଣୀ ଦେଇଥିଲେ।
ଦ୍ୱିତୀୟ ମୁକାବିଲାରେ ଉନ୍ନତି ହୁଡ୍ଡାଙ୍କ ସାମ୍ନା ତୋମୋକା ମିୟାଜାକିଙ୍କ ସହ ହୋଇଥିଲା। ପ୍ରଥମ ଗେମ୍ରେ ଉନ୍ନତି ୧୧-୧୦ରେ ସାମାନ୍ୟ ଅଗ୍ରଣୀ ହାସଲ କରିଥିଲେ, କିନ୍ତୁ ଏହା ପରେ ମିୟାଜାକି ପ୍ରତ୍ୟାବର୍ତ୍ତନ କରି ପ୍ରଥମ ଗେମ୍କୁ ୨୧-୧୬ରେ ଜିତିଥିଲେ। ଦ୍ୱିତୀୟ ଗେମ୍ରେ ଉନ୍ନତି ଜବରଦସ୍ତ ଆରମ୍ଭ କରି ବ୍ରେକ୍ ସମୟରେ ୧୧-୪ରେ ଆଗୁଆ ରହିଥିଲେ। କିନ୍ତୁ ମିୟାଜାକି ପୁଣି ପ୍ରତ୍ୟାବର୍ତ୍ତନ କରି ସ୍କୋରକୁ ୧୫-୧୩ରେ ପହଞ୍ଚାଇଥିଲେ। ଏହା ପରେ ଜାପାନୀ ଖେଳାଳି ଦ୍ୱିତୀୟ ଗେମ୍କୁ ୨୧-୧୮ରେ ଜିତି ଜାପାନର ଅଗ୍ରଣୀକୁ ୨-୦ କରିଥିଲେ।
ତୃତୀୟ ମୁକାବିଲାରେ ଅଭିଜ୍ଞ ଯୁଗଳ ଯୋଡ଼ି ଟ୍ରିସା ଜଲି ଏବଂ ଗାୟତ୍ରୀ ଗୋପୀଚାନ୍ଦଙ୍କ ସାମ୍ନା ଯୁକି ଫୁକୁଶିମା ଏବଂ ମାୟୁ ମାତ୍ସୁମୋତୋଙ୍କ ସହ ହୋଇଥିଲା। ଭାରତୀୟ ଯୋଡ଼ି ବ୍ରେକ୍ ସମୟରେ ୧୧-୧୦ରେ ଆଗୁଆ ଥିଲେ ଏବଂ ପ୍ରଥମ ଗେମ୍କୁ ୨୧-୧୭ରେ ନିଜ ନାମରେ କରିଥିଲେ। ଦ୍ୱିତୀୟ ଗେମ୍ରେ ମଧ୍ୟ ଟ୍ରିସା ଓ ଗାୟତ୍ରୀ ୧୧-୮ରେ ଅଗ୍ରଣୀ ହାସଲ କରିଥିଲେ ଏବଂ ଚମତ୍କାର ପ୍ରଦର୍ଶନ ଜାରି ରଖି ଦ୍ୱିତୀୟ ଗେମ୍କୁ ୨୧-୧୭ରେ ଜିତିଥିଲେ।
ଏହି ବିଜୟ ସହ ଭାରତ ମୁକାବିଲାକୁ ଫେରିଥିଲା ଏବଂ ସ୍କୋର ୧-୨ ହୋଇଥିଲା। ଏହା ପରେ ଭାରତର ଆଶା ତନିଶା ଶର୍ମାଙ୍କ ଉପରେ ଥିଲା, କିନ୍ତୁ ତାଙ୍କୁ ନୋଜୋମି ଓକୁହାରାଙ୍କ ବିପକ୍ଷରେ ପରାଜୟର ସାମ୍ନା କରିବାକୁ ପଡ଼ିଥିଲା। ଓକୁହାରା ପ୍ରଥମ ଗେମ୍କୁ ୨୧-୧୨ରେ ଜିତିଥିଲେ ଏବଂ ଦ୍ୱିତୀୟ ଗେମ୍ରେ ବ୍ରେକ୍ ସମୟରେ ୧୧-୪ରେ ଆଗୁଆ ଥିଲେ। ଜାପାନୀ ଖେଳାଳି ଦ୍ୱିତୀୟ ଗେମ୍କୁ ୨୧-୧୦ରେ ଜିତି ମୁକାବିଲାକୁ ୩-୧ରେ ନିଜ ନାମରେ କରିଥିଲେ। ଏହା ସହିତ ଭାରତୀୟ ମହିଳା ବ୍ୟାଡମିଣ୍ଟନ ଦଳ କ୍ୱାର୍ଟର ଫାଇନାଲରୁ ବିଦାୟ ନେଇଥିଲା।
--------
ହିନ୍ଦୁସ୍ଥାନ ସମାଚାର / ସ୍ୱାଗତିକା
22 Sep 2026
