ନ୍ୟୁୟର୍କ, ସେପ୍ଟେମ୍ବର 23 (ହି.ସ): ତୁର୍କିଏର ରାଷ୍ଟ୍ରପତି ରେସେପ ତାୟିପ ଏର୍ଦୋଗାନ୍ ମିଳିତ ଜାତିସଂଘ ମହାସଭା (ୟୁଏନ୍ଜିଏ)ରେ ଏକ କଡ଼ା ଭାଷଣ ଦେଇ ଗାଜା ଏବଂ ଅଧିକୃତ ପଶ୍ଚିମତଟରେ ଇସ୍ରାଏଲର କାର୍ଯ୍ୟକଳାପକୁ ନିନ୍ଦା କରିଛନ୍ତି। ଏଥିରେ ଅସନ୍ତୁଷ୍ଟ ହୋଇ ଇସ୍ରାଏଲୀ ପ୍ରତିନିଧିମଣ୍ଡଳୀ ବୈଠକରୁ ବାହାରି ଯାଇଥିଲା। ତେବେ ପାଲେଷ୍ଟାଇନୀ ପ୍ରତିନିଧିମାନେ ତାଳି ବଜାଇ ଏର୍ଦୋଗାନ୍ଙ୍କ ଉକ୍ତିକୁ ସମର୍ଥନ କରିଥିଲେ। ଏର୍ଦୋଗାନ୍ ଗାଜାରେ ଇସ୍ରାଏଲର ଜାରି ରହିଥିବା ଯୁଦ୍ଧ ଅପରାଧ ଏବଂ ଅଧିକୃତ ପଶ୍ଚିମତଟରେ ଇସ୍ରାଏଲୀ ବସତିରେ ରହୁଥିବା ଲୋକଙ୍କ ଦ୍ୱାରା ହେଉଥିବା ଆକ୍ରମଣ ଓ ହିଂସା ବୃଦ୍ଧି ପ୍ରସଙ୍ଗ ଉଠାଇଥିଲେ।

ଅଲ୍ ଜଜିରାର ରିପୋର୍ଟ ଅନୁସାରେ, ସେ କହିଥିଲେ, “ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସମର୍ଥନରେ ଆମେ ଯୁଦ୍ଧବିରତିରେ ଅବଦାନ ରଖିଥିଲୁ। କିନ୍ତୁ ଏହି ତଥାକଥିତ ଯୁଦ୍ଧବିରତି ସତ୍ତ୍ୱେ ଗାଜାରେ ୧,୩୦୦ରୁ ଅଧିକ ସାଧାରଣ ନାଗରିକଙ୍କୁ ହତ୍ୟା କରାଯାଇଛି।” ସେ କହିଥିଲେ ଯେ, ହମାସ ଏବଂ ଅନ୍ୟ ପାଲେଷ୍ଟାଇନୀ ଗୋଷ୍ଠୀଗୁଡ଼ିକ ଅକ୍ଟୋବର ଯୁଦ୍ଧବିରତି ଚୁକ୍ତିର ଦ୍ୱିତୀୟ ପର୍ଯ୍ୟାୟକୁ ଗ୍ରହଣ କରିଥିଲେ ମଧ୍ୟ ଇସ୍ରାଏଲ ଗାଜାରେ ନିଜର କାର୍ଯ୍ୟାନୁଷ୍ଠାନ ବନ୍ଦ କରୁନାହିଁ।

ଏର୍ଦୋଗାନ୍ କହିଥିଲେ, “ଆମେ ଏପରି ଏକ ଗଣହତ୍ୟାକାରୀ ମାନସିକତାର ସମ୍ମୁଖୀନ ହେଉଛୁ, ଯାହାର ରକ୍ତପାତରେ କେବେ ବି ମନ ଭରେ ନାହିଁ। ମାନବିକତା, ଦୟା କିମ୍ବା ବିବେକ ଥିବା କୌଣସି ବ୍ୟକ୍ତି ଏହାକୁ ଅଣଦେଖା କରିପାରିବେ ନାହିଁ।”

ଏର୍ଦୋଗାନ୍ ମିଳିତ ଜାତିସଂଘ (ୟୁଏନ୍)କୁ ମଧ୍ୟ ସମାଲୋଚନା କରିଥିଲେ। ସେ କହିଥିଲେ ଯେ, ସଂଘର୍ଷପ୍ରବଣ ଅଞ୍ଚଳଗୁଡ଼ିକରେ ଶାନ୍ତି ଓ ସ୍ଥିରତା ବଜାୟ ରଖିବାର ନିଜ ଦାୟିତ୍ୱ ପୂରଣ କରିବାରେ ୟୁଏନ୍ ବିଫଳ ହୋଇଛି। ସେ କହିଥିଲେ, “୮୧ ବର୍ଷ ପୂର୍ବେ ବିଶ୍ୱରେ ଶାନ୍ତି ଓ ସ୍ଥିରତା ବଜାୟ ରଖିବା ପାଇଁ ମିଳିତ ଜାତିସଂଘ ଗଠନ କରାଯାଇଥିଲା। କିନ୍ତୁ ଦୁଃଖର ବିଷୟ, ୟୁଏନ୍ ନିଜର କର୍ତ୍ତବ୍ୟ ପାଳନ କରିବାରେ ବିଫଳ ହୋଇଛି।”

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା